कांग्रेसमा केन्द्रीय सदस्यले नै बोल्ने ठाउँ छैन : शिवाकोटी
काठमाडौँ — नेपाली कांग्रेसका केन्द्रीय सदस्य अजयबाबु शिवाकोटीले पार्टी सधैँ विधानविपरीत चल्न नसक्ने बताएका छन् । उनले पार्टीमा केन्द्रीय कार्यसमितिका सदस्यहरुले बोल्ने ठाउँसमेत नपाएको गुनासो गरे । शनिबार नेपाल प्रेस युनियनको ३२ औं स्थापना दिवस समारोहमा उनले कांग्रेसले फाली निस्केको हलो जस्तो भएको बताए ।
उनले पार्टी नेतृत्वले विधानको पालना नगर्दा यो अवस्था आएको बताए ।
'हिजो महाधिवेशनबाट देशभर उत्साह लिएर आएका साथीहरु हुनुहुन्थ्यो । हामीमा पनि उत्साह थियो । तर कांग्रेस फाली निस्केको हलो जस्तो भएको छ,' उनले अघि भने, 'तर अहिले पार्टीमा कुनै उत्साह बाँकी छैन । नौ महिनादेखि केन्द्रीय समितिको बैठकसमेत बसेको छैन । पदाधिकारी र पूर्वपदाधिकारीको नाममा पार्टीका सबै निर्णयहरु हुँदै आएका छन् । यो विधानविपरीत हो । पार्टीमा केन्द्रीय सदस्यहरुले नै बोल्ने ठाउँ नपाएको अवस्था छ ।'
उनले कांग्रेसको यही अवस्था रहे आगामी चुनाव कांग्रेसका लागि फलामको चिउरासरह हुने बताए ।
प्रकाशित : जेष्ठ १३, २०८० १८:४६