पशुपतिमा जलहरी बनाउने विषयमा महालेखाले उठाएको थियो प्रश्‍न

कान्तिपुर संवाददाता

काठमाडौँ — सत्ता पक्षले एमाले अध्यक्ष केपी ओलीलाई निराधार भ्रष्टाचारको आरोप लगाएको भन्दै शुक्रबार एमालेले संसद् अवरुद्ध पार्‍यो । एमालेको अवरोधपछि २० मिनेटका लागि स्थगित बैठक डेढ घन्टासम्म पनि पुन: संचालन हुन सकेको छैन । एमालेले संसद् अवरोध गर्नेसम्मको विषय बनाएको पशुपतिमा जलहरी लगाउँदा भ्रष्टाचार भएको विषय यसअघि महालेखा परीक्षकको कार्यालयले समेत प्रश्न उठाएको योजना हो ।

पशुपतिनाथ मन्दिरमा जलहरी लगाउने योजनामा महालेखा परीक्षकको ५९ औँ प्रतिवेदनले नै प्रश्न उठाएको थियो । महालेखाले पशुपतिनाथमा जलहरी लगाउने बेला सुनको यकिन विवरण नआएको प्रष्टसँग लेखेको थियो ।

प्रतिवेदनअनुसार ओली प्रधानमन्त्री भएकै बेला सरकारले पशुपति मन्दिरको शिवलिङ्गको गर्भगृहलाई पूर्ण रुपले ढाक्ने गरेर १०३ किलो ७७३ ग्राम सुन खरिद गर्न ८० करोड ११ हजार खर्च गरेको थियो ।

'विभिन्न शुद्धताको प्रतिशत रहेको सुनमा अन्य धातु र रसायनको मिश्रण तामा २ किलो ८९० ग्राम, चाँदी १ किलो २४९ ग्राम, जिङ्क १२.७५ ग्रामसमेत प्रयोग गरी १०७ किलो ९२४.७५ ग्राम सुन कायम भएको उल्लेख छ । निर्मित जलहरी, जलधारा, नाग, नागमूर्ति सुनको किलालगायतमा प्रयोग भएको सुनको तौल ९६ किलो ८२२ ग्राम रहेको र बाँकी रहेको सुन १० किलो ९७६ ग्रामको रिङ्ग बनाई जलहरीमा लगाएको उल्लेख छ । रिङ्ग बनाउन प्रयोग भएको सुनको मूल्य रू. ७ करोड ८६ लाख ४६ हजार रहेको छ,' महालेखाले प्रतिवेदनमा लेखेको छ, 'जलहरी बनाएर बाँकी रहेको सो सुनको सम्पूर्ण परिमाण रिङ्ग बनाउने कार्यमा प्रयोग भएको पुष्टि हुने विवरण पेस गरेको छैन ।'

माओवादी केन्द्रका सांसद लेखनाथ दाहालले बुधबारको प्रतिनिधिसभा बैठकमा पूर्वप्रधानमन्त्री ओली सरकारमा बस्दा धेरै वटा भ्रष्टाचारका काण्डहरु आएको र पशुपतिनाथ मन्दिरमा सुनको जलहरी लगाउने बेला पित्तल लगाएको भन्दै आरोप लगाएका थिए । त्यसदिन भने एमालेले कुनै प्रतिक्रिया दिएको थिएन ।

शुक्रबार एमालेले त्यही विषयलाई उठाएर संसद् अवरुद्ध पारेको छ ।

प्रकाशित : जेष्ठ १२, २०८० १४:३५
प्रतिक्रिया
पठाउनुहोस्

दमकका पूर्वमेयर ओली अध्यक्ष रहेको मदन भण्डारी स्मृति प्रतिष्ठानका काम अलपत्र

‘ओलीका छोरा ठगी प्रकरणमा फरार छन्’
विनोद भण्डारी

विराटनगर — दमक नगरपालिकाका पूर्वमेयर रोमनाथ ओली वैशाख १८ मा मोरङको उर्लाबारीस्थित मदन भण्डारी स्मृति प्रतिष्ठानको अध्यक्षमा चुनिए । त्यसैबेला उनका छोरा अनिल वैदेशिक रोजगारीका लागि स्थानीय युवायुवतीसँग लाखौं रुपैयाँ उठाएर बेपत्ता भएको खबर सार्वजनिक भयो ।

एमाले केन्द्रीय सदस्यसमेत रहेका ओली छोराको यो घटनापछि प्रतिष्ठानका अन्य सदस्य र पूर्व पदाधिकारीसँग सम्पर्कविहीन छन् । ‘प्रतिष्ठान पनि आएका छैनन्,’ प्रतिष्ठानका एक पूर्वपदाधिकारीले भने, ‘बैठकमा उनका छोराको ठगी कारोबार र गतिविधिका बारेमा कुरा उठ्ने डरले ओली प्रतिष्ठानमा नआउँदा बाँकी पदाधिकारी र सदस्यको चयन भएन र कार्यसमितिले पूर्णता पाएको छैन ।’

ओलीका छोरा अनिलले अस्ट्रेलिया र कोरिया पठाउने भन्दै स्थानीय १६ जनासँग लाखौं रुपैयाँ लिएर गायब छन् । उनी पनि नेपालीलाई भुटानी शरणार्थी बनाएर अमेरिका, बेलायत, अस्ट्रेलिया, क्यानडा पठाउने गिरोहसँग नजिक रहेको आशंका गरिएको छ ।

छोराको कारोबारबारे आफ्नो कुनै संलग्नता नरहेको दाबी गर्दै ओलीले यसबेला आफ्नोबारेमा जसले जे पनि भन्ने ठाउँ पाएको बताए । अनिलको गतिविधिका बारेमा आफू पूर्ण अनभिज्ञ रहेको दाबी गर्दै ओलीले टेलिफोनमा भने, ‘सबै आफन्त र चिनजानकै सँग पैसा लिएको रहेछ । उनीहरूले त्यसबारे मलाई नसोधेका कारण यो अवस्था आएको हो, अनिलले जे कर्म गर्‍यो, त्यसको फल उसैले पाउँछ । उसको गतिविधि र कारोबारसँग एक कोस टाढा छु ।’ अनिलले ५ जनालाई अस्ट्रेलिया र ११ जनालाई कोरिया पठाइदिने भन्दै ठगेका हुन् । उनले अस्ट्रेलियाका नाममा जनही ५ देखि १५ लाख र कोरियाका नाममा जनही १० लाख रुपैयाँका दरले रकम असुली गरेको आरोप छ ।

त्यसैगरी नेपाली नागरिकलाई भुटानी शरणार्थी बनाएर अमेरिकालगायत मुलुक पठाउने गिरोहका नाइके केशव दुलाल र सानु भण्डारीसँग अनिलको सम्पर्क रहेको दाबी गरिएको छ । उनले अमेरिका पठाउने भन्दै दमकका २५ जनाभन्दा बढीसँग जनही ७ लाखभन्दा बढी रकम उठाएको दाबी गरिएको छ । उनले अस्ट्रेलिया पठाउने भन्दै दमकका छत्रमणि कार्की, दमननाथ ढुंगाना, प्रेमकुमार गुरागाई, कृष्ण अधिकारी र विराटनगरका आकाश अधिकारीसँग रकम उठाएका थिए । कोरिया पठाउने भन्दै झापा कमलका इन्द्रप्रसाद सिटौला, सुमन सिटौला, निशा तिम्सिना, रोहित तिम्सिना, पुष्प तिम्सिना, गणेश खनाल, दमकका गीता खरेल, गणेश देवकोटा, वेदराज कार्की र सुरुङ्गाका टीका मैनाली र काठमाडौंका देवराज घिमिरेसँग रकम लिएको पीडितको दाबी छ । पीडितको उजुरीका आधारमा वैदेशिक रोजगार विभागले अनुसन्धानका लागि पक्राउ पुर्जी जारी गरेपछि अनिल फरार छन् ।

प्रतिष्ठानका एक पदाधिकारीले भने, ‘छोराको कारोबार रोमनाथजीलाई थाहा नहुने कुरै हुँदैन । छोराको गतिविधिले पक्कै पनि भुटानी शरणार्थी प्रकरणमा पनि ओली परिवारको कनेक्सन हुनुपर्छ भनेर औंला उठाउन थालेपछि उनी प्रतिष्ठानको सम्पर्कमा नआएर बचाउ अभियानमा लागेका छन् ।’

ओली प्रतिष्ठानको अध्यक्ष चुनिएको तीन साता बित्दासमेत उनको कार्यसमितिले पूर्णता पाएको छैन । वैशाख १८ को साँझ उनी निर्विरोध अध्यक्ष चुनिएर हिँडेपछि अहिलेसम्म सम्पर्कमा आएका छैनन् । समितिको सहसचिवका उम्मेदवार स्थानीय रुद्र तामाङका अनुसार २१ सदस्यीय कार्यसमितिमा ओलीसहित चार जना निर्विरोध चुनिएका छन् । तर बाँकी पदाधिकारी र सदस्यको टुंगो लागेको छैन । उनीसँगै दमककै उनका जेठान होमबहादुर थापा कोषाध्यक्ष, महिला उपाध्यक्षमा दमककै सुमित्रा भण्डारी र महिला सदस्यमा दुर्गा खरेल उप्रेती निर्विरोध चयन भएका थिए ।

‘त्यसबेला बाँकी पदाधिकारी र सदस्य चयनका लागि अर्को सूचना आउने भन्दै सबै हतार हतारमा हिँडे,’ तामाङले भने, ‘त्यसपछि ओली प्रतिष्ठानको सम्पर्कमा नआउँदा कार्यसमितिले पूर्णता पाउन सकेको छैन ।’ त्यसैगरी पाँच सदस्यीय लेखा समितिमा संयोजकबाहेक सदस्यमा लक्ष्मी सापकोटा, कृष्ण लुइँटेल, खगेन्द्र भण्डारी र यमुना भण्डारी निर्विरोध चुनिएका थिए । संयोजक चयन हुन बाँकी छ । ओलीले आफू प्रतिष्ठानको सम्पर्कमै रहेको र निर्वाचित भएयता विविध कामले चार पटक प्रतिष्ठानमा पुगेको दाबी गरे ।

प्रकाशित : जेष्ठ १२, २०८० १३:५४
पूरा पढ्नुहोस्
प्रतिक्रिया
पठाउनुहोस्
×