पशुपतिको जलहरीबारे छानबिन समिति गठन गर्न सांसद दाहालको माग

'मैले संसदीय मर्यादा उल्लंघन गरेको छैन । बरु ओलीज्यूले नै २ घण्टाको अभिव्यक्तिमा हरेक ५ मिनेटमा संसदीय मर्यादा उल्लंघन गर्नुहुन्छ ।'
कान्तिपुर संवाददाता

काठमाडौँ — माओवादी केन्द्रका सांसद लेखनाथ दाहालले संसद्‍मा पशुपतिनाथको जलहरीमा पित्तल लगाइएको घटनाबारे संसदीय छानबिन समिति गठन गर्नुपर्ने माग गरेका छन् । शुक्रबारको संसद्‍मा आफूले यसबारे प्रश्न उठाउँदा संसदीय मर्यादा उल्लंघन नभएको उनको भनाइ छ ।

शुक्रबार सांसद दाहालले यसबारे प्रश्न उठाउँदा नेकपा एमालेका सांसदहरूले आपत्ति जनाउँदै संसद्‍ अवरुद्ध पारेका थिए । सांसद दाहालले भने बरु एमाले अध्यक्ष केपी ओलीले नै संसद्‍मा बोल्दा संसदीय मर्यादा उल्लंघन गर्ने गरेको आरोप लगाए । संसद्‍ अवरुद्ध भएपछि पत्रकारहरूसँग बोल्दै सांसद दाहालले यस्तो प्रतिक्रिया दिएका हुन् ।

सांसद दाहालले संसदीय मर्यादा उल्लंघन गरेको भन्दै एमालेले आपत्ति जनाएकोमा जवाफ दिँदै सांसद दाहालले भने, 'बरु केपी ओलीज्यूले नै २ घण्टाको अभिव्यक्तिमा हरेक ५ मिनेटमा संसदीय मर्यादा उल्लंघन गर्नुहुन्छ ।'

'मैले प्रश्न उठाउँदा व्यक्तिमाथि किटान गरेको छैन । तत्कालीन प्रधानमन्त्रीको रुपमा केपी ओलीज्यूले त्यसको नैतिक जिम्मेवारी लिनुपर्छ भनेको मात्रै हुँ । संसदीय छानबिन समिति गठन गरौं न त । त्यो सुन कसले खायो ? उहाँहरूले आपत्ति जनाउनुपर्ने कुनै आधार छैन,' सांसद दाहालले भने, 'उहाँको सरकारको पालामा भएका भ्रष्टाचारका घटनाको छानबिन गरौं भनेर फहरिस्त बुझाउने क्रममा मैले पशुपतिको जलहरी लगाउँदा भएको अनियमितताको पनि प्रसंग उठाएको हुँ ।'

उक्त योजनामाथि पहिले नै मुद्दा परेको स्मरण गराउँदै सांसद दाहालले त्यस क्रममा ११ किलो सुन नभेटिएको दाबी गरेका छन् । संसद्‍मा दाहालले दिएको अभिव्यक्ति रेकर्डबाट हटाउनुपर्ने भन्दै एमाले सांसदहरूले नाराबाजी गर्दै विरोध जनाएका थिए ।

प्रकाशित : जेष्ठ १२, २०८० १६:०१
प्रतिक्रिया
पठाउनुहोस्

जनप्रतिनिधिलाई एमाले अध्यक्ष ओलीको निर्देशन- ‘समय खेर नफाल्नुहोला’

कान्तिपुर संवाददाता

काठमाडौँ — नेकपा एमालेका अध्यक्ष केपी ओलीले स्थानीय तहका जनप्रतिनिधिहरूलाई स्थानीय सरकारमा रहँदा आफ्नो जिम्मेवारीको समय खेर नफाल्न निर्देशन दिएका छन् । उनले हरेक समय आफूले आफूलाई प्रश्न गर्न र आफ्नो सबै समयको उपयोगिता र महत्वलाई बुझ्न आग्रह गरे ।

ललितपुरको च्यासलस्थित पार्टी कार्यालयमा शुक्रबार एमालेबाट निर्वाचित जनप्रतिनिधिहरूलाई प्रशिक्षित गर्न आयोजित कार्यक्रममा अध्यक्ष ओलीले भने, ‘तपाईंहरू जिम्मेवारीमा हुनुहुन्छ । तपाईंहरू जवाफदेही र उत्तरदायी हुनुपर्छ । त्यसैले तपाईंहरूले समय खेर नफाल्नुहोला । आफूले आफूलाई हरेक समय सोधिरहनुहोला कि तपाईं यो बेला जहाँ हुनुहुन्छ, त्यहाँभन्दा अन्तै हुनु पो महत्वपूर्ण थियो कि ?’

अध्यक्ष ओलीले जनप्रतिनिधिको एक वर्ष बितिसकेको भन्दै अब साढे तीन वर्ष बित्न पनि धेरै समय नलाग्ने बताए । ‘हामीसँग धेरै समय छैन । परिस्थिति फेरिएको छ । त्यसैले बेलैदेखि हामीले उपलब्धिहरू, कामहरू देखिने गरी जनताको अघिल्तिर प्रस्तुत भएर जानुपर्छ,’ उनले भने ।

उनले उद्देश्यमा स्पष्ट योजना बनाएर बजेट निर्माण र योजनाअनुरुप काम गर्न जनप्रतिनिधिहरूलाई निर्देशन दिए । अध्यक्ष ओलीले जनप्रतिनिधिले नागरिकप्रति उत्तरदायी र जवाफदेही भएर प्रस्तुत हुनुपर्ने बताए ।

‘जनप्रतिनिधिले कार्यसम्पादन कसरी गर्ने, हाम्रो बोली चाली व्यवहार कस्तो हुनुपर्छ भन्ने कुराले हामीप्रति जनताले हेर्ने दृष्टिकोण बन्छ,’ ओलीले अघि भने, ‘हामीले नागरिकसँग, हामीसँग जोडिन आएका नयाँ मान्छेहरूसँग अनैतिक तरिकाले प्रस्तुत हुन मिल्दैन । त्यही बेलाको बोली र व्यवहारबाट हामीलाई नागरिकले हेर्ने दृष्टिकोण तय हुन्छ । तपाईंहरूले ख्याल गर्नुहोला ।’

प्रकाशित : जेष्ठ १२, २०८० १५:५४
पूरा पढ्नुहोस्
प्रतिक्रिया
पठाउनुहोस्
×