कांग्रेसले विगतको गल्ती नदोहोर्याएर काम गर्न सक्नुपर्छ : पौडेल
काठमाडौँ — नेपाली कांग्रेसका नेता एवम् प्रतिनिधिसभा सदस्य प्रदीप पौडेलले सरकारमा जान लागेको कांग्रेसले विगतका गल्ती नदोहोर्याइ काम गर्न सक्नुपर्ने बताएका छन् । उनले स्थानीय, प्रदेश र केन्द्र सरकारमा हुने कांग्रेसले जनतालाई नयाँ आभाष दिलाउन सक्नुपर्ने बताए ।
नेपाल ट्रेड युनियन कांग्रेस चितवनले मंगलबार गरेको गिरिजाप्रसाद कोइरालाको १३ औं स्मृतिसभामा बोल्दै नेता पौडेलले अहिलेको गठबन्धन सरकारमा कांग्रेसको उपस्थिति नयाँ ढंगको हुनुपर्ने बताए ।
'गठबन्धनको सरकारमा कांग्रेसको उपस्थिति अन्य दलभन्दा भिन्न हुनु आवश्यक छ । विगतभन्दा सुधारिएको हुनु आवश्यक छ । कांग्रेस अब पाँचै वर्ष सरकारमा हुनसक्छ, तर सरकारमा भइरहने कुराले महत्त्व राख्दैन,' उनले भने, 'पाँच वर्षपछि फेरि निर्वाचन हुन्छ । त्यो निर्वाचनमा जनताको मत जित्ने गरी काम गर्न सक्नुपर्छ । कांग्रेसले विगतका गल्ती सच्याएर अघि बढ्नु आवश्यक छ ।'
उनले अहिले गठबन्धन गरेर चुनाव लडेको र गठबन्धनकै बलमा सरकारमा पुगेको स्मरण गराउँदै पाँच वर्षपछि कांग्रेसले एक्लै निर्वाचनमा जानुपर्ने परिस्थितिको लागि अहिलेदेखि नै तयार रहनुपर्ने बताए । उनले चितवन-२ मा हुने उपनिर्वाचनका लागि उम्मेदवार छान्दा स्थानीय माटोले चिनेको, माया र विश्वास पाएको नेतृत्वलाई अघि सार्नुपर्ने बताए ।
'गठबन्धनको संस्कृति सरकार बनाउने सन्दर्भमा स्वाभाविक हुन सक्छ । तर, निर्वाचनको सन्दर्भमा स्वाभाविक होइन,' उनले भने, 'हामी उपनिर्वाचनमा जाँदै छौँ । यहाँ उम्मेदवार उठाउँदा हामीले वैचारिक क्षमता भएको, यहाँको जमिनलाई चिनेको, जमिनले माया र विश्वास गर्ने, चुनाव कसले जित्छ भन्ने कुरालाई आधार बनाएर उम्मेदवार उठाउनु उपयुक्त हुन्छ ।'
