भैरहवालाई अन्तर्राष्ट्रिय सहर बनाउँछौं : गृहमन्त्री खाँण

अन्तर्राष्ट्रिय विमानस्थलसँगै भैरहवामा स्थलमार्गबाट धेरै पर्यटक भित्रिने बेलहिया नाका छ । ‘यहाँ रहेको विशेष आर्थिक क्षेत्रको कार्यविधि परिवर्तन गरेर भए पनि क्षमताअनुसार सञ्चालनमा ल्याइनेछ,’बिहीबार यहाँ आयोजित आमसभामा उनले भने, ‘नाका व्यवस्थित गर्न एकीकृत जाँच चौकी (आईसीपी)को निर्माण अगाडि बढाइनेछ ।’ यसका साथै व्यवस्थित सहर बनाउन सिद्धार्थ चक्रपथ निर्माण अगाडि बढाइने उनले बताए । ‘खानेपानी, बिजुली, नाला र सडकको अवस्था सुधार गरिनेछ,’उनले भने, ‘पर्यावरणमैत्री, शिक्षा र स्वास्थ्यको हवका रुपमा विकास गरिनेछ ।’ यहाँको शैक्षिक अवस्था सुधार्न स्तरीय विद्यालय सञ्चालन गर्नेलाई प्रोत्साहन गर्ने र त्यसमा सरकारले लगानी साझेदारी गर्ने बताए ।

‘भैरहवा आसपासका ओमसतीया र मायादेवी गाउँपालिकालाई सहरमा स्तरोन्नती गर्नेगरी विकासमा योजना ल्याइनेछ,’उनले भने, ‘ती गाउँपालिकामा सबैलाई बाटोघाटो, बिजुली र खानेपानीको सुविधा पुर्‍याइने छ ।’ भैरहवामा रहेको सिद्धार्थ क्रिकेट रंगशालाको स्तरोन्नतीको काम तत्काल पूरा गरेर अन्तर्राष्ट्रियस्तरका प्रतियोगिता सञ्चालन गरिने उनको भनाइ थियो । ‘गाउँ–सहरको विकासका लागि स्थानीय र प्रदेश सरकारसित समन्वय गरिनेछ,’उनले भने, ‘मुलुकमा स्थिर विकासका लागि गठबन्धन निर्माण भएको हो ।’

सांसद चुनिनका लागिमात्र यो निर्वाचन नभएको उनले बताए । ‘निर्वाचनपछि गठबन्धनको सरकार बन्छ,’उनले भने, ‘त्यसैले यसपटक विवेकपूर्ण तरिकाले मतदान गर्न जरुरी छ ।’ गठबन्धनको सरकार बनेमात्रै मुलुकको आर्थिक विकास सम्भव हुने उनले बताए । ‘रुपन्देहीका व्यवसायीका समस्या बुझेको छु,’उनले भने, ‘चर्को व्याजदरले मर्का परेको छ, चुनाव सकिएपछि व्याजदर घटाएर राहत दिइनेछ ।’

सरकारको निर्देशन नटेरे राष्ट्र बैंकका पदाधिकारीविरुद्ध कडा कदम चाल्ने चेतावनी उनले दिए । जिल्लाको कृषि क्षेत्रको विकासका लागि सेमलारको कर्साघाटमा दुई अर्ब लगानीमा कृषि थोक बजार निर्माण हुन लागेको बताए । ‘उक्त बजारका लागि चालु बजेटमा रकम विनियोजन भइसकेको छ,’उनले भने, ‘अब छिट्टै काम सुरु हुन्छ । कृषि बजारको निर्माणले रुपन्देही, कपिलवस्तु र नवलपरासीका किसानलाई लाभ मिल्नेछ ।