कान्तिपुर वेबसाईट
AdvertisementAdvertisement

सगरमाथाको २७औं आरोहणसँगै कामीरिताकै बराबरीमा पादावा

२८ औं पटकको आरोहणका लागि कामीरिता मंगलबार पुन: सगरमाथा चढ्दै
सुरज कुँवर

काठमाडौँ — सोलुखुम्बुको पाङ्बोचेका ४६ वर्षीय पासाङ दावा शेर्पाले सर्वाधिक सगरमाथा आरोहण गर्ने नेपाली आरोही कामीरिता शेर्पाकै २७औं पटकको विश्वकीर्तिमान बराबरी गरेका छन् । 

इम्याजिन नेपाल ट्रेक एन्ड एक्सीपिडिसन प्रालिका कार्यकारी निर्देशक दावा ग्यालजेन शेर्पाका अनुसार पासाङ दावा शेर्पाले सोमबार बिहान सगरमाथाको चुचुरोमा पुगेका हुन् । यो आरोहणसँगै उनी कामीरिता शेर्पाकै हाराहारीमा सबैभन्दा बढी पटक विश्वकै अग्लो चुचुरोमा आरोहण गर्ने विश्वकै दोस्रो व्यक्ति बनेका छन् ।

‘पासाङ दावा चिनियाँ आरोही लिएर सोमबार बिहान ८:२५ बजे २७औं पटक चुचुरोमा पुगेका थिए,’ कार्यकारी निर्देशक शेर्पाले भने, ‘उहाँ अहिले चौथो शिविरमा फर्किसक्नु भएको छ । पर्सी आधारशिविर ओर्लिने कार्यक्रम रहेको छ ।’

विश्वभर आरोहीमाझ पादावा उपनामले चिनिने पासाङ दावाले यस वर्षको वसन्तकालीन सगरमाथा आरोहण सिजनमै दुई पटक सगरमाथा आरोहण गरेका हुन् । यसअघि पादावा वैशाख ३१ गते चुचुरोमा पुगेका थिए । त्यो उनको २६औं आरोहण थियो ।

यसैबीच आफ्नै जिल्लावासी पासाङ दावा शेर्पाको रेकर्ड बराबरीमा पुगेपछि गएको बधुबार २७औं पटक सगरमाथा आरोहण गरिसकेका कीर्तिमानी आरोही कामीरिता २८औं पटकको रेकर्ड बनाउन यसै सिजनमा दोस्रो पटक सगरमाथा आरोहण गर्दैछन् । उनी आबद्ध कम्पनी सेभन समिट ट्रेक्स प्रालिका अध्यक्ष मिग्मा शेर्पाका अनुसार, कामीरिता मंगलबार सगरमाथा चुचुरो पुग्दैछन् । ‘आज (सोमबार) राति कामीरिता २८ औं पटकको आरोहणका लागि सगरमाथाको चुचुरोमा उक्लिँदै छन्,’ सेभेन समिटका अध्यक्ष मिग्माले भने ।

कामीरिताले पहिलोपटक २०५१ मा सगरमाथा आरोहण गरेका थिए भने पासाङ दावाले २०५५ सालमा पहिलोपटक सगरमाथा आरोहण गरेका थिए । आरोहीहरूमाझ ‘लुकेको रत्न’ पनि भनिने पासाङ दावालाई सर्वाधिक मन पर्ने खुम्बु क्षेत्रको अमादब्बलम हिमाल हो । उनको घरदेखि डेढ घण्टा पैदल दूरीमा रहेको ६८ सय मिटर १२ मिटर उचाइको उक्त हिमाल उनले ७० पटकभन्दा बढी आरोहण गरिसकेका छन् ।

प्रकाशित : जेष्ठ ८, २०८० २१:५३
प्रतिक्रिया
पठाउनुहोस्

अर्थमन्त्री महत र एमसीसीका उपाध्यक्ष ब्रुक्सबीच भेटवार्ता

रासस

काठमाडौँ — मिलेनियम च्यालेन्ज कर्पोरेसन (एमसीसी) को युरोप, एसिया, प्यासिफिक तथा ल्याटिन अमेरिका मामिलासम्बन्धी सहायक उपाध्यक्ष जोनाथन ब्रुक्स नेतृत्वको प्रतिनिधिमण्डलले अर्थमन्त्री डा. प्रकाशशरण महतसँग भेटवार्ता गरेको छ ।

भेटका क्रममा एमसीसीले मिलेनियम च्यालेन्ज अकाउन्ट नेपाल विकास समितिअन्तर्गत अघि बढाइरहेका परियोजना कार्यान्वयनको समग्र स्थितिबारे छलफल भएको अर्थमन्त्री महतको सचिवालयले जनाएको छ ।

एमसीसी सम्झौता कार्यान्वयनमा जाने मिति (अगस्त २०२३) नजिकै आएको र यो कार्यान्वयनमा गएको मितिले पाँच वर्षभित्र आयोजना सम्पन्न गरिसक्नुपर्ने सन्दर्भमा यसको पूर्वतयारीका अवस्थाका बारेमा जानकारी लिन एमसीसीका पदाधिकारीको भ्रमण भएको सचिवालयले बताएको छ ।

भेटका क्रममा एमसीसी नायब उपाध्यक्ष ब्रुक्सले आयोजनाको जग्गा प्राप्ति, खरिद प्रक्रिया जस्ता पूर्वतयारीका काममा भएको प्रगतिप्रति खुसी व्यक्त गरे । त्यसैगरी, सम्झौता कार्यान्वयनमा जानुअघि सम्पन्न भइसक्नुपर्ने बाँकी कार्यका बारेमा पनि दुवै पक्षबीच विस्तृत छलफल भएको जनाइएको छ ।

भेटका क्रममा अर्थमन्त्री डा. महतले यो आयोजना पूर्वनिर्धारित समयावधिभित्रै सम्पन्न भई नेपालको आयोजना व्यवस्थापनमा उदाहरणीय बन्न सक्ने विश्वास व्यक्त गर्नाका साथै आयोजना चक्रमा आउने महत्त्वपूर्ण विषयहरूलाई कानुनको प्रक्रिया पूरा गरी यथाशीघ्र टुङ्ग्याउने प्रतिबद्धता जनाए ।

मन्त्री डा. महतले एमसिएअन्तर्गतका आयोजनाको सफलता अन्य आयोजनाका लागि पनि अनुकरणीय हुने विचार व्यक्त गर्दै एमसीसीका पदाधिकारीलाई नेपाल भ्रमण गरी छलफल गरेकामा धन्यवाद व्यक्त गरे ।

एमसीसी नायब उपाध्यक्ष ब्रुक्सले यसअघि उपप्रधान एवं गृहमन्त्री नारायणकाजी श्रेष्ठसँग भेटघाट गर्दै आयोजनाको जग्गा प्राप्तिमा सहजीकरणका लागि आग्रह गरेका थिए ।

मिलेनियम च्यालेन्ज नेपाल अकाउन्ट विकास समितिमार्फत करिब तीन सय १५ किलोमिटर चार सय केभी डबल सर्किट प्रसारणलाइन र करिब तीन सय पाँच किलोमिटर रणनीतिक सडक सञ्जाल विस्तार तथा मर्मतसम्भार परियोजनामा काम भइरहेको छ ।

प्रकाशित : जेष्ठ ८, २०८० २१:४०
पूरा पढ्नुहोस्
प्रतिक्रिया
पठाउनुहोस्
×