जलपन्छीको गणना सुरु
नवलपरासी पूर्व — नेपालमा आजदेखि जलपन्छी गणना सुरु भएको छ । पानीमा बस्ने चराको संख्या र अवस्थिति पत्ता लगाउन गणना सुरु गरिएको हो ।
सीमसार क्षेत्र अन्तर्राष्ट्रिय संस्थाका नेपाल प्रतिनिधि डा. हेमसागर बरालका अनुसार नेपालका १६ जिल्लाका प्रमुख १५ वटा नदी र ३ हजार ३५ वटा तालतलैयामा रहेका चरा गणना गरिने भएको हो । गणनामा नेपालमा ३ सयभन्दा बढी स्वयंसेवक परिचालन गरिने छ ।
बरालका अनुसार दुई हप्तासम्म हुने गणनामा मोरङ, सुनसरी, धनुषा, मकवानपुर, काठमाडौं, भक्तपुर, चितवन, पूर्वी नवलपरासी, कास्की, रुपन्देही, कपिलवस्तु, दाङ, बर्दिया कैलाली, कञ्चनपुरलगायतका १६ जिल्लाका तालतलैया र खोला नालामा केन्द्रित रहेर जलपन्छीको गणना गरिने भएको हो । खास गरेर अन्तर्राष्ट्रिय महत्त्वका सीमसार क्षेत्रलाई प्राथामिकता दिएर गणना गरिने भएको हो । कोसी, बीसहजारी ताल, कैलालीको घोडाघोडी ताल, कपिलवस्तुको जगदीशपुर ताल र कास्कीका तालरूलाई प्राथामिकता दिइने छ ।
पन्छीविद् बराल गणनाको क्षेत्र विस्तार हुँदै गए पनि चराको संख्या बर्सेनि घट्दै जानु चिन्ताको विषय भएको बताउँछन् । नेपालमा पछिल्लो तथ्यांकअनुसार ८ सय ८९ प्रजातिका चरा बस्छन् जसमध्ये करिब २ सय चरा पानीमा आश्रित छन् । चितवनमा मात्र ६ सय ५२ प्रजातिका चरा रहेको तथ्यांक छ ।
संरक्षणकर्मी डीबी चौधरीको नेतृत्वमा ३० जना गणक पूर्वी नवलपरासीमा हुने चरा गणनामा सहभागी हुनेछन् । नेपालमा साइबेरिया, थाइल्यान्ड, तिब्बतलगायतका ठाउँबाट समेत चराहरू आउने गरेका छन् ।