रवि लामिछानेको नागरिकता विवादमा प्रहरीले थाल्यो अनुसन्धान- समाचार - कान्तिपुर समाचार
कान्तिपुर वेबसाईट
AdvertisementAdvertisement

रवि लामिछानेको नागरिकता विवादमा प्रहरीले थाल्यो अनुसन्धान

कान्तिपुर संवाददाता

काठमाडौँ — प्रहरीले राष्ट्रिय स्वतन्त्र पार्टी (रास्वपा)का सभापति तथा चितवन-२ का नवनिर्वाचित प्रतिनिधिसभा सदस्य रवि लामिछानेको नेपाली नागरिकता प्रमाणपत्रमाथि अनुसन्धान अघि बढाएको छ । लामिछानेले विदेशी नागरिकता परित्याग गरेर विधिवत रूपमा नेपाली नागरिकता नलिई पहिल्यै निष्क्रिय भइसकेको नागरिकता प्रयोग गरेको उजुरी परेपछि काठमाडौं प्रहरी परिसरले अनुसन्धान सुरु गरेको हो ।

लामिछानेको नागरिकता विवादसम्बन्धी विषयलाई केही साताअघि गृह मन्त्रालयमा उजुरी परेको थियो । त्यसपछि गृहले उजुरीमा भएका विषयमा छानबिन गर्न जिल्ला प्रशासन कार्यालय काठमाडौंमा पत्र पठाएको थियो । त्यही उजुरीमाथि अनुसन्धान गर्न काठमाडौं प्रशासनले बिहीबार काठमाडौं परिसरलाई निर्देशन दिएको हो । लामिछानेले आफूले सन् २०१४ मा अमेरिकी नागरिकता लिएको र सन् २०१८ मा अमेरिकी नागरिकता त्यागेको बताएका छन् ।

तर, विदेशी नागरिकता त्यागेपछि नेपाली नागरिकता पाउन कानुनी प्रक्रिया नअपनाई पुरानै नागरिकता प्रयोग गरेको तर उनी नेपाली नागरिक भइनसकेको भन्दै निर्वाचन आयोगमा पनि उजुरी परेको थियो । पुरानै नागरिकताका आधारमा लामिछानेले आफू अध्यक्ष रहेर निर्वाचन आयोगमा रास्वपा दल दर्ता गर्नेदेखि प्रतिनिधि सभामा चितवन–२ बाट मा विजयी भइसकेका छन् । काठमाडौं प्रहरी परिसरका एसपी दिनेश मैनालीले लामिछानेको नागरिकतासम्बन्धी विषयमा अनुसन्धान सुरु भएको बताए ।

‘जिल्ला प्रशासन कार्यालय काठमाडौंले पठाएको पत्रमा उल्लेखित विषयउपर अनुसन्धान सुरु भएको छ,’ एसपी मैनालीले भने, ‘बाँकी विषयबारे अनुसन्धानले पूर्णता पाएपछि मात्रै भन्न सकिन्छ ।’ काठमाडौं प्रहरीले लामिछानेले काठमाडौं प्रशासनबाट लिएको नागरिकता, विदेशी नागरिकता प्राप्त गर्नुअघि परित्यागका लागि दिएको निवेदन, त्यसपछि पुन: विदेशी नागरिकता त्याग गर्न अपनाएको प्रक्रिया र त्यसपछिको समग्र अवस्थाबारे अनुसन्धान हुने जनाएको छ ।

नागरिकता विवाद सतहमा आएपछि लामिछानेले निर्वाचनअघि कान्तिपुरसँगको कुराकानीमा आफूले २०५० सालमा लिएको नागरिकता नै उम्मेदवारी दर्ताका क्रममा पेस गरेको र अमेरिकी नागरिकता फिर्ता गरेपछि नेपालको नागरिकता पुन:प्राप्त गर्ने कानुनी प्रक्रियामा नगएको बताएका थिए ।

‘अमेरिकाको नागरिकता फिर्ता गरेपछि र अध्यागमनसँगको समस्या समाधान भएपछि अरू प्रक्रियामा गइएन,’ उनले भनेका थिए, ‘त्यसपछि कतै पनि प्रश्न उठेन ।’

तर, विदेशी नागरिकता त्याग गरेपछि नेपाली नागरिकता प्राप्तका लागि पहिले नागरिकता लिएको जिल्ला प्रशासन कार्यालयमा निवेदन दिनु पर्छ । तर, उनले अमेरिकी नागरिकता त्यागेपछि त्यस्तो निवेदन प्रशासनमा नदिएको गृह मन्त्रालय स्रोत बताउँछ ।

सम्बन्धित समाचार

  • के हो रवि लामिछानेको नागरिकता विवाद ?

प्रकाशित : मंसिर १६, २०७९ १९:१८
प्रतिक्रिया
पठाउनुहोस्

सुदूरपश्चिम प्रदेशसभामा एक्ला स्वतन्त्र

डीआर पन्त

धनगढी — नेकपा एकीकृत समाजवादीबाट टिकट नपाएपछि केन्द्रीय सदस्य तारा जोशी प्रधानमन्त्री शेरबहादुर देउवाको गृह क्षेत्रमा प्रदेशसभा सदस्यमा स्वतन्त्र उम्मेदवार बने । डडेलधुरा (२) बाट स्वतन्त्र निर्वाचित उनी सुदूरपश्चिम प्रदेशसभामा एक्ला स्वतन्त्र सांसद बनेका छन् ।

सत्ता गठबन्धनकाबाट उम्मेदवार बनेका सुदूरपश्चिमका सामाजिक विकासमन्त्री कांग्रेसका गोविन्द बोहरालाई जोशीले ४ सय २७ मतान्तरले पराजित गरेका थिए । प्रत्यक्षतर्फका ३२ सिटमा प्रदेशसभा सदस्य निर्वाचित हुने जोशी एक्ला स्वतन्त्र उम्मेदवार हुन् ।

प्रधानमन्त्री देउवाको गृह क्षेत्रमा कांग्रेसले बलियो उम्मेदवारका रुपमा प्रदेशका समाजिक विकासमन्त्री रहेका बोहरालाई टिकट दिएको थियो । अन्तिम समयसम्म पनि एकीकृत समाजवादीले माग गरेको सो क्षेत्र नपाएपछि जोशी बीपी कांग्रेसको सहयोगमा स्वतन्त्र उम्मेदवार बनेका थिए । जोशीले ११ हजार १ सय ६२ मत ल्याउँदा कांग्रेसका बोहराले १० हजार ७ सय ३७ मत पाएका थिए । यस क्षेत्रबाट एमालेका गजेन्द्र शाहीले स्थानीय तहमा एमालेले पाएको मत पनि पाउन सकेनन् । उनले जम्मा १५ सय ३५ मत पाएका थिए ।

एमालेका अधिकांश मत पनि जोशीले नै पाए । स्थानीय नेताहरुका अनुसार माओवादीले पनि भित्रीरुपमा जोशीलाई नै सहयोग गरेको हो । लामो समयदेखि राजनीतिक क्षेत्रमा बौद्धिक छवि बनाएका र पटक–पटक निर्वाचन हारेका जोशीप्रति मतदाताको सहानुभूतिले पनि उनलाई निर्वाचन जित्न सहज बनाएको हो ।

गत निर्वाचनमा यसै क्षेत्रबाट जोशीलाई पराजित गरेर प्रदेश सांसद बनेका कर्ण मल्लको पनि उनलाई दरिलो सहयोग थियो । गत निर्वाचनमा जोशी मल्लसँग ३ सय ५६ मतले पराजित भएका थिए ।

२०७० मा एमालेबाट उम्मेदवार बनेका जोशी पराजित भएका थिए । जवाहरलाल नेहरु विश्वविद्यालयबाट राजनीतिकशास्त्रमा विद्यावारिधी गरेका जोशी विद्यार्थीकालदेखि नै राजनीतिमा सक्रिय हुन् । कुमाउ विश्वविद्यालयबाट उच्च शिक्षा हासिल गरेका जोशीले अन्तर्राष्ट्रिय राजनीति विषयमा विद्यावारिधी गरेका हुन् । केही समय पत्रकारितामा पनि संलग्न भएका उनले एमाले विभाजन हुँदा डडेलधुरामा मालेको सचिव भएर पूर्णकालीन राजनीति सुरु गरेका हुन् ।

पछिल्लो समय नेकपा विभाजन हुँदा अन्तिम समयमा माधव नेपाल समूहमा आएका जोशी एकीकृत समाजवादीका केन्द्रीय सदस्य र विभाग प्रमुख पनि हुन् । केही समय प्राध्यापनसमेत गरेका जोशीले डडेलधुरामा पहिलो पटक सामुदायिकरुपमा भटमास प्रशोधन र तेल उत्पादन गर्ने कम्पनीसमेत सुरु गरेका छन् । यसमा ७ सय ७७ जना शेयर सदस्य छन् ।

प्रकाशित : मंसिर १६, २०७९ १९:०९
पूरा पढ्नुहोस्
प्रतिक्रिया
पठाउनुहोस्
×