‘भ्वाइस अफ ग्लोबल साउथ समिट’ मा सहभागी हुन नेपाललाई भारतको निम्तो

विदेश सचिव विनयमोहन क्वात्राले गत शुक्रबार पत्रकार सम्मेलन गर्दै भारतले यही पुस २८ र २९ मा नयाँ र युनिक पहलमा ‘विशेष भर्चुअल शिखर सम्मेलन गर्न लागेको जानकारी दिएका थिए ।

उक्त सम्मेलनमा सहभागी हुनको लागि भारतले नेपाललाई पत्राचार गरेको थियो । सोही पत्राचार अनुसार नेपालबाट उपप्रधान तथा अर्थमन्त्री विष्णु पौडेलले सम्बोधन गर्ने तय भएको परराष्ट्र र अर्थ मन्त्रालय स्रोतले बतायो ।

उक्त ‘भ्वाइस अफ ग्लोबल साउथ समिट’ को विषयवस्तु ‘युनिटी अफ भ्वाइस, युनिटी अफ पर्पोज’ रहेको छ । उक्त विषयमा ग्लोबल साउथका मुलुकहरुलाई साझा मञ्चमा आफ्ना दृष्टिकोण र प्राथमिकताहरु साझा गर्न एक साथ ल्याउने परिकल्पना स्वरुप समिट आयोजना गरिएको सचिव क्वात्राले बताएका थिए ।

क्वात्रा अनुसार यस शिखर सम्मेलनमा सहभागी हुन १२० भन्दा बढी देशलाई आमन्त्रित गरिएको छ । भारतको विदेश मन्त्रालयद्वारा जारी विज्ञप्ति अनुसार उक्त समिटको पहल प्रधानमन्त्री नरेन्द्र मोदीको ‘सबका साथ, सबका विकास, सबका विश्वास र सबका प्रयास’ को दृष्टिकोणबाट प्रेरित भएको हो ।

भारतले भ्वाइस अफ ग्लोबल साउथ समिट छलफलमा साझेदार देशहरूबाट उत्पन्न विषयहरुको बारेमा गर्ने जनाएको छ । समिटमा दस सत्र हुने छन् । पुस २८ मा चार सत्र र २९ मा छवटा सत्र हुनेछन् । प्रत्येक सत्रमा १० देखि २० देशका नेता/मन्त्रीहरूको सहभागिता हुने अपेक्षा गरिएको छ ।

नेपालका उपप्रधान तथा अर्थमन्त्री पौडेलले भने २८ गते सम्बोधन गर्ने कार्यक्रम रहेको छ । त्यसको लागि अर्थ मन्त्रालयले भिडियो रेकर्डको तयारी गरिरहेको छ । पौडेलले करिब ५ मिनेट लामो सम्बोधन गर्ने कार्यक्रम रहेको छ । नयाँ दिल्लीबाट आएको निम्तोलाई परराष्ट्र मन्त्रालयले अर्थ मन्त्रालयलाई पठाएको थियो । त्यहि अनुसार अर्थ मन्त्रालयले तयारी गरिरहेको छ ।

त्यस बाहेक जी–२० को अध्यक्षता सम्हालेको भारतले जी–२० प्रक्रियामा आबद्ध नभएका राष्ट्रहरुलाई जी–२० मार्फत उनीहरुका विचार र अपेक्षा साटासाट गर्न एक विशेष र बलियो अवसर प्रदान गर्ने भारतको विदेश मन्त्रालयले जनाएको छ ।

‘यो जी–२० का सदस्यहरुसँग मात्र परामर्श नगरी ग्लोबल साउथका अन्य राष्ट्रहरुका आवाजलाई पनि उत्तिकै महत्त्व दिँदै भारतको जी–२० अध्यक्षतालाई पूर्णता दिने प्रधानमन्त्री नरेन्द्र मोदीको भनाई अनुरुप रहेको छ,’ विदेश मन्त्रालले जनाएको छ ।