उपप्रधानमन्त्री लामिछानेको मुद्दामा आज सुनुवाइ हुँदै

रासस

काठमाडौँ — सर्वोच्च अदालतको संवैधानिक इजलासमा उपप्रधानमन्त्री एवं गृहमन्त्री रवि लामिछानेको नागरिकतासम्बन्धी मुद्दामा शुक्रबार अन्तिम सुनुवाइ हुँदैछ ।

कामु प्रधानन्यायाधीश हरिकृष्ण कार्की, न्यायाधीश विश्वभरप्रसाद श्रेष्ठ, ईश्वरप्रसाद खतिवडा, डा. आनन्दमोहन भट्टराई र अनिलकुमार सिन्हाको संवैधानिक इजलासमा उक्त मुद्दाको आज सुनुवाइ हुने भएको हो । बुधबार सुनुवाइ नसकिएपछि आजका लागि हेर्दाहेर्दैमा राखिएको थियो । यो विवादको आज अन्तिम सुनुवाइ हो ।

यसअघि गत पुस २२ गते अदालतले माघ ११ गतेका लागि पेसी नगर्ने मुद्दाका रूपमा राख्न लगाएको थियो । उक्त मुद्दामा प्रमाणका आधारमा पक्ष, विपक्ष र सरकारी वकिलको बहसपछि फैसला हुने बताइएको छ ।

अदाललते दिएको यसअघिको आदेशमै २०७५ असार ६ गते अध्यागमन विभागमा पेस गरेको कागजात, सो सम्बन्धमा भएको कारबाहीसम्बन्धी कागजात गृह मन्त्रालय वा अध्यागमन विभाग वा जिल्ला प्रशासन कार्यालय जहाँ छ, सो निकायबाट सात दिनभित्र झिकाउन आदेश दिएको थियो । अदालतको आदेशानुसार सबै कागजात र विवरण अदालतमा पेश भइसकेका बताइएको छ ।

अधिवक्ता रविराज बसौला, युवराज पौडेललगायतले राष्ट्रिय स्वतन्त्र पार्टीका सभापतिसमेत रहेका उपप्रधानमन्त्री लामिछाने प्रतिनिधिसभा सदस्यमा निर्वाचित भएको योग्यताबारे प्रश्न उठाउँदै रिट निवेदन दायर गरेका थिए । नेपाली नागरिकता नलिइ राजनीतिक दल खोलेको, प्रतिनिधिसभा निर्वाचनमा प्रतिस्पर्धा गरी सांसद बनेको उल्लेख गर्दै उपप्रधानमन्त्री लामिछानेको सांसद पद खारेजको माग रिट निवेदनमा गरिएको थियो ।

प्रकाशित : माघ १३, २०७९ १०:४८
प्रतिक्रिया
पठाउनुहोस्

जीर्ण बन्यो जिल्ला अस्पतालको पोस्टमार्टम गृह

महेश केसी

रूकुम पश्चिम — स्वास्थ्य सेवा कार्यालय अन्तर्गतको जिल्ला अस्पताल सल्लेको पोस्टमार्टम गृह जीर्ण हुँदै गएको छ ।

अस्पताल प्रमुख डा. सुशील पोखरेलका अनुसार २०४५ सालमा निर्माण गरिएको हालको पोस्टमार्टम घर जिर्ण भएको छ भने यहाँ आधारभूत सेवा समेत उपलब्ध छैन । 'एउटा शव मात्रै हुँदा पनि हामीलाई पोस्टमार्टम गर्न कठिन हुन्छ,' डा. पोखरेलले भने, 'कुनै दुर्घटना हुँदा धरै शव हुन्छन्, त्यस्तो बेला त बाहिरै पनि काम गर्नुपर्ने बाध्यता आउँछ ।'

अस्पतालको छेउमा सामान्य घरमा हाल शव पोस्टमार्टम गरिरहेको बताउँदै डा. भीमकान्त लामिछानेले शव राख्ने मर्चरी फ्रिज, पोस्टमार्टम टेबल र ट्रली आवश्यक रहेको बताए ।

हाल पोस्टमार्टम गृह रहेको ठाउँमा व्यवस्थित गृह बनाउन सकिने सम्भावनालाई औंल्याउँदै अस्पताल व्यवस्थापन समितिका अध्यक्ष टेकबहादुर कुसारीले भौतिक निर्माणमा सहयोग गर्न सरोकारवालालाई अनुरोध गरेका छन् ।

प्रकाशित : माघ १३, २०७९ १०:४१
पूरा पढ्नुहोस्
प्रतिक्रिया
पठाउनुहोस्
×