तुइन खोलामा पुल बनाउन दैनिक चार घण्टा सडक बन्द- समाचार - कान्तिपुर समाचार
कान्तिपुर वेबसाईट
AdvertisementAdvertisement
नारायणगढ-मुग्लिन खण्ड

तुइन खोलामा पुल बनाउन दैनिक चार घण्टा सडक बन्द

रमेशकुमार पौडेल

चितवन — नारायणगढ मुग्लिन सडक संघीय राजधानी काठमाडौं र पर्यटकीय सहर पोखरालाई देशको पूर्वी र पश्चिम भेगसँग जोड्ने मुख्य राजमार्ग हो । तर पछिल्ला पाँच वर्षयता वर्षायाममा यो सडक पहिरो गएर घण्टौं बन्द हुने गर्दछ । यो पटक हिउँदमा पनि नारायणगढ मुग्लिन सडक दैनिक चार घण्टा बन्द भइरहेको छ । सुरुमा पुस ५ गतेदेखि एक महिनालाई भनेर गरेको बन्द फेरि महिना दिन थपिएको छ । पुल बनाउन यसरी सडक बन्द गर्नु पर्ने बाध्यता आएको हो ।

नारायणगढ मुग्लिन सडक पुरानो सडक भए पनि साँघुरो थियो । ७२ सालमा यो सडकलाई एसियाली मापदण्ड अनुसारको दुई लेनको फराकिलो सडक बनाउन काम सुरु भयो । झण्डै सवा तीन वर्ष लगाएर सडक फराकिलो बनाए पनि पुल पुरानै थिए । ३६ किलो मिटर सडकमा १८ वटा पुल छन् । तीमध्ये तीनवटा पुल दुई वर्षअघि फराकिलो बनाए पनि बाँकी १५ वटा पुल फराकिलो बनाउन ७६ सालको चैत्र १० मा सम्झौता भएको थियो ।

नारायणगढ मुग्लिन सडक, नागढुंगा मुग्लिन सडक (पश्चिम खण्ड) आयोजनाका सूचना अधिकारी रहेकका इन्जिनियर कृष्ण आचार्यका अनुसार पाँचवटा पुल पहाड काटेर निर्माण भइरहेका छन् । मुग्लिन नजिकको चिसेन्जी, तुईन खोला, कालिखोला, तोपे खोला र सिमलतालको पुलको जग राख्न तथा पहुँच मार्ग बनाउन आडको पहाड काट्नु परेको छ ।

सडक आडको अग्लो पहाड काट्दा माथिबाट ढुंगा खसेर तल सडकमा गुडेका गाडीमा लाग्न सक्ने खतरा देखेपछि गाडी रोकेर काम गर्नुपर्ने बाध्यता आएको इन्जिनियर आचार्यले बताए । पहाड काट्नु पर्ने अन्य पुलको काम सकिएको छ । तर चिसेन्जी र तुईन खोलामा धेरै नै काम बाँकी रहेपछि गाडी बन्द गर्ने समय एक महिना थप भएको आचार्यले बताए । यी दुईमध्ये तुईन खोलाको काम झनै गाह्रो छ ।

तुईन खोलाको मुग्लिन तर्फको भागको पहाड ६० मिटर अग्लो थियो । पुलको ११ मिटर फराकिलो मुखका लागि यो पहाड पूर्णरुपमा हटाउनु पर्ने हुन्छ । तर अहिलेसम्म माथिबाट १५ मिटर मात्रै काटेर सकेको आचार्यले जानकारी दिए । गाडी रोकिएका बेलामा सातवटा मेसिनले धमाधम काम गर्दछन् । तर ठाडो भिरमा कडा चट्टान भएका कारण काट्न सजिलो भने छैन । त्यसैले आउँदो फागुन ५ भित्र ४५ मिटर पहाड काटेर सक्न गाह्रै छ ।

आधा पहाड काटेर सके अहिलेको जस्तो दिनमा चार घण्टा गाडी रोकेर काम गर्न नपर्ने आचार्यले बताए । नारायणगढ मुग्लिन सडक, नागढुंगा मुग्लिन सडक (पश्चिम खण्ड) आयोजनाका प्रमुख किरण कार्कीले यो सडक हुँदै दैनिक १५ हजारको हाराहारीमा गाडी ओहर दोहर गर्ने बताए । त्यसैले लामो समय गाडी रोकेर काम गर्न चुनौतीपूर्ण छ । अवस्था हेरेर नियन्त्रित विष्फोट मार्फत पहाड फुटाउन पनि पर्न सक्ने कार्कीले बताए ।


प्रकाशित : माघ ११, २०७९ १४:२०
प्रतिक्रिया
पठाउनुहोस्

झाडापखालाबाट चारमहिने सुत्केरीको मृत्यु

विप्लव महर्जन

सल्यान — सल्यानमा झाडापखालाबाट चारमहिने सुत्केरीको मृत्यु भएको छ । जिल्लाको बन्गाड कुपिण्डे नगरपालिका ११ रैकर बस्ने २२ वर्षीया अमृता विकको मृत्यु भएको हो । 

सोमबार बिहान ४ बजेदेखि पखाला लागेपछि स्थानीय मेडिकलबाट मेट्रो नामक औषधि किनेर सेवन गरेको तर औषधि ठिक नभई थप समस्या देखिएपछि उपचारका लागि सुर्खेतको मेहलकुना अस्पताल लैजाँदै गर्दा बाटैमा विकको मृत्यु भएको मृतक महिलाको काका ससुरा तुलसी विकले बताए । पहिला सामान्य जस्तो लागेकाले मेडिकलको औषधिको भर पर्दा समयमै अस्पताल पुर्‍याउन नसकेको उनले जानकारी दिए ।

झाडापखाला कसरी लाग्यो भन्नेबारे केही थाहा नभएको उनले उनले जानकारी गराए । ‘रैकरदेखि मेहलकुनाको अस्पताल जम्मा २०/२५ मिनेटको दूरीमा मात्र थियो । झाडापखाला लागेपछि औषधि सेवन गर्दा ठिक होला भन्ने लाग्यो‚’ उनले भने‚ ‘समस्या झनै बढ्यो । अस्पताल पनि समयमै लगिएको थियो तर बुहारीलाई बचाउन सकिएन । अस्पताल पुग्नेबित्तिकै डाक्टरले मृत घोषण गरिदिए ।’

मृतकका श्रीमान् राजकुमार विक अहिले वैदेशिक रोजगारीका लागि खाडीमुलुक दुबई गएका र घरमा बच्चालगायत अन्य कसैलाई पनि पखालाको समस्या भने नदेखिएको उनको भनाइ छ ।

चिसोका कारण महिलालाई झाडापखालाको समस्या देखिएको र औषधिको मात्र भर पर्दा शरीरमा पानी सकिएपछि डिहाइड्रेसनको समस्या देखिएका कारण मृत्यु भएको अस्पताल स्रोतबाट बुझिएको बन्गाड कुपिण्डे नगरपालिकाका स्वास्थ्य शाखा तथा स्वास्थ्यकर्मी प्रमुख वासुदेव पोखरेलले बताए ।

प्रकाशित : माघ ११, २०७९ १४:१४
पूरा पढ्नुहोस्
प्रतिक्रिया
पठाउनुहोस्
×