कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: १६१

राष्ट्रपति भण्डारीद्वारा धरानका शक्तिपीठमा पूजाअर्चना

धरानका मेयर साम्पाङ अनुपस्थित

सुनसरी — राष्ट्रपति विद्यादेवी भण्डारीले आइतबार दिउँसो धरानको विजयपुरस्थित शक्तिपीठ दन्तकाली मन्दिर, पिण्डेश्वर मन्दिर र बुढासुब्बा मन्दिरमा पूजाअर्चना गरेकी छन् ।

राष्ट्रपति भण्डारीद्वारा धरानका शक्तिपीठमा पूजाअर्चना

राष्ट्रपति भण्डारीले माघ १ गते मकर संक्रान्ति मेलाको अवसर पारेर बराहक्षेत्र-१ स्थित कोका कौशिकीको संगमस्थलमा लाग्ने धार्मिक मेला अवलोकन र बराहक्षेत्र मन्दिरमा विशेष पूजाअर्चना गरेर हेलिकप्टरमा आएकी थिइन् ।

धरान–१३ स्थित नेपाली सैनिक क्याम्पमा दिउँसो २ बजे ओर्लिएर राष्ट्रपति भण्डारी हात्तीसारको सडक हुँदै विजयपुर परिसरमा रहेका दन्तकाली, पिण्डेश्वर र बुढासुब्बा मन्दिर पुगेकी थिइन् । उनले दन्तकाली मन्दिरमा करिब २० मिनेट विशेष पूजाअर्चना गरेकी थिइन् भने पिण्डेश्वर मन्दिरको गर्भगृहमा प्रवेश गरेर शिवलिङको पूजा गरेकी थिइन् ।

उक्त अवसरमा राष्ट्रपति भण्डारीलाई धरानकी पूर्वउपमेयर मञ्जु भण्डारी, धरान-१४ का वडाध्यक्ष कृष्णप्रसाद भट्टराई तथा वडाध्यक्षहरू, भयवाद अध्ययन केन्द्र नेपालका अध्यक्ष रहेका प्राडा टंकप्रसाद न्यौपाने लगायतले स्वागत सम्मान गरेका थिए ।

राष्ट्रपति भण्डारी प्राडा न्यौपानेका पूर्वविद्यार्थी भएकाले आफूले पढाएको छात्रा उच्च तहमा पुगेकाले सम्मान गरेको प्रा डा न्यौपानेले बताए । राष्ट्रपति भण्डारीलाई प्रदेश १ का मुख्यमन्त्री हिक्मत कार्की, बराहक्षेत्र नगरपालिका प्रमुख रमेश कार्की, जिल्ला प्रशासन कार्यालय सुनसरीका प्रमुखलगायत स्थानीय समाजसेवी अगुवाहरू तथा जनप्रतिनिधिहरूले फूलमालाले स्वागत गरेका थिए ।

राष्ट्रपतिको आगमन हुँदा धरानका प्रमुख हर्कराज साम्पाङ र उपप्रमुख अइन्द्रविक्रम बेघा भने अनुपस्थित थिए । राष्ट्रपतिको स्वागतमा नगएको बारे प्रमुख साम्पाङले उनको आधिकारिक फेसबुक पेज हर्क साम्पाङ अ रिभुल्युसन पेजमा भनेका छन्, ‘धेरै जाम हुन्छ भनेर म नगाको के ।’

प्रकाशित : माघ १, २०७९ १८:१८
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?