कान्तिपुर वेबसाईट
AdvertisementAdvertisement
२५.१२°C काठमाडौं
काठमाडौंमा वायुको गुणस्तर: १३४

साढे दुई करोड अवैध भारु कारोबारमा पनि मुछिएका थिए पृथ्वी शाह

मातृका दाहाल

काठमाडौँ — नेपालमा कम्पनी खडा गरेर अमेरिकाबाट शंकास्पद रकम भित्र्याएका अछामका पृथ्वी शाहलाई प्रहरीको केन्द्रीय अनुसन्धान ब्युरो (सीआईबी)ले पक्राउ गरेसँगै विगतमा उनले गरेका आपराधिक गतिविधि पनि सतहमा आएका छन् ।

साढे दुई करोड अवैध भारु कारोबारमा पनि मुछिएका थिए पृथ्वी शाह

शाहसहित उनका साझेदार र सहयोगी अछाम बन्निगढी गाउँपालिका–६ घर भई हाल काठमाडौंको चाबहिल बस्ने विजयविक्रम शाह, जाजरकोटका चक्रबहादुर खत्री, दोलखाका अनुप खड्का, पश्चिम नवरपराससीका रुक्मांगत काफ्ले र अछामका रंगबहादुर साउद पक्राउ परेका छन् । पक्राउ परेका ६ जनालाई सीआईबीले शुक्रबार अदालतबाट ६ दिनको म्याद लिइसकेको छ । ब्युरो प्रमुख एआईजी उत्तमराज सुवेदीले उनीमाथि विदेशबाट शंकास्पदरुपमा रकम भित्र्याएको कसुरमा अनुसन्धान सुरु भएको बताए ।

शाहमाथी शंकास्पद रुपमा विदेशी मुद्रा भित्र्याएको कसुरमात्र होइन, भारतीय नोटको गैरकानुनी कारोबारको कसुरमा साढे ४ वर्षअघि नै उनी समातिएका थिए । तर, शक्ति केन्द्रको दबाबमा उनी छुटेका थिए । त्यसपछि पनि शाह गैरकानुनी धन्दामा निरन्तर लागिरहेको पछिल्लो पटक विदशेबाट आएको शंकास्पद कारोबारबाट खुलेको छ ।

कहिले भारु र कहिले डलरको शंकास्पद कारोबारमा मुछिएका शाहलाई परिचालन गर्ने शक्तिकेन्द्र अरु नै भएको स्रोतहरु बताउँछन् । शाहले अमेरिकाबाट शंकास्पदरुपमा ल्याएको रकम छुटाउन निवर्तमान अर्थमन्त्री जनार्दन शर्मा स्वयं लागि परेका थिए । उनले शाहका नाममा आएको रकम छुटाउन नेपाल राष्ट्र बैंकलाई निर्देशन दिए पनि राष्ट्र बैंकले मानेको थिएन ।

पछिल्लो पटक राष्ट्र बैंकको समेत पत्रका आधारमा अनुसन्धान अघि बढाएको सीआईबीले मुख्य आरोपित शाह र अन्य ५ जनालाई पक्राउ गरी मुद्दा चलाएको छ । नेपालमा संगठित गिरोह बनाई प्रतिबन्धित भारु भित्र्याएको आरोपमा सीआईबीले २ जेठ २०७४ मा १५ जनालाई पक्राउ गरेको थियो । त्यस घटनामा प्रतिबन्धित ५०० र १००० का नोट ल्याई काठमाडौंका विभिन्न स्थानमा कारोबार भइरहेको सूचना आएपछि गौरीघाटस्थित एक घरमा खानतलासी गर्दा दुई वटा झोलामा ९८ लाख भारतीय रुपैयाँ बरामद भएको थियो ।

सीआईबीले त्यस बेला पठाएको मुचुल्कामा भनिएको छ, ‘अर्को दिन ३ जेठमा तिलगंगामा रहेको होटल पाँचथर अगाडि कारमा ३ वटा झोलामा १ करोड १८ लाख ६१ हजार फेला परेको हो ।’ यो प्रकरणमा नगदसहित ३ कार र १२ वटा मोबाइल सेट बरामद भएका थियो ।

त्यस बेला ३ गाडीसहित २ करोड १६ लाख ६१ हजार भारु सीआईबीले राजस्व अनुसन्धान विभागलाई बुझाएको थियो । साथमा अछामका पृथ्वीबहादुर शाहसहितका व्यक्ति पक्राउ परेका थिए । तर, पछि शक्तिको बलमा कमजोर फाइल बनाई अभियुक्तहरूलाई उन्मुक्ति दिइएको थियो । शाहले अमेरिकाबाट भित्र्याएको शंकास्पद रकम राष्ट्र बैंकले रोकेपछि एक सार्वजनिक कार्यक्रममै तत्कालीन अर्थमन्त्री शमाले भनेका थिए, ‘राज्य, सरकार, मन्त्री भएपछि मलाई मर्का पर्‍यो, मलाई अन्याय भयो भन्दै मानिस आउँछन्, अन्याय पर्‍यो भने बोली दिने काम हाम्रो होइन ?’ शाहले काठमाडौंमा रेमिट, ट्राभल, टायल तथा मार्बलको कारोबार गर्न कम्पनी खोलेको बताएका थिए । तर, उनको कारोबार यति ठूलो मात्रामा नभएको राष्ट्र बैंकका अधिकारीहरु बताउँछन् । सीआईबीका एक अधिकारीले शाह विगतमा जोडिएका कसुरमा पनि अनुसन्धान हुने बताए ।

प्रकाशित : पुस २२, २०७९ १८:२०
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?