भारत नेपालको मुख्य विकास साझेदार : उपप्रधानमन्त्री श्रेष्ठ
काठमाडौँ — उपप्रधान तथा भौतिक पूर्वाधार तथा यातायातमन्त्री नारायणकाजी श्रेष्ठले भारत नेपालको मुख्य विकासको साझेदारको रुपमा रहेको बताएका छन् ।भारतीय दूतावासले सेन्टर फर साउथ एसियन स्टडिजको साथमा आयोजना गरेको ‘भारत–नेपाल डेभलपमेन्ट पार्टनरसिप कन्क्लेभ’ को उद्घाटन समारोहमा उपप्रधानमन्त्री श्रेष्ठले नेपाल र भारतबीच गहिरो र घनिष्ठ सम्बन्ध रहँदै आएको बताएका हुन् ।
साथै, उनले भारतले नेपालको पहिलो विमानस्थलका रूपमा सन् १९५४ मा गौचरण विमानस्थल (हाल त्रिभुवन अन्तर्राष्ट्रिय विमानस्थल) र सन् १९५६ मा त्रिभुवन राजपथ बनाएको कुरा पनि उल्लेख गरे । उपप्रधानमन्त्री श्रेष्ठले भारतले नेपालमा विभिन्न समयमा गरेको सहयोगको प्रशंसा गरे । उनले सन् २०१५ सालको भूकम्पमा भारतले खेलेको भूमिका र कोभिड–१९ का दौरान भारतले उपलब्ध गराएका स्वास्थ्य सामग्री र खोपको पनि खुलेर प्रशंसा गरे ।
कार्यक्रममा बोल्दै नेपालका लागि भारतीय राजदूत नवीन श्रीवास्तवले नेपाललाई अतिकम विकसित मुलुकबाट माथि लानका लागि आवश्यक विकास सहयोगमा भारतले मद्धत गर्ने बताए । ‘नेपालले सन् २०२० मा अतिकम विकसित मुलुकबाट माथि उक्लने भनेको छ । त्यसको लागि भारतले नेपाललाई विकास साझेदारको रुपमा सहकार्य गर्छ,’ उनले भने । राजदूत श्रीवास्तवले भारतबाट नेपालमा ल्याइएको पेट्रोलियम पाइप लाइन दक्षिण एसियाकै पहिलो भएको उल्लेख गरे ।
मुख्य–सचिव शंकरदास बैरागीले विकासका पूर्वाधार निर्माण गर्दा तीन मुख्य पक्षलाई ध्यान दिनुपर्ने बताए । उनले पहिलो पक्ष आवश्यकतालाई आधार मान्नु पर्ने बताए । ‘के आवश्यक छ, त्यो नै निर्माण गर्नु पर्छ,’ उनले भने,‘दोस्रो पक्ष भनेको परियोजना तोकिएको समय र तोकिएकै बजेटमा पूरा गर्नु पर्ने ग्यारेन्टी गरिनुपर्ने हुन्छ ।’ मुख्य सचिव बैरागी तेस्रो पक्ष चाहिँ निर्माण भएका परियोजनाले पछि काममा आउँदा त्यसले निर्माणको लागत उठ्छ वा उठ्दैन भन्नेमा ध्यान दिनु पर्ने बताए ।
प्रकाशित : माघ ९, २०७९ १९:३८