माओवादीले संगठन सुदृढीकरण अभियान चलाउने - समाचार - कान्तिपुर समाचार

माओवादीले संगठन सुदृढीकरण अभियान चलाउने 

कान्तिपुर संवाददाता

काठमाडौँ — सरकारको नेतृत्व गरिरहेको नेकपा (माओवादी केन्द्र) ले संगठन सुदृढीकरण अभियान चलाउने भएको छ । पार्टीका केन्द्रीय नेताहरू २ महिना कार्यकर्ता र जनताकहाँ जाने भएका हुन् । 

पार्टीको स्थायी कमिटीको शनिबारको बैठकबाट पार्टी सुदृढीकरण अभियान चलाउने निर्णय लिएको उपाध्यक्ष तथा प्रवक्ता कृष्णबहादुर महराले जानकारी दिए । सबै केन्द्रीय नेताहरू संगठन सुदृढीकरणका लागि जनता र कार्यकर्ताकहाँ गएर आउने अनि केन्द्रीय समितिको बैठकमा त्यसको प्रतिवेदन पेस गर्ने निर्णय भएको उनले बताए ।

'दुई महिनापछि केन्द्रीय समितिको बैठक बस्ने, सम्पूर्ण निर्णय केन्द्रीय समितिले गर्ने भन्ने निर्णय भयो । सबै फिल्डमा जाने र केन्द्रीय समितिको निर्णय गर्ने र त्यसका लागि सबै कमिटी मञ्चको बैठक बस्ने निर्णय भयो । चुनावको समीक्षाको विषयमा ठाउँठाउँमा घात, अन्तर्घात भयो, यसको निमित्त फिल्डको रिपोर्ट बुझ्ने कुरा भएको छ । माघको २६ गतेदेखि ५ गतेभित्रमा हामीले प्रदेश समन्वय समिति इन्चार्जको नेतृत्वमा प्रदेश पदाधिकारीहरूको समन्वय समितिको बैठक बस्ने, र त्यसले स्थानीय तहको फिल्डको जिम्मेवारी लिइ बुझ्ने निर्णय भएको छ । अध्यक्ष प्रधानमन्त्री भइसकेपछि प्रधानमन्त्रीका रुपमा केही निर्देशन र केही वक्तव्यहरू छन्, त्यसलाई तल लैजाने निर्णय गरेका छौँ । हाम्रो पार्टी २६ गतेदेखि फिल्डमा जान्छ,’ उनले भने ।

माओवादी केन्द्रका सचिव देवेन्द्र पौडेलले पार्टी पंक्ति र जनतालाई भेट्ने योजना तय भएको जानकारी दिए । पार्टीको संगठनबारे स्थायी कमिटीमा व्यापक छलफल भएको उनले जानकारी दिए । '२ महिना सबै फिल्डमा जाने, पार्टी पंक्तिबाहेक जनता पनि भेटेर २ महिना पछि त्यसको रिपोर्टसहित केन्द्रिय समितिको बैठक बसेर नयाँ कार्ययोजनासहित अघि बढ्छौँ,' उनले भने । दुई महिना पार्टी कार्यकर्ता र जनताबाट आएपछि केन्द्रीय समिति बैठक बसेर नयाँ कार्ययोजनासहित अगाडि बढ्ने उनको भनाइ छ ।

प्रकाशित : माघ २१, २०७९ १७:१५
प्रतिक्रिया
पठाउनुहोस्

भैरहवाबाट नियमित अन्तर्राष्ट्रिय उडानका लागि कूटनीतिक पहल भएको छ : मन्त्री किराती

'पर्याप्त तयारी गरेर सञ्चालन ल्याइएको थियो कि थिएन भन्ने हिजोको कुरा हो, आज यो सञ्चालनमा छ,' उनले भने, 'अन्य रुटबारे छलफल गर्न उच्चस्तरीय टोली भारत जाँदैछ । प्रधानमन्त्रीको भ्रमणका क्रममा पनि यसलाई एक एजेन्डा बनाइनेछ ।'
कान्तिपुर संवाददाता

काठमाडौँ — संस्कृति, पर्यटन तथा नागरिक उड्डयनमन्त्री सुदन किरातीले गौतम बुद्ध अन्तर्राष्ट्रिय विमानस्थल सञ्चालनका लागि कूटनीतिक पहल सुरु गरिएको बताएका छन् । 

कान्तिपुर मिडिया ग्रुपले शनिबार भैरहवामा आयोजना गरेको लुम्बिनीको सामर्थ्य कार्यक्रमको अन्तिम सत्र पर्यटनको उडानमा सहभागी हुँदै मन्त्री किरातीले विमानस्थल सञ्चालन गर्न उडान अनुमतिका लागि कूटनीतिक पहल भइरहेको बताएका हुन् ।

जेठ २ मा उडान सुरु भएर हाल 'ग्राउन्डेड' को अवस्थामा रहेको गौतम बुद्ध अन्तराष्ट्रिय विमानस्थललाई पुन: सञ्चालनमा ल्याउन सिमराहको रुट अपर्याप्त भएकाले अन्य रुटबारे भारतसँग छलफल गर्न उच्च स्तरीय समिति बनाएको मन्त्री किरातीको भनाइ छ ।

'पर्याप्त तयारी गरेर सञ्चालन ल्याइएको थियो कि थिएन भन्ने हिजोको कुरा हो, आज यो सञ्चालनमा छ,' उनले भने, 'अन्य रुटबारे छलफल गर्न उच्चस्तरीय टोली भारत जाँदैछ । प्रधानमन्त्रीको भ्रमणका क्रममा पनि यसलाई एक एजेन्डा बनाइनेछ ।'

२०७९ जेठमा तत्कालीन प्रधानमन्त्री शेरबहादुर देउवाले विमानस्थल उद्घाटन गरेका थिए । उद्घाटनको ९ महिना बित्दासमेत विमानस्थलमा अन्तर्राष्ट्रिय उडानले गति लिन सकेको छैन ।

भैरहवामा जजीरा एयरलाइन्सले जेठ २ गतेदेखि व्यावसायिक उडान सुरु गरेको थियो । पुसदेखि भने जजिराले मौसमको कारण देखाउँदै उडान स्थगित गरेको छ । त्यस्तै कात्तिकदेखि मलेसियाका लागि चार्टड उडान सुरु गरेको नेपाली वायु सेवा कम्पनी हिमालयन एयरलाइन्सले पनि उडान रोकेको छ ।

जाडो याममा मौसमका कारण भैरहवाको भिजिबिलिटी कम हुनुका साथै यात्रुको संख्या पनि कम भएकाले भैरहवाबाट अन्तर्राष्ट्रिय उडान रोकिएको बताइएको छ ।

प्रकाशित : माघ २१, २०७९ १७:१३
पूरा पढ्नुहोस्
प्रतिक्रिया
पठाउनुहोस्
×