'यो प्रधानमन्त्रीले दिएको वचन पनि विश्वास गर्न नसकिने देश हो'
काठमाडौँ — एमाले उपाध्यक्ष विष्णु पौडेलले प्रधानमन्त्री पुष्पकमल दाहालको बोली र वचन विश्वासिलो नभएको बताएका छन् । उनले प्रधानमन्त्री दाहालले के कारणले पुस १० गते बालुवाटारबाट निस्किएर बालकोट पुगेर सहमति गरेको र अहिले त्यो सहमति किन तोडेको भन्ने विषयमा जवाफ दिनुपर्ने समेत बताएका छन् ।
निवर्तमान अर्थमन्त्रीसमेत रहेका पौडेलले देशको प्रधामन्त्रीको वचन नै विश्वास गर्न नसकिने अवस्था रहेको बताउँदै संसद् त्यही कारणले महिना दुई महिनामा विश्वासको मत मात्रै माग्ने चक्करमा पर्ने अवस्था देखिएको बताए । उनले प्रधानमन्त्री दाहाललाई पुष २६ गते विश्वासको मत प्राप्त गरेपछि आज पुन: विश्वासको मत लिनुपर्ने अवस्थाको कारक को हो भनेर प्रश्न समेत गरे ।
'यो प्रधानमन्त्रीले दिएको वचन पनि विश्वास गर्न नसकिने देश हो । वचनको विश्वास गर्न नसिकने प्रधानमन्त्री भएपछि यो विश्वासको मत फेरि कति दिन पछि फेरि लिने हो । त्यो मिति पनि अहिले नै प्रधानमन्त्री दाहालले भनिदिए हुन्छ,' उनले भने, 'आफ्नो वचनमा अडिन नसक्ने प्रधानमन्त्रीलाई कसैले पनि विश्वासको मत दिनु हुँदैन ।'
प्रकाशित : चैत्र ६, २०७९ १४:४९