पाँचथर — वैदेशिक रोजगारीबाट फर्केका २८ वर्षीय प्रयास केरुङले २५ लाख रुपैयाँ लगानीमा पाँचथरको फालेलुङ गाउँपालिका–३ ताङ्लेपामा लुगा धुने साबुन कारखाना सञ्चालन गरेका छन् ।

पाँच वर्षसम्म मलेसियामा श्रम गरेका उनी छ महिना अघि मात्रै फर्केका थिए । केरुङको कारखानामा तयार भएको साबुन मेमङ, प्राङबुङ, एकतिन र ओयाम लगायतका बजारमा खपत हुने गरेको छ । उनले अहिले दैनिक २ सय वटा साबुन उत्पादन गर्छन् । माग अनुरूप उत्पादन पनि बढाउँदै लैजाने उनको योजना छ ।

केरुङले आफ्नो कारखानालाई ‘फालेलुङ साबुन उद्योग’ नाम दिएका छन् । साबुन उत्पादनका लागि चाहिने कच्चा पदार्थ विराटनगरबाट ल्याउने गरेको उनले बताए । उक्त उद्योगबाट २ सय ५० ग्राम दरका साबुन उत्पादन भइरहेका छन् । प्रतिगोटा ३५ रुपैयाँका दरले साबुन बिक्री भइरहेको केरुङले बताए ।

अन्य कम्पनीमा उत्पादित सोही परिणामका साबुन बजारमा ४५ रुपैयाँमा किनबेच भइरहेको छ । विदेशमा कमाएको रकम उद्योग सञ्चालनका लागि खर्चिएको उनको भनाइ छ । ‘विदेशमा सिकेको सीपबाट उद्योग सञ्चालनमा ल्याएको छु’ केरुङले भने ।

युवालाई उद्यमशील बनाउने उद्देश्यले उद्योग सञ्चालनमा ल्याएको उनले सुनाए । ‘गाउँमै उद्यम गरेर आयआर्जन गर्न र स्थानीयलाई स्वरोजगार बनाउने उद्देश्यले साबुन उद्योगमा लगानी गरेको हुँ,’ उनले भने । आफूले उत्पादन गरेको साबुन बजारीकरणका लागि स्थानीय सरकारसँग केरुङले आग्रह गरेका छन् ।