कांग्रेसमा समान अवसर र न्यायको माग, सानेपामा कोइराला समूहको धर्ना

सभापति शेरबहादुर देउवाले पार्टीको महाधिवेशनमा प्रतिस्पर्धा गर्ने र आफूलाई मत नहालेकै आधारमा चुनावमा टिकट नदिने नीति लिएर एकलौटी गरेको कोइराला समूहको आरोप छ ।

त्यसैको विरोधमा बुधबार दिउँसो १२ बजे सानेपास्थित पार्टी कार्यालय पुगेर दुई घण्टा धर्ना दिने कार्यक्रम रहेको नेता गुरुराज घिमिरेले बताए । सोमबार बसेको गुटको बैठकले पार्टीभित्रको एकता, समान अवसर र न्यायको सुनिश्चतता नभए संघर्ष गर्ने निर्णय गरेको थियो ।

उनीहरुले तत्काल समानुपातिक उम्मेदवारको बन्द सूची सच्याउन माग गरेका छन् भने प्रत्यक्षतर्फ टिकट वितरणमा समेत सबैलाई न्याय हुने गरी उम्मेदवार चयन हुनुपर्ने माग गरेका छन् । हाल निर्वाचन आयोगमा कांग्रेसले बुझाएको सूचीमा कोइराला समूहका करिब १० प्रतिशत नेताहरु मात्रै परेका छन् ।

प्रत्यक्षतर्फ समेत टिकट वितरणमा सोही खालको व्यवहार हुनसक्ने भयले कोइराला समूह त्रसित छ । नेता कोइराला सहित पार्टीका पदाधिकारी रहेका कोइराला समूहका नेताहरु भने आन्दोलनका कार्यक्रममा सहभागी भएका छैनन् । दोस्रो तहका नेताहरुले भने निरन्तर विरोधका कार्यक्रम गर्दै आएका छन् ।

कोइराला समूहको दबाबपछि सभापति देउवाले समानुपातिकतर्फ बन्द सूची सच्याउन तयार भएका छन् । नेता घिमिरले समानुपातिक सूची नसच्याइएसम्म आन्दोलन र विरोधका कार्यक्रम निरन्तर हुने बताए ।