मिश्रको 'विचारभन्दा माथि देश' दस्तावेज घातक ‍भन्दै विवेकशील साझाद्वारा खारेज- समाचार - कान्तिपुर समाचार

मिश्रको 'विचारभन्दा माथि देश' दस्तावेज घातक ‍भन्दै विवेकशील साझाद्वारा खारेज

कान्तिपुर संवाददाता

काठमाडौँ — विवेकशील साझा पार्टीले तत्कालीन अध्यक्ष रवीन्द्र मिश्रले अघि सारेको 'विचारभन्दा माथि देश' दस्तावेजलाई 'घातक' भन्दै खारेज गरेको छ । विवेकशील साझा पार्टीको केन्द्रीय समिति बैठकले मिश्रले अघि सारेको उक्त दस्तावेज विवादास्पद भएको भन्दै खारेज गरेको प्रवक्ता प्रकाशचन्द्र परियारले जानकारी दिए ।

विवेकशील साझाको शुक्रबार अध्यक्ष समीक्षा बाँस्कोटाको अध्यक्षतामा सम्पन्न केन्द्रीय समिति बैठकले तत्कालीन अध्यक्ष मिश्रले अघि सारेको उक्त दस्तावेजकै कारण 'पार्टीभित्र तीव्र राजनीतिक असहमति सुरु भएको र त्यसले पार्टी निर्माण र पब्लिक सर्भिस डेलिभरीको आशावादी राजनीतिक मिसन प्रत्युत्पादक भएको' निष्कर्ष निकालेको छ । उक्त निष्कर्षसँगै मिश्रको दस्तावेज खारेज गरिएको हो ।

मिश्रले दस्तावेज सार्वजनिक गरेपछि उक्त विचारसँग असहमत पार्टीका केन्द्रीय तथा अन्य समितिका नेताहरूसँग तत्काल संवाद गरी सबै प्रकारको समस्याको समाधान गर्न अग्रसर हुने निर्णय भएको पनि परियारले जानकारी दिए ।

विवेकशील साझा पार्टी केन्द्रीय समितिमा रहेर पार्टी हित विपरीतको गतिविधिमा प्रत्यक्ष संलग्न रहेका नेताहरूलाई स्पष्टीकरण सोध्ने निर्णय पनि भएको परियारले जानकारी दिए । उनीहरूमाथि आवश्यक कदम चाल्ने पनि विवेकशील साझाले निर्णय गरेको छ ।

तत्कालीन अध्यक्ष मिश्रसँग असन्तुष्ट रहेर पार्टीबाट राजीनामा दिई स्वतन्त्र बसेका नेताहरूलाई पुनः सक्रिय हुन पनि विवेकशील साझा पार्टीले आग्रह गरेको छ । 'बैठकले पार्टीभित्र देखा परेको वैचारिक असहमतिका कारण विगत देखिनै राजीनामा दिएका, असन्तुष्ट भएर निष्क्रिय रहेका र वैचारिक संघर्षमा सम्मिलित सम्पूर्ण नेता तथा सदस्यहरूलाई विवादास्पद र घातक दस्तावेज 'विचारभन्दा माथि देश' खारेज गरिसकिएकाले पार्टीमा पुन: सक्रिय हुन, पार्टी निर्माणसँगै आसन्न निर्वाचनमा होमिन हार्दिक अपिल गरेको छ,' परियारले भने ।

मिश्रले विवेकशील साझा छोडेर राष्ट्रिय प्रजातन्त्र पार्टी (राप्रपा) प्रवेश गरेका छन् । उनी राप्रपामा वरिष्ठ उपाध्यक्ष भएका हुन् । राप्रपा प्रवेश गर्नका लागि गत सोमबार पार्टीको साधारण सदस्यबाट राजीनामा दिएका थिए । उनी बुधबार राप्रपा प्रवेश गरेका थिए । मिश्र राप्रपा प्रवेश गरेपछि उनले विवेकशील साझामा प्रवेश गराएको 'विचारभन्दा माथि देश' खारेज भएको हो ।

प्रकाशित : आश्विन १५, २०७९ १४:४२
प्रतिक्रिया
पठाउनुहोस्

नक्सालमा खुल्यो यामाहा नेपालको सोरुम

कान्तिपुर संवाददाता

काठमाडौँ — नेपालका लागि यामाहा मोटरसाइकल तथा स्कुटरको आधिकारिक बिक्रेता एमएडब्लू इन्टरप्राइजेजले नक्सालमा सुविधा सम्पन्न सोरुम सञ्चालनमा ल्याएको छ । उक्त सोरुम ‘टु ह्वीलर’मा नेपालकै सबैभन्दा ठूलो र अत्याधुनिक रहेको कम्पनीको दावी छ । 

यामाहाको विश्वव्यापी नयाँ अवधारणा 'ब्लू स्क्वायर'लाई अबलम्बन गरी नक्सालमा उक्त सोरुम सञ्चालनमा ल्याइएको एमएडब्लूले जनाएको छ । ‘ग्लोबल मोटर स्पोर्टस् लेगेसीलाई आत्मसाथ गर्दै सम्पूर्ण राइडर्सले आफ्नो राइडिङप्रतिको चाहना र उत्साहलाई हरेक कुनाबाट अनुभव गर्न सक्ने स्थानको रुपमा ब्लू स्क्वायर सोरुमलाई लिइएको छ’ कम्पनीले भनेको छ । यस सोरुमबाट ग्राहकले छिटो सेवा पाउन सक्ने यामाहा नेपालका सीईओ राजु क्षेत्रीले बताए । ‘सोरुमबाट बाइक प्रेमीहरुलाई यामाहाको उत्कृष्ट प्रविधियुक्त विभिन्न मोटरसाइकल, स्कुटर, एसेसोरिज, उपलब्ध हुनेछ’ उनले भने ।


प्रकाशित : आश्विन १५, २०७९ १४:४१
पूरा पढ्नुहोस्
प्रतिक्रिया
पठाउनुहोस्
×