१२.१२°C काठमाडौं
काठमाडौंमा वायुको गुणस्तर: १६३

अपांगता भएकी युवतीलाई गर्भ फाल्न दबाब

भरत जर्घामगर

सिरहा — सिरहा सुखीपुर नगरपालिका–३ कुसहाकी शारीरिक अपांगता भएकी ३५ वर्षीया युवती सधैंजसो बाख्रा चराउन जान्थिन् । वान्ता गर्ने र पेट बढ्न थालेपछि आमाले मंसिर २७ मा छोरीको पेटमा गर्भ रहेको शंका गरिन् । २९ गते छरछिमेकसँग हारगुहार गरेर भेला डाकिन् । ‘हामी गरिबले भनेको कुरा मानेनन्, छिमेकीहरू पन्छिए,’ उनले भनिन्, ‘गाउँलेले कुनै सुनुवाइ नगरेपछि पुस १ गते इलाका प्रहरी कार्यालय लक्ष्मीपुर पतारीमा जाहेरी दर्ता गर्‍यौं ।’ 

प्रहरीले प्रादेशिक अस्पताल सिरहामा पुस ४ गते युवतीको स्वास्थ्य जाँच गराएको थियो । रिपोर्टमा ५ महिनाको गर्भ रहेको पुष्टि भएको इलाका प्रहरी कार्यालय लक्ष्मीपुर पतारीले जनाएको छ । राम्ररी बोल्नसमेत नसक्ने युवतीमाथि बाख्रा चराउन गएका बेला साउन २८ गते छिमेकी चन्दनकुमार यादवले बलात्कार गरेको गरेको पीडित परिवारको भनाइ छ । त्यसपछि पटक–पटक उनीमाथि बलात्कार हुँदै आएको उनीहरूले दाबी गरेका छन् ।

उनीहरू साढे ४ धुर जग्गामा बसोबास गर्छन् । पीडित युवतीका बुबा मजदुरीबाट गुजारा चलाउँछन् । पाँच छोरीमध्ये चार छोरी विवाह गरेर घरजम चलाउँछन् । विवाहित दुई छोरा भिन्न भएकाले परिवारमा बाबुआमा र छोरी मात्रै छन् ।

छोरी गर्भवती भएको थाहा पाएपछि परिवारमा बज्रपात परेको छ । न्यायका लागि छिमेकी र प्रहरीमा भौतारिएका उनीहरूमाथि चन्दनको परिवारले गर्भ फाल्न दबाब दिने गरेको छ । गालीगलौज गर्न थालेपछि आफूहरू असुरक्षित भएको आमाले सुनाइन् । ‘छोरीको गर्भ नफाले जे पनि गर्छौं भनेर डर देखाउँछन्,’ दुःखेसो गर्दै भनिन्, ‘घरमा नयाँ मान्छे आउँदासमेत डर लाग्छ ।’ पीडित परिवारले ज्यान रक्षाको गुहार मागेका छन् । सञ्चारकर्मी र अधिकारकर्मीको टोली बस्ती पुग्दा घटनाबारे कसैले बोल्न मानेनन् । घटनापछि फरार चन्दनको खोजी भइरहेको प्रहरी निरीक्षक केशवकुमार कटुवालले बताए ।

चन्दनका बुबाले घटनाबारे आफूलाई थाहा नभएको प्रतिक्रिया दिए । छोरा पुसदेखि नै घरमा नरहेको उनको दाबी छ । ‘सुखीपुरमा कक्षा ९ मा पढ्दै थियो,’ उनले भने, ‘घटनाको हल्ला भएदेखि छोरा घरमा नआएकाले म केही भन्न सक्दिनँ ।’ इन्सेक प्रतिनिधि एवं अधिकारकर्मी दुर्गा परियारले पीडित पक्ष त्रासमा रहेकाले युवती र उनको परिवारको सुरक्षा गरी न्याय दिलाउन माग गरे ।

प्रकाशित : माघ ६, २०७९ ०६:५५
प्रतिक्रिया
पठाउनुहोस्
जनताको राय

नेपालको पासपोर्ट फेरि पनि विश्व वरीयतामा १०३ औं स्थानमा परेर खराब सूचिमै दर्ज भयो । स्तर उकास्न मुख्य रुपमा के गर्नुपर्छ ?