१६.१२°C काठमाडौं
काठमाडौंमा वायुको गुणस्तर: १५२

फरार सांसद कोइरी निर्बाध संसद्‍मा

प्रहरी भन्छ : संसद् भवनमा खटिएका प्रहरीले चिन्नै सकेनन्
मकर श्रेष्ठ

काठमाडौँ — सुरक्षाकर्मीको हत्या आरोपमा फरार रहेका सांसद लक्ष्मी महतो कोइरी निर्बाध संसद् आउजाउ गर्दा पनि पक्राउ परेका छैनन् । प्रहरीको फरार सूचीमा रहेकै बेला महोत्तरी–१ बाट निर्वाचित कोइरीले पुस ७ मा प्रतिनिधिसभा सदस्यको शपथ लिएका थिए । उनले पुस २६ मा संघीय संसद्‍मा गएर प्रधानमन्त्री पुष्पकमल दाहाललाई विश्वासको मत दिएका थिए ।

फरार सांसद कोइरी निर्बाध संसद्‍मा

कोइरी मधेस आन्दोलनका बेला सशस्त्र प्रहरीका सहायक निरीक्षक थमन विकको हत्यासम्बन्धी मुद्दामा उच्च अदालतबाट थुनामा राख्न आदेश सुनाइएका व्यक्ति हुन् ।

२०७२ भदौ २५ मा आन्दोलनकारीको कुटाइबाट गम्भीर घाइते भएका विकलाई उपचारका लागि जनकपुर लैजाने क्रममा एम्बुलेन्सबाट थुतेर हत्या गरिएको थियो । उक्त घटनामा मुद्दा चलेपछि जिल्ला अदालत महोत्तरीले ०७६ असोज २ मा कोइरीलाई १ लाख रुपैयाँ धरौटीमा छाड्ने आदेश दिएको थियो । जनकपुर उच्च अदालतले ०७७ मंसिर १९ मा जिल्लाको आदेश उल्ट्याएर कोइरीलाई थुनामै राखेर मुद्दा अघि बढाउन आदेश दियो । त्यसयता उनी फरारको सूचीमा छन् ।

प्रतिनिधिसभा सदस्यको शपथग्रहणकै दिन प्रहरी प्रधान कार्यालयले संसद् सचिवालयलाई पत्र लेखेर फरारको सूचीमा रहेका कोइरीलाई संसद्को कामकारबाहीमा संलग्न नगराई सहयोग गरिदिन आग्रह गरेको थियो ।

प्रहरीको पत्रपछि पनि कोइरी प्रधानमन्त्रीलाई विश्वासको मत दिन बैठकमा सहभागी भएका थिए । संसद् भवनको बाहिर र गेटमा नेपाल प्रहरी नै खटिएका हुन्छन् । संसद् भवनभित्र मर्यादापालक पनि प्रहरी नै हुन्छन् । सचिवालयको काम विवादमा परेका सांसदलाई पक्राउ गर्न सघाउने निकाय नभएको सचिवालयका एक उच्च अधिकारीले बताए ।‘प्रहरीले सचिवालयलाई पत्र लेखेर आफू पन्छिने काम गरेको हामीले बुझेका छौं,’ ती अधिकारीले भने ।

कोइरीले प्रधानमन्त्रीलाई विश्वासको मत दिएको समाचार आएपछि उपप्रधान तथा गृहमन्त्री रवि लामिछानेले फरार सांसद कोइरीलाई पक्राउ गर्न प्रहरी महानिरीक्षकलाई निर्देशन दिइसकेको बताएका थिए ।

नेपाल प्रहरीका प्रवक्ता टेकप्रसाद राईले संसद् भवनमा खटिएका प्रहरीले नचिनेकै कारण कोइरीलाई पक्राउ गर्न नसकेको हुन सक्ने बताए । ‘मातहतको इकाइलाई पक्राउ गर्न निर्देशन भइसकेको छ,’ उनले भने, ‘अदालतको आदेश कार्यान्वयन हुन्छ ।’

प्रतिनिधिसभा सदस्यका रूपमा शपथ लिन र प्रधानमन्त्रीलाई विश्वासको मत दिन संसद्‍मा उपस्थित भएका कोइरी बिहीबार सभामुखको निर्वाचनमा भने जान्छन्/जाँदैनन् यकिन छैन ।

प्रकाशित : माघ ५, २०७९ ०८:३४
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?