बाजुरामा उच्चस्तरीय छानबिन माग- समाचार - कान्तिपुर समाचार
कान्तिपुर वेबसाईट
AdvertisementAdvertisement

बाजुरामा उच्चस्तरीय छानबिन माग

अर्जुन शाह

धनगढी — बाजुरामा मतदानका दिन भएका झडप र दुुई जनाको मृत्यु घटनाको उच्चस्तरीय छानबिन हुनुुपर्ने माग नेपाली कांग्रेस बाजुराले गरेको छ । मार्तडीमा बुधबार पत्रकार सम्मेलन गर्दै पार्टीले पछिल्लो असहज अवस्थाबारे धारणा सार्वजनिक गरेको हो । ‘मतदानका दिन भएका घटनाको छानबिन उच्चस्तरीय समिति गठन गरेर हुनुपर्छ,’ प्रतिनिधिसभा सदस्यका उम्मेदवारसमेत रहेका कांग्रेस सहमहामन्त्री बद्रीप्रसाद पाण्डेले भने, ‘जिल्लाको अवस्था सहज बनाउन हामी जस्तोसुकै पहल गर्न तत्पर छौं ।’

मतदानका दिन एउटा मतदान केन्द्रमा भएको झडपमा प्रहरीको गोली लागेर एक युवकको मृत्यु भएको थियो भने तीन जना घाइते भएका थिए । सोही दिन दिउँसो एक समूहको कुटपिटमा परेका युवकलाई राति घर पुगेपछि बाहिर निकालेर कुटपिट गर्दा मृत्यु भएको थियो । मतदानका दिन भएका घटनाले आफूलाई खिन्नता र लज्जाबोध भएको पाण्डेले बताए । ‘हामीलाई मात्रै होइन, सबै दलका नेता र बाजुरावासीको शिर निहुरिएको अवस्था छ,’ उनले भने, ‘अब अवस्था सामान्यतर्फ फर्काउन प्रयास गर्नु सबैको दायित्व हो । चुनाव त पाँच वर्षमा एक पटक आउने हो, हाम्रो सामाजिक सद्भाव बिग्रन दिनु हुँदैन ।’

पाण्डेले एमालेका प्रतिनिधिसभाका उम्मेदवार कर्णबहादुर थापाका कार्यकर्ताले सुुरुमै बुुथकब्जा गरेर विपक्षी मतदातालाई मतै हाल्न नदिएपछि जिल्लाको वातावरण बिग्रेको आरोप लगाएका छन् । जिल्लाभरका ८ वटा मतदानस्थलमा एमालेले कब्जा गरेको कांग्रेसको आरोप छ । ती मतदान केन्द्रमा पुन: मतदान गराउन मुख्य निर्वाचन अधिकृतको कार्यालयमा अनुरोध गरिएको पनि पाण्डेले बताए । ‘आयोगले जे निर्णय गर्छ, त्यो हाम्रा लागि स्विकार्य हुन्छ,’ उनले भने । एमाले बाजुराले भने १६ वटा केन्द्रमा पुन: मतदान हुनुपर्ने धारणा मंगलबार नै सार्वजनिक गरिसकेको छ ।

त्रिवेणी–७ को मतदानस्थलमा मतदान सकिनै लाग्दा विवाद भएपछि प्रहरीले चलाएको गोली लागेर कांग्रेस समर्थित युवा सञ्जीव अयडीको मृत्यु भएको थियो । सोही दिन अर्को केन्द्रमा विवाद हुँदा कांग्रेस समर्थित समूहले स्थानीय अनेरास्ववियुका केन्द्रीय सदस्य चेतन अयडीलाई कुटपिट गरी घाइते बनाएका थिए । पछि राति उनको घरमै गएर कुटपिट गरी हत्या गरेको दाबी एमालेको छ । उक्त घटनालाई लिएर स्थिति तनावपूर्ण भएपछि सदरमुकाम मार्तडीमा बजार र विद्यालय ठप्प छन् । गाडी चलेको छैन । सदरमुकाममा सुरक्षाकर्मी तैनाथी बढाइएको छ । प्रमुख जिल्ला अधिकारी प्रकाशचन्द्र अधिकारीले जिल्लाको अवस्था सामान्य बनाउने प्रयास भइरहेको बताएका छन् । ‘अवस्थालाई सामान्य बनाउन प्रयास गरिरहेकै छौं,’ उनले भने ‘सबै पक्षको सहयोग चाहियो ।’

मृतक दुुवैको शव मंगलबार जिल्ला अस्पतालमा ल्याइएको छ । निर्वाचन आयोगले स्थगित भएको बुढीनन्दा–५ को मतदान पुन: गराउन आगामी शनिबारको मिति तोकिसकेको छ । तर पुन: मतदान कसरी गराउने भन्नेमा मुुख्य निर्वाचन अधिकृतको कार्यालय र सुरक्षा निकायले समेत चुनौती देखेको छ । जिल्ला निर्वाचन कार्यालयका प्रमुख नवराज अवस्थीले आयोगले तोकेको मितिमै निर्वाचन गराउने तयारी भइरहेको बताए ।

प्रकाशित : मंसिर ८, २०७९ ०६:१८
प्रतिक्रिया
पठाउनुहोस्

रौतहट प्रदेशसभा १ (२) मा कांग्रेसका यादव विजयी

शिव पुरी

रौतहट — रौतहटको क्षेत्र नम्बर १ (२) का लागि प्रदेशसभा सदस्यमा नेपाली कांग्रेसका कृष्णप्रसाद यादव विजयी भएका छन् । उनले निकटतम प्रतिद्वन्द्वी स्वतन्त्र उम्मेदवार राजेशकुमार चौधरीलाई १ हजार ८१ मतान्तरले पराजित गरेका हुन् । विजयी यादव कांग्रेसको मधेस प्रदेश सभापति हुन् । अहिलेसम्म रौतहट प्रदेशसभामा कांग्रेसले दुई सिट जितेको छ ।

मुख्य निर्वाचन कार्यालय गौरका अनुसार कांग्रेसका यादव १२ हजार ४ सय ८१ मतका साथ विजयी भएका छन् । उनका निकटतम प्रतिद्वन्द्वी चौधरीले ११ हजार ४ सय मत प्राप्त गरेका छन् ।

चौधरी कांग्रेसको पूर्व जिल्ला सचिव हुन् । प्रदेशसभा सदस्य निर्वाचनमा पार्टीले टिकट नदिएको भन्दै उनी केही समयअघि एमाले अध्यक्ष केपी शर्मा ओलीको हातबाट टिका लगाई प्रवेश गरेका थिए । उक्त क्षेत्र एमाले जसपा गठबन्धन भएपछि प्रदेशसभाका पूर्व सदस्य एवम् जसपाका नेता योगेन्द्र यादबलाईलाई पार्टीले उम्मेदबार बनायो । त्यसपछि चौधरीले स्वतन्त्रमा उम्मेदवारी दिएका हुन् ।

विजयी यादव भने दुई पटक कांग्रेसका रौतहट सभापति भइसकेका छन् । चार महिनाअघि जनकपुरमा सम्पन्न पार्टीको मधेस प्रदेशको सभापतिमा यादपले जितेका थिए ।

सत्ता गठबन्धनका उम्मेदवार कांग्रेसका यादवको क्षेत्रमा प्रतिनिधिसभा सदस्यमा एकीकृत समाजवादीका अध्यक्ष माधवकुमार नेपाल उठेका छन् । चारवटा क्षेत्रमा रहेको रौतहटमा प्रदेशसभाको ८ वटा सिट मध्ये यस अघि ४ (१) मा नेकपा माओवादीका युवराज भट्टराई १ को (१)मा कांग्रेसका नागेन्द्र साह विजयी भइसकेका छन् । अन्य क्षेत्रमा मतगणना जारी रहेको मुख्य निर्वाचन अधिकृत एवम् जिल्ला न्यायाधीश मातृका मरासिनीले बताए ।

प्रकाशित : मंसिर ८, २०७९ ०६:१८
पूरा पढ्नुहोस्
प्रतिक्रिया
पठाउनुहोस्
x
×