प्रधानमन्त्री पोखरा जाने कार्यक्रम रद्द
काठमाडौँ — यति एयरलाइन्सको विमान दुर्घटनाबारे जानकारी लिन पोखरा जाने प्रधानमन्त्री पुष्पकमल दाहालको कार्यक्रम रद्द गरिएको छ । सुरक्षा निकायको सुझाव अनुसार प्रधानमन्त्री दाहाल पोखरा जाने कार्यक्रम रद्द गरिएको उनका स्वकीय सचिव रमेश मल्लले जानकारी दिएका छन् ।
मन्त्रिपरिषद्को बैठक लगत्तै प्रधानमन्त्री यति एयरलाइन्सको विमान दुर्घटनास्थल पोखरा जाने र त्यहाँको अवस्थाबारे जानकारी लिने कार्यक्रम तय भएको उपप्रधानमन्त्री तथा अर्थमन्त्री विष्णु पौडेलले जानकारी दिएका थिए ।
'भीआइपी पोखरा जाँदा उद्धारमा समस्या आउन सक्ने भएकाले सुरक्षा निकायको सुझाव अनुसार प्रधानमन्त्री पोखरा नजानु हुने भएको हो,' मल्लले भने ।
प्रधानमन्त्रीसँगै उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठ र उपप्रधानमन्त्री तथा गृहमन्त्री पोखरा जाने तय भएको थियो ।
विमान दुर्घटनाको केही समयमै प्रधानमन्त्री दाहाल त्रिभुवन अन्तर्राष्ट्रिय विमानस्थलमा स्थापना गरिएको रेस्क्यु कोअर्डिनेसन केन्द्रमा पुगेर उद्धार कार्यको जानकारी लिएका थिए ।
प्रकाशित : माघ १, २०७९ १५:०३
