कांग्रेसले सरकार सञ्चालन र महासमितिबाट पारित दस्तावेजबारे केन्द्रीय समितिमा छलफल गर्ने

बैठकपछि सहमहामन्त्री जीवन परियारले पदाधिकारी बैठकले केन्द्रीय समिति बैठकका एजेण्डा तय गरेको बताए । उनका अनुसार बैठकमा महासमिति बैठकबाट पारित भएका दस्तावेज, सरकार सञ्चालन र संगठन निर्माणका विषयमा केन्द्रीय समिति बैठकमा छलफल हुनेछ ।

उनले भने, ‘साउन २३ गतेबाट कांग्रेस केन्द्रीय कार्यसमिति बैठक आह्वान गरिएको छ । सो बैठकको तयारीका लागि आज सभापतिजीसँग छलफल भयो । महासमिति बैठकमा विभिन्न दस्तावेजहरु पेस भएर छलफल भएको छ । सुझावहरु आएका छन् । ती सुझावहरु समेत समेटेर दस्तावेजहरु पारित गर्ने कुरा भएको छ । त्यस्तै, अहिले नेपाली कांग्रेस सरकारमा छ । कांग्रेस किन सरकारमा छ र कसरी काम गर्छ भन्नेबारेमा समेत छलफल गर्नुपर्ने अवस्था छ ।'

उनका अनुसार सरकार सञ्चालनका विविध विषयहरुमा केन्द्रीय समितिमा छलफल हुने बताए । सभापति देउवाले सोमबार नै पार्टीका विभागहरुमा विभागीय प्रमुखहरु समेत मनोनित गरेका छन् ।