कान्तिपुर वेबसाईट
AdvertisementAdvertisement
१६.१२°C काठमाडौं
काठमाडौंमा वायुको गुणस्तर: १६०

अध्यागमनको सर्भर ५ घण्टा ठप्प हुँदा हजारौंको यात्रा अस्तव्यस्त

सुरज कुँवर

काठमाडौँ — त्रिभुवन अन्तर्राष्ट्रिय विमानस्थलस्थित अध्यागमन कार्यालयको सर्भरमा समस्या हुँदा शनिबार ११ वायुसेवाका उडान प्रभावित भए । जसले अन्तर्राष्ट्रियतर्फ हजारौंको यात्रा अस्तव्यस्त भयो ।

अध्यागमनको सर्भर ५ घण्टा ठप्प हुँदा हजारौंको यात्रा अस्तव्यस्त

टर्मिनल कार्यालयका अनुसार विमान बंगलादेश, मलेसिया एयरलाइन्स, थाई स्माइल, थाई लायन, फ्लाई दुबईलगायतका यात्रु प्रभावित भएका हुन् । काठमाडौंबाट भारतको बैंग्लोर उड्ने नेपाल वायुसेवा निगम, ढाका उड्नुपर्ने हिमालय एयरलाइन्स, दिल्ली जाने इन्डिगो एयरलाइन्स र एयर इन्डियाको कोलकाता र दिल्ली उडान पनि प्रभावित भए ।

एक विदेशी वायुसेवाका स्टेसन इन्चार्जका अनुसार तीन घण्टाअघि विमानस्थलमा आएर झन्डै दुई घण्टा उड्न नपाएका यात्रुले अध्यागमन कार्यालयविरुद्ध नाराबाजी गरेका थिए । ‘विमानस्थलमा तीन घण्टा अगाडि चेकइन काउन्टरमा पुगेका यात्रु कम्तीमा डेढदेखि दुई घण्टा ढिलो भए,’ विमानस्थलका महाप्रबन्धक प्रेमनाथ ठाकुरले भने, ‘विदेशबाट आएकाहरू अध्यागमनमा क्लियर हुन घण्टौं लाग्यो ।’ शनिबार बेलुकीसम्म विमानस्थलको वातावरण अस्तव्यस्त थियो ।

सर्भर नै बिग्रिएपछि अध्यागमन कार्यालयले विदेश जाने यात्रुको पासपोर्ट तथा विवरण हातले फाइलमा लेख्दै सुरक्षा जाँचतर्फ पठाउनुपरेको थियो भने विदेशबाट फर्केकाहरूको पनि ‘म्यानुअली’ नै विवरण राखेर भिसालगायतका सेवा दिइएको थियो । ‘ढड्डामा लेखेर यात्रुलाई सेवा दिनुले उडान डिले हुने, तेस्रो मुलुक जाने ट्रान्जिट छुट्ने त छँदै छ, कतिपय इन्टरपोललगायतका निकायले सुरक्षा दृष्टिकोणले निगरानी गरेकाहरू उम्किने जोखिम हुन्छ,’ अध्यागमनका अर्का अधिकृतले भने ।

राष्ट्रिय सूचना प्रविधि केन्द्रको सर्भर डाउन भएको अधिकारीले बताएका छन् ।

गौचरनस्थित विमानस्थल अध्यागमन कार्यालयले यात्रुलाई भिसा सेवा दिन प्रस्थान बिन्दुमा राखेका १४ र आगमन बिन्दुमा राखेका २२ वटा कम्प्युटर दिउँसो सवा १२ देखि सवा ४ बजेसम्म र बेलुकी सवा ७ देखि सवा ८ बजेसम्म गरी ५ घण्टा चलेनन् । यी कम्प्युटर नचल्दा अध्यागमन कार्यालयले विमानस्थलको भुइँतलामा रहेका वायुसेवाका चेकइन काउन्टरबाट बोर्डिङ पास लिई विदेश जाँदै गरेका तथा विदेशबाट नेपाल फर्केका यात्रुको राहदानी जाँच्न सकेन । विमानस्थलमा एकै दिन सबैभन्दा धेरै ५ घण्टा सर्भर बिग्रिएको यो पहिलो घटना हो । ‘यसअघि सबैभन्दा धेरै अढाई घण्टा सर्भर बिग्रिएको थियो,’ अध्यागमनका एक अधिकृतले भने, ‘त्यसपछि पनि एक–आधा घण्टा सर्भर बेलाबखत डाउन भइरहन्थ्यो ।’

प्रकाशित : माघ १५, २०७९ ०७:१४
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?