प्रकोप प्रभावितलाई वर्षाअगावै सुरक्षित आवास सुविधा पुर्याउन मन्त्री गुरुङको निर्देशन
काठमाडौँ — सहरी विकासमन्त्री सीता गुरुङले आगलागीलगायत प्रकोप प्रभावित भई घरविहीन बनेका नागरिकलाई वर्षा सुरू हुनुअगावै ओत लाग्न पाउने गरी आवासको सुविधा पुर्याउन निर्देशन दिएकी छन् । आइतबार मन्त्रालयमा भएको सहरी विकास तथा भवन निर्माण विभागको स्वागत र बिफ्रिङ कार्यक्रममा सम्बोधन गर्दै मन्त्री गुरुङले विपद् प्रभावित भई घरविहीन बनेका नागरिकलाई दुई महिनाभित्रै आधारभूत आवास सुविधाको प्रबन्ध गर्न निर्देशन दिएकी हुन् ।
‘संविधानले नै नागरिकलाई आधारभूत आवास सुविधाको कुरा मौलिक हकको रुपमा व्यवस्था गरेको छ । त्यससम्बन्धी कानुनी प्रावधान र अनुदानको व्यवस्थासमेत छ,’ मन्त्री गुरुङले भनिन्, ‘संविधान र कानुनबमोजिम जसले सुरक्षित आवासको सुविधा पाउने हो, उसलाई वर्षा सुरू हुनुअगावै आधारभूत आवासको सुविधा पुर्याउनूस् ।’
विभागले सुरक्षित नागरिक आवास कार्यान्वयन कार्यविधिअनुसार विपद्का कारण घरबारविहीन भएका परिवारलाई आवासका लागि जस्तापाता र सहुलियत दरको काठलगायतका सामग्री खरिदका लागि अनुदान दिने व्यवस्था छ भने विपन्न समुदायलाई घर निर्माणमा अनुदान दिने कार्यक्रम छ । तर त्यस्तो अनुदान कार्यक्रम प्रभावकारी छैन ।
मन्त्री गुरुङले सरकारी लगानीबाट बढीभन्दा बढी परिणाम आउने गरी काम गर्न निर्देशन दिएकी छन् । उनले काठमाडौंको फोहोरमैला व्यवस्थापनमा चासो राख्दै बन्चरेडाँडा फोहोरमैला व्यवस्थापन केन्द्रको व्यवस्थापनमा सम्बन्धित स्थानीय तहसँग समन्वय गरेर काम अघि बढाउनुपर्ने बताइन् ।
