मेयर हारेकी ममता झा बनिन् उपराष्ट्रपति उम्मेदवार

जनमत पार्टीका अध्यक्ष चन्द्रकान्त (सीके) राउतले भने आफूहरूलाई १० दलीय गठबन्धनको समेत समर्थन रहेको दाबी गरेका छन् ।

उपराष्ट्रपतिमा उम्मेदवारी दिएकी झा जनमत पार्टीकी सप्तरी जिल्ला इन्चार्ज हुन् । उनी स्थानीय तह निर्वाचनमा राजविराज नगरपालिकाको मेयर पदकी उम्मेदवार थिइन् । मेयर पदको निर्वाचनमा सातौं स्थानमा रहेकी उनले ९२२ मत ल्याएकी थिइन् । मेयरमा निर्वाचित जनता समाजवादी पार्टीका भिमराज यादवले भने ९ हजार ६ सय २४ मत ल्याएका थिए ।

साझा प्रकाशनकी पूर्वअध्यक्ष झा भ्रष्टाचार मुद्दा परेपछि पदबाट राजीनामा दिएकी थिइन् । साझामा भ्रष्टाचार गरेको विषयमा झाले कुनै प्रतिक्रिया दिइनन् । तर, अहिले त्यसबारे कुनै पनि मुद्धा नरहेको उनको भनाइ छ । तपाईंलाई साझाको अध्यक्ष हुँदा भ्रष्टाचारको आरोप छ थियो नि भन्ने सञ्चारकर्मीको प्रश्नमा झाले भनिन्, ‘त्यस्तो केही छैन, कुनै मुद्दा पनि छैन ।’

साझाको अध्यक्ष बनेकी झाविरुद्ध न्यूनतम शैक्षिक योग्यतासमेत नभएका माधवप्रसाद थपलियालाई बदनियतपूर्ण तरिकाले नियुक्ति दिएको भन्दै अख्तियार दुरुपयोग अनुसन्धान आयोगले ३ लाख ६६ हजार जरिवाना र सजाय दाबी गर्दै २०७० बैशाख ५ गते विशेष अदालतमा मुद्दा दायर गरेको थियो । उनले २०७१ जेठ १० मा राजीनामा दिएकी थिइन् ।