२१.१२°C काठमाडौं
रामपुर क्याम्पसमा स्ववियु चुनाव धाँधलीपूर्ण भएको भन्दै कांग्रेसको ध्यानाकर्षण
काठमाडौँ — नेपाली कांग्रेसले रामपुर कृषि क्याम्पसमा स्ववियु चुनाव धाँधलीपूर्ण भएको भन्दै ध्यानाकर्षण गराएको छ । चितवनको खैरहनीस्थित रामपुर क्याम्पसमा क्याम्पस प्रमुख र निर्वाचन समितिका संयोजकले अमुक विद्यार्थी संगठनको पक्षपोषण हुने गरी क्याम्पसमा क्रियाशील अन्य विद्यार्थी संगठनसँगको कुनै समन्वय विना मतदानको सूचना प्रकाशित गरी निर्वाचन गराएको भन्दै कांग्रेसले ध्यानाकर्षण भएको जनाएको हो ।
रामपुरमा शुक्रबार मतदान भएको थियो । तर निर्वाचनमा क्याम्पस प्रशासनको मिलेमतोमा अनेरास्ववियु र अखिल क्रान्तिकारीको संयुक्त गठबन्धनले बुथ कब्जा गरेर एकलौटी मतदान गरी निर्वाचनको नतिजा घोषणा गरिएको कांग्रेसको आरोप छ ।
कांग्रेसका अनुसार चुनावमा भएको धाधँलीको विरोध गर्दा प्रहरी लगाएर स्ववियु सभापतिका उम्मेदवार आशिष देवकोटा र निवर्तमान इकाइ अध्यक्ष सुरज यादव घाइते भएका छन् । कांग्रेस मुख्यसचिव कृष्णप्रसाद पौडेलले घटनाको यथार्थ छानबिन गरी अवैधानिकरुपमा गरिएको निर्वाचन रद्द गर्न माग गरेका छन् ।
साथै घाइते विद्यार्थीहरुको उचित उपचारको प्रबन्ध गर्न समेत माग गरेका छन् ।
प्रकाशित : चैत्र १८, २०७९ १२:५३
