'ओली हेडमास्टर मात्रै होइन‚ विश्वविद्यालयको भीसी, इन्जिनियर, आर्किटेक्ट हो'

प्रतिनिधिसभामा एमालेका अध्यक्ष ओलीबाट शिक्षित हुनु भएकामा सत्तापक्षका सांसदहरूलाई बाँस्कोटाले बधाईसमेत दिएका थिए । 'हेडमास्टर भन्नुभयो, हामी आक्रोशित छैनौं । नेकपा (एमाले) लोकतन्त्र, राष्ट्रिय स्वाधीनता, सामाजिक न्यायसहितको परिवर्तन, पुनर्जागरण र राष्ट्रिय आत्मविश्वास निर्माणको विश्वविद्यालय हो । त्यसैले तपाईंहरूले दिएको उपाधिले पुग्दैन, केपी ओली यो विश्वविद्यालयको भीसी हो, प्रोफेसर, डाक्टर हो‚ इन्जिनियर हो, आर्किटेक्ट हो सबै हो,' उनले भने, 'तपाईंहरूले कम्तीमा सिक्न पाउनुभयो, बधाई छ ।'

बाँस्कोटाले एमाले र अध्यक्ष ओलीबाट सामाजिक विकासको मान्यता ग्रहण गरेर सुल्टो बाटो हिँड्न सुझाव दिएका थिए ।

सरकारले प्रस्तुत गरेको नीति तथा कार्यक्रममाथि राम्रोसँग छलफल हुन नसकेको बाँस्कोटाको भनाइ थियो । उनले नीति तथा कार्यक्रममाथि वादविवाद, बहस, संवाद हुन नसकेको र सुधारको गुन्जायस नरहेको बताए । सत्तापक्षका कारण त्यस्तो हुन नसकेको उनको भनाइ थियो ।

'सत्तापक्षले सुन्ने धीरता राख्ला भन्ने बुझाइ थियो । तर, हिजो अस्तिका कुराहरू सुनिरहँदा सत्तापक्ष आफ्नो कमजोरी लुकाउनका लागि प्रतिपक्षको तेजोवध गर्ने र तीव्र प्रतिवादमा उत्रिने उल्टो बाटोमा हिँडेको देखियो ।'

सत्तापक्षका सांसदहरूमा तथ्यको खडेरी परेको पनि सांसद बाँस्कोटाको भनाइ थियो । उनले नीति तथा कार्यक्रम सरकारको नेतृत्व गरिरहेको माओवादी र सत्ताको प्रमुख घटक कांग्रेसका नीतिको विरोधाभाषमा रुमल्लिएको बताए ।