रास्वपाको बैठक जारी, प्रधानमन्त्रीको नयाँ प्रस्तावमा छलफल

शनिबार दिउँसो प्रधानमन्त्री पुष्पकमल दाहालसँग रास्वपाका सभापति रवि लामिछानेको भेटमा प्रधानमन्त्री दाहालले रास्वपालाई गृह मन्त्रालयको सट्टामा भौतिक पूर्वाधार मन्त्रालय दिने प्रस्ताव गरेपछि सभापति लामिछानेले पार्टीको बैठक डाकेका हुन् । उनीहरूको बैठक अहिले पनि बसुन्धारास्थित पार्टी कार्यालयमा बसिरहेको छ ।

प्रधानमन्त्रीको नयाँ प्रस्तावमाथि रास्वपाको यही बैठकले छलफल गरी एउटा निष्कर्षमा पुग्ने बताइएको छ । रास्वपाले सरकार गठनका बेला भएको सहमति अनुसार गृह मन्त्रालय आफूले पाउनुपर्ने माग गर्दै आएको छ । गृह मन्त्रालय नपाए सरकारबाट बाहिरिने चेतावनी दिएको छ ।

यसअघि बिहीबार बसेको रास्वपाको केन्द्रीय समिति र संसदीय दलको बैठकले आफ्ना माग पूरा गर्न प्रधानमन्त्रीलाई २ दिनको अल्टिमेटम दिएको थियो ।

प्रधानमन्त्री पुष्पकमल दाहालले भने यसअघि राष्ट्रिय स्वतन्त्र पार्टीले अगाडि सार्दै आएका विषयमा सबै पक्षसँग छलफल गर्ने प्रतिक्रिया दिएका थिए ।