देशको आर्थिक अवस्था नाजुक मात्र हैन, संकटपूर्ण छ : पूर्वअर्थमन्त्री पौडेल

शनिबार बुटवलमा आयोजित पश्चिम नेपाल बस व्यवसायी प्रालिको साधारणसभामा पूर्वअर्थमन्त्री पौडेलले मुलुकमा राजश्व संकलनको अवस्था ५० वर्षयताकै निराशाजनक रहेको बताए ।

‘राजश्व संकलन स्वात्तै घटेको छ । अहिलेको राजश्वले साधारण खर्चसमेत धान्न सक्दैन,’ उनले भने । पौडेलले २०२८ सालमा जस्तै यसपटक पनि राजश्व संकलनको अवस्था निराशाजनक अवस्थामा रहेको जनाए ।

एमाले उपाध्यक्षसमेत रहेका पौडेलले यस्तो बेलामा दलहरु पक्षविपक्षमा बाँडिएर सत्ता ढलाउने खेलमा लाग्नु भन्दा देशको आर्थिक अवस्था सुधारमा लाग्नुपर्ने बताए । ‘जिम्मेवार राजनीतिक दलहरु नागरिकलाई साथमा लिएर आर्थिक अवस्था सुधार्न लाग्नुपर्छ,’ उनले भने ।