नेपालगन्ज — मोबाइलको लतमा परेका १३ वर्षीय छोरा घरबाट बाहिर मुस्किलले निस्कन्थे । मोबाइलमा ‘गेम’ खेल्दै समय कटाउँथे । बाहिर हतपत्त ननिस्कने छोरा एकाएक सम्पर्कविहीन भए । बिहानै घरबाट निस्किएका उनी रात परे पनि फर्किएनन् । अभिभावक अत्तालिए, खोजी सुरु भयो ।
समय कट्दै गयो । पत्तो लागेन । छोराको अत्तोपत्तो नलागेपछि अभिभावक र आफन्त पिरोलिए । नाता र आफन्तजनकहाँ खबर गरे । पत्ता नलागेपछि परिवारले अपहरणको आशंका गरे । कतैबाट केही खबर आएन । परिवारले प्रहरीको सहारा लिन उचित ठानेन ।
परिवार अनि आफन्त भनसुनमा व्यस्त भए । गाईगुईं फिँजियो ।
प्रहरीले घटनाको सुइँको पाएपछि अनुसन्धान बढायो । २३ दिनदेखि हराएका यहाँका १३ वर्षीय एक बालकको गत बुधबार रुपैडियाबाट उद्धार गरियो । ‘हामीले आशा नै मारेको छोरो प्रहरीले गर्दा भेटियो,’ बिहीबार छोरा भेटेपछि गहभरि आँसु पार्दै आमाले भनिन्, ‘उसलाई के–के भयो, हामीले केही सोध्न पनि सकेका छैनौं ।’ छोरा हराएपछि आमा निदाउन सकेकी थिइनन् । ‘आँखाभरि छोराको तस्बिर आइरहन्थ्यो । मन्दिरदेखि धामीझाँक्रीकहाँसम्म पुगें,’ छोरालाई लिन प्रहरी चौकी पुगेकी उनले भनिन्, ‘कसैले मुटु–कलेजो निकालिदिएजस्तै भएको थियो ।’
कान्छो छोरा हराएपछि आमाको मन शान्त हुने कुरो भएन । साथीभाइसँग धेरै नखेल्ने, धेरै नबोल्ने छोरा आफैं कसरी कहाँ गयो भन्ने परिवारलाई हेक्का थिएन । बुबाको मोबाइलमा आफ्नो फेसबुक चलाएका किशोर लामो समयदेखि एक किशोरीसँग कुराकानी गर्थे । कुराकानीका क्रममा प्रेममा परे । अश्लील चित्रहरू साटासाट गरे । किशोरीले आफूलाई भेट्न आउन आग्रह गरिन् । उनी राजी भए । किशोरीले आफ्नो दाइसँग आउन आग्रह गरेपछि उनी घरमा कसैलाई नभनी किशोरीलाई भेट्नका लागि उनका दाजुकहाँ कोहलपुर पुगे । कोहलपुरमा किशोरलाई लिन ३१ वर्षीय जितुलाल शर्मा आए । बहिनीसँग भेट गराइदिने बहानामा उनले सिमला पुर्याए । किशोरले त्यहाँ मानसिकदेखि शारीरिक यातना पाएको प्रहरीको अनुसन्धानबाट खुलेको छ ।
फेसबुकमा किशोरी बनेर कुराकानी गर्ने अनि ती किशोरलाई सिमला पुर्याउने पश्चिम रुकुमको चौरजहारी–१३ एकलैनीका जितुलाल शर्मा थिए । प्रहरीले शर्माका बारेमा पत्ता लगाएपछि उनको परिवारलाई भेट्यो । परिवारको माध्यमबाट शर्माको कर्तुत बाहिर आएको हो । परिवारका सदस्यलाई प्रहरीले नियन्त्रणमा लिएको थाहा पाएपछि शर्माले किशोरलाई अपहरणमुक्त गरेका हुन् ।
भारतको चण्डीगढ र हरिद्वार हुँदै सिमला पुर्याइएका ती किशोर २३ दिनपछि परिवारको सम्पर्कमा आएका छन् । प्रहरीले उनलाई नेपाल–भारत सीमाबाट उद्धार गर्न सफल भएको हो । ‘केटीको आवाज बनाएर कुरा गर्ने, केटीको नाममा फेसबुक बनाएर बालकलाई ट्रयापमा पार्ने क्रियाकलाप गरेको देखियो,’ इलाका प्रहरी कार्यालय कोहलपुरका डीएसपी ऐनबहादुर मल्लले भने, ‘प्रहरीलाई गुमराहमा पारेर अपराध गरिए पनि बालकलाई उद्धार गर्न सफल भएका छौं ।’
पछिल्लो समय सामाजिक सञ्जालमा फेक आईडीबाट फिसिङ (ट्रयापिङ) गरी किशोरकिशोरीलाई फसाउने क्रियाकलाप बढेको मल्लले सुनाए । ‘आफ्ना छोराछोरीहरू मोबाइलमा के गरिरहेका छन्, कोसँग कुरा गरिरहेका छन् भन्नेबारे अभिभावकले पनि निगरानी राख्न जरुरी छ,’ उनले भने, ‘यो घटनामा बालकलाई दुर्घटनाबाट बचाउन सफल भयौं ।’
सामाजिक सञ्जाल फेसबुकबाट अपरिचित नाम नमुना भट्टराई, लुरे डन नामबाट रुकुम पश्चिम चौरजहारीका शर्माले १३ वर्षे किशोरलाई ललाइफकाई गरी २३ दिनसम्म बन्धक बनाएको प्रहरी अनुसन्धानबाट खुलेको छ । अहिले शर्माका परिवार प्रहरीको नियन्त्रणमा छन् । आफन्तलाई नियन्त्रणमा लिए पनि उनलाई भने प्रहरीले पक्राउ गर्न सकेको छैन । ‘सुरुमा पीडित परिवारबाट पनि कुनै जानकारी पाएनौं । डरले परिवार खुल्नु भएन,’ डीएसपी मल्लले भने, ‘अझै अनुसन्धान चलेको छैन, अपराधीलाई ढिलोचाँडो पक्राउ गर्छौं ।’
प्रकाशित : मंसिर १०, २०७९ ०६:५६
