खोटाङ — एमाले प्रमुख सचेतक विशाल भट्टराईले प्रतिनिधिसभा सदस्यमा उम्मेदवारी दिएका छन् । मुख्य निर्वाचन अधिकृतको कार्यालय पुगेर आइतबार २ बजे उम्मेदवारी दिएका हुन् । भट्टराई खोटाङबाट योसहित पाँचौ पटक चुनाव लड्दै छन् ।

२०५६ र २०६४ मा हार खेपेका उनले २०७० र २०७४ मा विजयी भएका थिए । माओवादीसँग गठबन्धन भएको बेला २०७४ मा कांग्रेसकी सरस्वती बजिमयलाई १४ हजार मतान्तरले पराजित गरेका थिए । २०७० सालमा कांग्रेसकै विष्णुकुमार राईलाई ५ हजार मतको फरकले जितेका थिए । एमालेले प्रदेशसभा खोटाङ (क) मा पाचकर्ण राईले उम्मेदवारी दर्ता गरेका छन् । प्रदेशसभा खोटाङ (ख) मा रामप्रसाद दंगालले उम्मेदवारी दिएका छन् । राप्रपाको तर्फबाट प्रतिनिधिसभामा सर्जु श्रेष्ठले उम्मेदवारी दिएका छन् । प्रतिनिधिसभाका लागि जयन्द्रकुमार राईले स्वतन्त्र उम्मेदवारी दिएका छन् ।