राष्ट्रपति निर्वाचनअघि आठदलीय गठबन्धनले शुक्रबार सातै प्रदेशमा भेला गर्ने

राष्ट्रपति चुन्नका लागि २५ फागुनमा मतदान हुँदैछ । राष्ट्रपति निर्वाचनका लागि गठबन्धनले सातै प्रदेशका मतदातासँग छलफल गर्न प्रदेशस्तरीय भेला गर्न लागेको हो । नेताहरूका लागि फागुन १९ गते सातै प्रदेशमा एकैसाथ त्यस्तो भेला आयोजना गरिएको छ भने भेलाका लागि कांग्रेसले सम्बन्धित प्रदेशबाट प्रतिनिधित्व गर्ने पदाधिकारीहरुलाई जिम्मेवारी दिएको छ ।

सभापति शेरबहादुर देउवाले बुधबार विहान पार्टीका पदाधिकारीहरुसँग छलफलपछि सम्बन्धित प्रदेशका पदाधिकारीहरुलाई नै प्रदेशस्तरमा हुने गठबन्धनको भेलामा सहभागी हुन र नेतृत्व गर्न जिम्मेवारी तोकेका हुन् । गठबन्धनको त्यस्तो भेलामा गठबन्धनका नेता कार्यकर्ताहरुलाई प्रशिक्षण दिइनेछ ।

राष्ट्रपति निर्वाचनमा कांग्रेसका पौडेल र एमालेबाट सुवास नेम्वाङको उम्मेदवारी छ भने संघीय संसद्का ३३२ र प्रदेशसभाका ५५० गरी कूल ८८२ मतदाता छन् ।