उपनिर्वाचनका लागि राप्रपाले तोक्यो कमाण्डर

काठमाडौँ — राष्ट्रिय प्रजातन्त्र पार्टीले वैशाख १० गते प्रतिनिधिसभाका तीनवटा क्षेत्रमा हुने उपनिर्वाचनका लागि नेताहरूलाई जिम्मेवारी तोकेको छ । पार्टी कार्यालय धुम्बाराहीमा सोमबार बसेको पदाधिकारी बैठकबाट बारा-२ मा उपाध्यक्ष बुद्धिमान तामाङ, चितवन-२ मा उपाध्यक्ष विक्रम पाण्डे र तनहुँ-१ मा कोषाध्यक्ष नीलकण्ठ काफ्लेलाई निर्वाचन परिचालनको जिम्मेवारी दिइएको हो ।

'आगामी वैशाख १० गते प्रतिनिधिसभाको उपनिर्वाचन हुन गइरहेको तनहुँ-१, चितवन-२ र बारा-२ मा राप्रपाले आफ्नो उमेदवार खडा गर्नेछ,' बैठकपछि प्रवक्ता मोहन श्रेष्ठले भने, 'निर्वाचन परिचालनका लागि वरिष्ठ नेताहरुलाई जिम्मेवारी तोकेको छ ।'

त्यसैगरी राप्रपाले पार्टीको केन्द्रीय कार्यसमिति आगामी बैठक ०८० वैशाख २९ र ३० गते काठमाडौंमा गर्ने निर्णय गरेको छ । यस्तै वैशाखभित्र सातै प्रदेशमा कार्यकर्ता भेला आयोजना गर्ने बताइएको छ ।

२०८० सालभित्र २ लाख व्यक्तिलाई सक्रिय पार्टी सदस्य बनाउने निर्णय गरेको राप्रपाले सदस्यता वितरण अभियानलाई तीव्र पार्ने जनाएको छ ।

त्यसैगरी राजनीतिक लक्ष्य प्राप्ति र जनजीविकासँग सम्बन्धित विषयमा सुरु गर्न लागेको आन्दोलनको स्वरुप निर्धारण गर्ने महामन्त्री धवल शमशेर जबराले बताए ।