काठमाडौँ — काठमाडौं महानगरपालिकाका प्रमुख बालेन्द्र शाहविरुद्ध माइतीघरमा प्रदर्शन भएको छ । गैरकानुनी रुपमा निजी संरचना भत्काएको, जथाभावी रुपमा डोजर चलाएको लगायत विषय उठाउँदै स्थानीयहरूले आइतबार प्रदर्शन गरेका हुन् ।

गत पुस २८ गते श‌ंखमुलस्थित एक निजी घरमा महानगरले नियम विपरीत डोजर चलाएर पर्खाल भत्काएको थियो । क्षेत्राधिकार मिच्दै महानगरले शंखमुलका सायल सिंहको घरको पर्खाल भत्काएको आन्दोलनका अगुवा सुमन सायमीले बताए ।

महानगरवासीमाथि नै मेयर बालेन्द्र शाहले ज्यादती गरेको उनको गुनासो छ । 'पुस २८ गते निजी घरमा डोजर लगाउन खोजेपछि मैले मेयर बालेन्द्र शाहलाई फोन गरेर गैरकानुनी भएको भनेँ,' सायमीले कान्तिपुरसित भनेँ,'क्षेत्राधिकार नाघ्नु भएको छ है भन्दा बालेन्द्रले एकछिन भनेर १० मिनेटपछि उल्टै नगर प्रहरी पठाएर घरको पर्खाल नै भत्काइदिए ।' उक्त प्रकरणपछि मेयरलाई फोन गर्दा फोन पनि नउठाएको र भेट्न समेत नदिएको सायमीले बताए ।

उनका अनुसार महानगरले कुनै पनि पत्र र सूचना नै बिना घरको कम्पाउन्ड भत्काएको हो । 'कुनै कानुनी आधार बिना महानगरले निर्णयको कपी नै नलिई तानाशाही तरिकाले घरहरु भत्काएको छ,' सायमीले भने ।

उक्त विषयलाई लिएर स्थानीयले महानगरलाई सूचनाको हक सम्बन्धी निवेदन पनि दिएका थिए । तर महानगरले बेवास्ता गरेर संविधान प्रदत्त मौलिक हक पनि खोसेको उनले बताए ।

निजी वाल भत्काउने क्रममा महानगरले घरधनी वृद्धालाई लछारपछार गर्दै मानवअधिकार हनन् गरेको प्रदर्शनमा सहभागीहरुले बताएका छन् ।

आइतबार दिउँसो माइतीघरमा भएको शान्तिपूर्ण प्रदर्शनमा उपत्यकावासी सडक विस्तार पीडित संघर्ष समितिलगायत विभिन्न समूहरूको सहभागिता रहेको छ । मेयर शाहले पूर्वसूचना बिना नै मानिसका घरमा डोजर चलाउने गर्दा यसअघि पनि पटकपटक स्थानीयहरू उनीविरुद्ध प्रदर्शनमा उत्रिएका थिए ।