प्रधानमन्त्री दाहालले धोका दिनुभयो : अध्यक्ष लिङ्देन
काठमाडौँ — राप्रपा अध्यक्ष राजेन्द्र लिङ्देनले प्रधानमन्त्री पुष्पकमल दाहालले धोका दिएर बाटो मोडेकोले आफ्नो पार्टीले सरकारलाई दिएको समर्थन फिर्ता लिनुपर्ने अवस्था आएको बताए । प्रधानमन्त्री दाहालले कुनै जानकारी नै नदिई निर्णय गरेकोले आफ्नो पार्टीले उच्च नैतिकता देखाउँदै सरकार छोडेर बाहिरिनुपरेको बताए ।
प्रधानमन्त्री दाहालले संसद्मा दोस्रो पटक विश्वासको मत लिन राखेको प्रस्तावको छलफलमा भाग लिँदै राप्रपा अध्यक्ष लिङ्देनले प्रधानमन्त्री पुष्पकमल दाहाल दुई महिनामा दुईपटक विश्वासको मत प्राप्त गर्ने भाग्यमानी भएपनि फेरि वैशाख महिनामा विश्वासको मत लिने अवस्था नआउला भन्न नसकिने बताए ।
'मलाई धेरै कुरा भन्नु छैन । प्रधानमन्त्री जीलाई अर्को यात्राका लागि शुभकामना छ । तपाईंले बाटो फेरेपछि रात कटाउन पनि गाह्रो भयो,' उनले भने, 'हामीले निश्चित समझदारी गरेर सरकारमा गएका थियौं । विकास, सेवा र सुशासन जस्ता विषयमा सँगै बसेर काम गर्ने भन्ने सहमति गरेका थियौं । तर बीचमै बाटो फेर्नुभयो ।'
उनले प्रधानमन्त्री दाहालले सत्ता गठबन्धनमा कुनै छलफल नै नगरी निर्णय गरेपछि सरकार छोड्नुपर्ने अवस्था आएको बताए । उनले प्रधानमन्त्री दाहालले नै विश्वास तोडेर धोका दिएको बताए ।
'प्रधानमन्त्रीलाई सबै दललाई समेटेर लगौं भन्ने रहर भो । कुनै विषयमा सबैको सहमति चाहिन्छ । तर सबैलाई सबै पद बाँडेर जाने यो व्यवस्थाले परिकल्पना गरेको चिज होइन,' उनले भने, 'बाटो त तपाईंले फेर्नुभयो । त्यसैले हामीले छोड्नुपर्ने अवस्था आयो । धोका हामीले दिएको होइन तपाईंले दिएको हो ।'
प्रकाशित : चैत्र ६, २०७९ १५:२७