१९.१२°C काठमाडौं
काठमाडौंमा वायुको गुणस्तर: १७०

हिउँ चितुवा कोषलाई अन्तर्राष्ट्रिय पुरस्कार

काठमाडौँ — बीबीभीए फाउन्डेसनले हिउँ चितुवा संरक्षणमा १२ वटा देशलाई साथ–सहयोग दिइरहेको इन्टरनेसनल स्नो लियोपार्ड ट्रस्ट (एसएलटी) लाई अन्तर्राष्ट्रिय जैविक विविधता संरक्षण पुरस्कार प्रदान गरेको छ ।

हिउँ चितुवा कोषलाई अन्तर्राष्ट्रिय पुरस्कार

स्पेनको राजधानी म्याड्रिडस्थित फाउन्डेसनको मुख्यालयमा यसै साता आयोजित समारोहमा पुरस्कार दिइएको हो । पुरस्कार अन्तर्राष्ट्रिय एसएलटीका कार्यकारी निर्देशक तथा हिउँ चितुवाविज्ञ चारुदत्त मिश्रले ग्रहण गरेका थिए ।

लोपोन्मुख हिउँ चितुवा संरक्षणका लागि एसएलटीले हिउँ चितुवा पाइने १२ वटा देशलाई समेटेर सन् २०१३ मा ग्लोबल स्नो लियोपार्ड इकोसिस्टम प्रोटेक्सन प्रोग्राम (जिस्लेप) बनाउन पहलकदमी गरेको थियो । जसका कारण हिउँ चितुवा र यसको बासस्थल तथा पारिस्थितिकीय प्रणालीको संरक्षणमा योगदान पुगेको विश्लेषण छ । जिस्लेप बनेपछि हिउँ चितुवा संरक्षणका लागि १२ वटै देशका सरकारी निकायबीच सहयोग आदानप्रदान हुनुका साथै स्रोतको व्यवस्थापनमार्फत संरक्षणका लागि नीतिगत तहमै पहलकदमी भइरहेको छ । जिस्लेपको मुख्यालय किर्गिस्तानको राजधानी बिस्केकमा छ ।

गत कात्तिकमा १२ देशका प्रतिनिधि बिस्केकमा भेला भएर संरक्षणमा भइरहेका गतिविधिबारे बहस गर्दै आगामी रणनीतिक योजना घोषणा गरेका थिए । उक्त बैठकबाट बिस्केक घोषणापत्र जारी भएको छ ।

एसएलटीका कार्यकारी निर्देशक चारुदत्त मिश्रले जैविक विविधता संरक्षणमा काम गर्ने संस्था बीबीभीए फाउन्डेसनको अन्तर्राष्ट्रिय पुरस्कारले हिउँ चितुवा संरक्षणमा विश्वव्यापी मान्यता पाएको पुष्टि हुने बताएका छन् । ‘यो पुरस्कारले हामी रोमाञ्चित भएका छौं । यसले सार्वभौम राष्ट्रहरूको उल्लेखनीय एकतालाई मान्यता दिएको छ,’ उनले भने, ‘यो एक नमुना हो, जुन अन्य धेरै देश र समूहहरूले पनि अनुकरण गर्न सक्छन् ।’

ग्लोबल स्नो लियोपार्ड इकोसिस्टम प्रोटेक्सन प्रोग्राम (जिस्लेप), बिस्केकका अन्तर्राष्ट्रिय संयोजक तथा हिउँ चितुवाविज्ञ कौस्तुभ शर्माले यो अवार्ड १० वर्षे हिउँ चितुवा संरक्षण यात्राको योगदानस्वरूप हात परेको बताए । ‘हिउँ चितुवाका रूपमा यो एक उपयुक्त मान्यता पनि हो,’ उनले भने, ‘शीर्ष सिकारीका रूपमा रहेको हिउँ चितुवाले इकोसिस्टमको स्वास्थ्यको थर्मोमिटरको रूपमा काम गर्दछ ।’

प्रकाशित : मंसिर ११, २०७९ ०७:२४
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?