संग्रहालयमा महाकवि जन्मजयन्ती
काठमाडौँ — महाकवि लक्ष्मीप्रसाद देवकोटाको व्यक्तित्व, जीवनी र उनको सिर्जनात्मक आयामबारे परिचर्चा गर्दै उनको जन्मजयन्ती मनाइएको छ । देवकोटाको ११४औं जन्मजयन्तीका अवसरमा प्रज्ञाप्रतिष्ठानले मैतीदेवीस्थित देवकोटा संग्रहालयमा गरेको कार्यक्रममा व्यक्तित्व चर्चासँगै रचना वाचनसमेत गरिएको छ ।
प्रतिष्ठानका निमित्त कुलपति डा.जगमान गरुङ, पूर्वकुलपति गंगाप्रसाद उप्रेती, पूर्वकुलपति बैरागी काइँला, निवर्तमान सदस्यसचिव जगत्प्रसाद उपाध्यायलगायतले देवकोटाको स्मरण गर्दै नेपाली भाषा साहित्यमा उनको योगदान चर्चा गर्दै संग्रहालयका बारे चर्चा गरे ।
पूर्वकुलपति काइँलाले नेपाली वाङ्मयका क्षेत्रमा महाकवि देवकोटाको विशिष्ट योगदान रहेको उल्लेख गर्दै संग्रहालयको निर्माणले देवकोटाको योगदानलाई अमर तुल्याएको बताए । संग्रहालयलाई पूर्ण गराउनुपर्नेमा उनले जोड दिए । त्यस्तै निमित्त कुलपति गुरुङले पहिलो पटक महाकवि देवकोटा संग्रहालयमा देवकोटाको जन्मजयन्ती कार्यक्रम मनाउन पाउँदा गौरव लागेको सुनाए । देवकोटा संग्र्रहालय नेपाली सर्जकका लागि तीर्थस्थल भएको उषा ठाकुरले बताइन् ।
कार्यक्रममा काठमाडौं महानगरपालिका–३० का वडाध्यक्ष दलबहादुर कार्की, महाकवि देवकोटाकी छोरी अम्बिकादेवी देवकोटा रिमाल लगायतले देवकोटा र संग्रहालयका विभिन्न पक्षमाथि प्रकाश पारे । कार्यक्रममा रामेश्वर राउत मातृदास, रेजिना आपगाईं, बलराम दाहाललगायतले देवकोटाका रचना वाचन गरेका थिए । गत असोज १४ मा उद्घाटन गरिएको संग्रहालयमा पहिलोपल्ट सार्वजनिक कार्यक्रम आयोजना गरिएको हो । यसअघि कवि, साहित्यकारहरूका जन्मजयन्ती कार्यक्रम प्रतिष्ठानमै गरिँदै आएको थियो ।
प्रकाशित : कार्तिक ६, २०७९ ११:४६