प्रधानमन्त्री दाहाल र जर्मन राजदूत प्रिन्सबीच भेटवार्ता
काठमाडौँ — प्रधानमन्त्री पुष्पकमल दाहाल र नेपालका लागि जर्मन राजदूत थोमस प्रिन्सबीच भेटवार्ता भएको छ । राजदूत प्रिन्सले बिहीबार दिउँसो प्रधानमन्त्री तथा मन्त्रिपरिषद्को कार्यालय सिंहदरबारमा पुगी प्रधानमन्त्रीसँग भेट गरेका हुन् ।
भेटमा प्रधानमन्त्रीले जर्मनीको सहयोगमा सञ्चालित आयोजनाहरूले देशको विकास र समृद्धिमा महत्त्वपूर्ण योगदान पुर्याएको बताए । उनले सामाजिक न्याय, सुशासन र समृद्धि आफ्नो सरकारको प्राथमिकता रहेको बताउँदै विगतझैं अन्तर्राष्ट्रिय समुदायको पूर्ण सहयोग रहने विश्वाससमेत व्यक्त गरे ।
प्रधानमन्त्री दाहालले नेपाल असंलग्न परराष्ट्र नीतिमा दृढ रहेको र अन्तर्राष्ट्रिय समुदायसँग समान कुटनीतिक सम्बन्ध रहने बताउँदै यसलाई आफूले ‘प्रो-नेपाल पोलिसी’ को नाम दिएको बताए ।
भेटमा राजदूत प्रिन्सले संसद्बाट झन्डै शतप्रतिशत विश्वासको मत प्राप्त गरेकोमा प्रधानमन्त्रीलाई बधाई दिएका थिए । उनले नेपालको पूर्वाधार‚ विकास र समृद्धिका क्षेत्रमा जर्मनीको पूर्ण सहयोग रहने बताए ।
प्रकाशित : पुस २८, २०७९ १४:५९
