कान्तिपुर वेबसाईट
AdvertisementAdvertisement
२१.१२°C काठमाडौं
काठमाडौंमा वायुको गुणस्तर: १५३

पूर्वसांसदले फिर्ता गरेनन् ल्यापटप

कार्यकाल सकिए पनि लेखा समिति सभापतिसहित १३ जनाले अझै फर्काएनन्
मकर श्रेष्ठ

काठमाडौँ — अघिल्लो प्रतिनिधिसभाका संसदीय समिति सभापति र सदस्यले कार्यकाल सकिए पनि ल्यापटप फिर्ता गरेका छैनन् । समितिको काम प्रभावकारी बनाउन विश्व बैंकको सहयोगमा उपलब्ध गराइएको ल्यापटप उनीहरूले अझै नफर्काएका हुन् ।

पूर्वसांसदले फिर्ता गरेनन् ल्यापटप

विश्व बैंकको बहुदातृ सहयोग कोष (मल्टी डोनर ट्रस्ट फन्ड) को सहयोगमा खरिद गरिएका ल्यापटप फिर्ता नगर्नेमा लेखा समितिका तत्कालीन सभापतिसहित १३ जना छन् ।

लेखा समितिका तत्कालीन सभापति भरत शाह, अर्थ समितिका तत्कालीन सभापति कृष्ण दाहाल र राज्यको निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिका सभापति नीरादेवी जैरुले एक लाखभन्दा बढी मूल्य पर्ने ल्यापटप लगेको सचिवालय स्रोतले जनाएको छ । ‘कार्यकाल सकिएपछि सभापतिहरूले गाडी फिर्ता गर्नुभयो तर केहीले अझै ल्यापटप फिर्ता गर्नुभएको छैन,’ सचिवालय स्रोतले भन्यो, ‘नयाँ सांसदलाई दिने बेला भइसक्यो, पुरानाले फिर्ता गर्नै चाहनुभएको छैन ।’

संविधान जारी भएपछि प्रतिनिधिसभाको दोस्रो कार्यकालका लागि निर्वाचित सांसदले बिहीबार शपथ लिँदै छन् । उनीहरूको कार्यकाल शनिबारदेखि सुरु हुने भएपछि सचिवालयलाई ल्यापटप व्यवस्थापनको पिरलो थपिएको हो ।

सचिवालय स्रोतका अनुसार ल्यापटप फिर्ता नगर्नेमा लेखा समितिका तत्कालीन सदस्य गंगाबहादुर तामाङ, चन्दा चौधरी, धनबहादुर बुढा, धर्मशीला चापागाईं, पार्वती डिसी चौधरी, पार्वतीकुमारी बिशुन्के, मीना सुब्बा, मैनाकुमारी भण्डारी, मोहन आचार्य, प्रदीप यादव र मोहम्मद इस्तियाक राई छन् ।

तीमध्ये प्रदीप यादव र मोहम्मद इस्तियाक राई समितिको सदस्य छाडेर मन्त्रीसमेत भएका थिए । लेखा समितिका तत्कालीन सदस्य राईले उम्मेदवारी दिनुअघि संसद् सचिवालयबाट ‘क्लियरेन्स लेटर’ लिनेबेलै ल्यापटप फिर्ता गर्न पठाए पनि सचिवालयले नबुझेको बताए । ‘कुनै संस्थाले उपलब्ध गराएकाले फिर्ता गर्नुनपर्ने भनिएको थियो,’ उनले भने ।

लेखा समितिका तत्कालीन सभापति शाहले ५ वर्ष चलाएको ल्यापटप फिर्ता गर्दा पनि प्रयोगमा नआउने भएकाले फिर्ता नगरेको बताए । ‘ल्यापटपमा अनुसन्धानक्रममा संकलित सूचना छन्, जुन फिर्ता गर्दा गोपनीयता भंग हुन सक्छ,’ उनले भने । उनले ५ वर्ष चलाएको ल्यापटप भनिए पनि सचिवालयले केहीलाई गत वर्ष पुस, केहीलाई वैशाख, जेठमा मात्रै वितरण गरेको थियो ।

लेखा समितिको ०७८ पुस २० को ५५ औं बैठकले मल्टी डोनर ट्रस्ट फन्डको सहयोगमा सञ्चालित सार्वजनिक वित्तीय व्यवस्थापन सुधार कार्यक्रमबाट प्राप्त ल्यापटप समितिका सदस्य र कर्मचारीलाई वितरण गर्ने निर्णय गरेको थियो । ‘समितिको कामका लागि ल्यापटप दिए पनि एक दिन बोकेको देखेनौं,’ सचिवालयका एक कर्मचारीले भने ।

अर्थ समितिका तत्कालीन सभापति कृष्ण दाहालले आफूले ल्यापटप फिर्ता गर्नुपर्ने कि नपर्ने भनेर सचिवालयसँग जानकारी लिइरहेको बताए । ‘महत्त्वपूर्ण डकुमेन्ट छन्, फिर्ता गर्नुपर्ने रहेछ भने किनेर नयाँ दिनुपर्ला,’ उनले भने । संसद् सचिवालयका प्रवक्ता रोजनाथ पाण्डेले सचिवालयले उपलब्ध गराएको ल्यापटप केहीले फिर्ता गरेको र केहीको आउन बाँकी रहेको बताए । ‘ल्यापटप लैजानुभएका माननीयसँग हामी कुरा गरिरहेका छौं,’ उनले भने ।

ल्यापटप लगेका अमनलाल मोदी, कृष्णलाल महर्जन, राजेन्द्रकुमार केसी, यज्ञबहादुर बोगटी, राजेन्द्रप्रसाद गौतम र विशाल भट्टराईले भने फिर्ता गरेका छन् । कार्यकाल सकिएलगत्तै आफूले सुविधामा पाएको गाडी, रातो पासपोर्ट र ल्यापटप प्रयोग गर्दा राज्यको सम्पत्ति दुरुपयोग हुने ठानेर फिर्ता गरेको भट्टराईले बताए । ‘लेखा समितिका सबैलाई ल्यापटप दिइएको थियो, मैले पनि पाएको थिएँ, पद रहँदासम्म प्रयोग गरें, पद सकिएपछि बेइमानी गर्नुहुँदैन भनेर फर्काएको हुँ,’ उनले भने ।

समितिका सभापति शाहले नै फिर्ता नगरेका कारण अन्य सदस्यले पनि फिर्ता नगरेको सचिवालयका कर्मचारी बताउँछन् । ‘समितिका प्रमुखले नै नबुझाएपछि सदस्यहरूले बुझाउनै चाहेनन्,’ ती कर्मचारीले भने ।

प्रकाशित : पुस ७, २०७९ ०९:००
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?