कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १८३

एमालेले प्रतिनिधिसभामा टिकट दिएपछि पूर्वमुख्यमन्त्री गुरुङ असन्तुष्ट

लालप्रसाद शर्मा

पोखरा — एमालेले प्रदेशसभामा मात्र सिफारिस भएका गण्डकी प्रदेशका पूर्वमुख्यमन्त्री पृथ्वीसुब्बा गुरुङलाई प्रतिनिधिसभा लगेपछि गण्डकी एमालेमा असन्तुष्टी बढेको छ । पार्टीले गुरुङको सट्टा संगठन विभाग प्रमुख खगराज अधिकारीलाई प्रदेशसभामा टिकट दिएको छ ।

एमालेले प्रतिनिधिसभामा टिकट दिएपछि पूर्वमुख्यमन्त्री गुरुङ असन्तुष्ट

गुरुङ एकपटक प्रदेशमै बसेर पुन: मुख्यमन्त्री बन्न चाहन्थे । तर अधिकारीलाई भावी मुख्यमन्त्रीको रुपमा अघि सार्ने गरी एमाले उनलाई प्रदेश सभामा टिकट दिएपछि असन्तुष्टि बढेको हो । दुबै अध्यक्ष केपी शर्मा ओली निकट नेता हुन् । तर एउटै समूहभित्र पनि गुरुङ र अधिकारीको राम्रो मेलमिलाप छैन । गत स्थानीय तह चुनावमा पनि दुई नेताबीचको रस्साकस्सीले गण्डकीमा टिकट वितरणमा समस्या देखिएको थियो ।

एमाले स्रोतका अनुसार यो उम्मेदवारीप्रति गुरुङ असन्तुष्ट छन् । उनलाई प्रदेशमै टिकट दिलाउन केही दिन अघि लमजुङबाट स्थानीय नेताहरु पार्टी केन्द्रमा समेत गएका थिए । असन्तुष्टीकै बीच टिकट दिएकाले गुरुङले आइतबार प्रतिनिधि सभामा उम्मेदवारी दिन्छन् कि दिन्नन् भन्ने निर्क्यौल नभइ सकेको एक नेताले जनाकारी दिए । यसैगरी प्रदेशसभामा उम्मेदवारको टुंगो लागेका लमजुङकै जमीन्द्रमान घलेले पनि उम्मेदवार चयनमा पक्षपात भएको भन्दै असन्तुष्टि जनाएका छन् । पृथ्वीसुब्बा गुरुङ चुनाव नलड्ने भए आफू पनि कुनैपनि सभामा चुनाव नलड्ने घलेले बताएको एमाले स्रोतको भनाइ छ ।

यसैगरी मुस्ताङबाट प्रतिनिधिसभामा उम्मेदवारको टुंगो लागेका यसअघिका पनि सांसद प्रेमप्रसाद तुलाचन पनि निर्वाचन नलड्ने नलड्ने अझै दोधारमा छन् । पछि मन्त्री बनाइदिने आश्वसन पाए निर्वाचन लड्नसक्ने एक एमाले नेताले बताए । यस्तै मनाङको प्रदेशसभा खमा गण्डकी प्रदेशका हालका युवा तथा खेलकुदमन्त्री राजीव गुरुङ (दिपक मनाङे) लाई सहयोग गर्ने मनस्थितिमा एमाले रहेकाले हाललाई खाली राखिएको छ । ‘दिपक मनाङेसंँग उम्मेदवारीका विषयमा छलफल भइरहेको छ’ एमाले स्रोतले भन्यो ।

त्यस्तै बाग्लुङ –२ को क मा माओवादी छाडेर स्वतन्त्रबाट उठ्ने तयारी गरेका प्रकाश घर्तिलाई एमालेले समर्थन गर्ने भएको छ । ताराखोला गाउँपालिकाका पूर्व अध्यक्ष घर्तिलाई पार्टीले फेरि अध्यक्षको उम्मेदवार नबनाएपछि उनी स्वतन्त्र उम्मेदवारी दिएर पराजित भएका थिए । घर्तिले अहिले स्वतन्त्रबाट उठ्ने र पछि एमाले प्रवेश गर्ने बताएका तर एमालेले भने सूर्य चिन्हबाटै निर्वाचन लड्नु पर्ने भन्दै आएको बागलुङ एमालेका एक नेताले कान्तिपुरलाई बताए । एमाले गण्डकी प्रदेश अध्यक्ष नवराज शर्माले निर्वाचन लड्ने नलड्नेबारे आधिकारीकरुपमा केही जानकारी नआएको बताए ।

प्रकाशित : आश्विन २२, २०७९ २०:३८
प्रतिक्रिया
पठाउनुहोस्
जनताको राय

सहकारीको बचत अपचलनमा प्रहरीले गृहमन्त्री रवि लामिछाने संलग्न रहेको प्रतिवेदन लेखेपनि मुद्दामा उन्मुक्ति दिएको विषयमा तपाईंको राय के छ ?