वैदेशिक रोजगारीका क्रममा ठगीमा पर्नेहरूलाई ४८ करोड क्षतिपूर्ति- समाचार - कान्तिपुर समाचार
कान्तिपुर वेबसाईट
AdvertisementAdvertisement

वैदेशिक रोजगारीका क्रममा ठगीमा पर्नेहरूलाई ४८ करोड क्षतिपूर्ति

कान्तिपुर संवाददाता

काठमाडौँ — सरकारले वैदेशिक रोजगारीका क्रममा ठगीमा पर्नेहरूलाई चालु आर्थिक वर्षमा ४८ करोड रुपैयाँभन्दा बढी क्षतिपूर्ति उपलब्ध गराएको छ । मंगलबार श्रम, रोजगार तथा सामाजिक सुरक्षामन्त्री शेरबहादुर कुँवरले आफ्नो ९० दिने कार्यकालमा भएका प्रगति विवरण सार्वजनिक गर्न आयोजित पत्रकार भेटघाट कार्यक्रममा यसबारे जानकारी दिएका हुन् ।

मन्त्री कुँवरले वैदेशिक रोजगारीका क्रममा ठगी गर्ने, अलपत्र पार्ने र सम्झौतामा उल्लेख भए अनुसार काममा नलगाउने जस्ता कार्य गराएको भनी वैदेशिक रोजगार विभागमा आएको निवेदनका आधारमा चालु आर्थिक वर्षमा पीडकबाट क्षतिपूर्ति भराएको ४८ करोड ४ लाख ८५ हजार रुपैयाँ पीडितलाई उपलब्ध गराइएको बताए ।

उनले वैदेशिक रोजगारीको क्रममा भएका ठगीको उजुरी प्रमुख जिल्ला अधिकारीले हेर्न पाउने र उजुरी उपर कारबाही गरी पीडितलाई क्षतिपूर्ति दिलाउने व्यवस्थाको कार्यान्वयन प्रभावकारी बनाइएको पनि बताए ।

मन्त्री कुँवरले नेपालबाट बेलायतमा स्वास्थ्य क्षेत्रका जनशक्ति पठाउने सम्बन्धी श्रम समझदारी पत्रमा हस्ताक्षर भइ काम अगाडि बढेको पनि उल्लेख गरे । यस्तै रोमानियाको भिसा प्रक्रियालाई सरल बनाउन वैदेशिक रोजगार कार्यालय ताहाचलमा अस्थायी रुपमा रोमानिया मिसन स्थापना गरिएको उनले जानकारी दिए ।

यस्तै इजरायलमा नेपाली सहयोगी कामदार पठाउने सम्बन्धी निर्देशिका, २०७८ समसामयिक बनाउने कार्यदल गठन भइ कार्य भइरहेको पनि उनले जानकारी दिए । सातवटै प्रदेशमा रहेका श्रम तथा रोजगार कार्यालयहरुबाट वैदेशिक रोजगारीका लागि श्रम स्वीकृति दिने काम भइरहेको बताइएको छ ।

मन्त्री कुँवरले प्रधानमन्त्री रोजगार कार्यक्रम, युवा रोजगारीका लागि रुपान्तरण पहल परियोजना, रोजगार प्रवर्द्धन कार्यक्रम र वैदेशिक रोजगारीबाट फर्किएका व्यक्तिहरुको पुनः एकीकरण परियोजना प्रदेश तथा स्थानीय तहबाट हुनेगरी कार्यान्वयन गरिएको उल्लेख गरे । यस्तै श्रमिक अस्पतालको निर्माण सम्भाव्यता अध्ययन कार्यदलले अस्पताल निर्माण सम्भाव्य स्थलको पहिचान गर्ने सम्बन्धी प्रतिवेदन तयार भइ जग्गा प्राप्तिको प्रक्रिया अगाडि बढेको उनले बताए ।

यसैबीच कम्तीमा २ वर्ष सामाजिक सुरक्षामा योगदान गर्ने योगदानकर्ताहरुलाई कोरोनरी आर्टरी बाइपास वा ओपनहार्ट सर्जरी, मस्तिष्कघात, मिर्गौला रोग, क्यान्सर, पार्किन्सन्स, अल्जाइमर्स लगायत १० प्रकारका घातक रोग लागेमा १० लाख रुपैयाँसम्म उपचार खर्च प्रदान गर्ने व्यवस्था गरिएको छ ।

प्रकाशित : आश्विन ११, २०७९ १६:५१
प्रतिक्रिया
पठाउनुहोस्

मनास्लु हिमपहिरोमा मृत्यु भएका राईको शव काठमाडौं लैजाने तयारी

हिउँमा फसेका सबैको उद्धार भयो : प्रहरी
हरिराम उप्रेती

गोरखा — मनास्लु हिमालमा सोमबार गएको हिमपहिरोमा परी मृत्यु भएका शंखुवासभाका ३४ वर्षीय अनुप राईको शव सामागाउँ ल्याइएको छ । राईको शव सिम्रीक एयरको हेलिकप्टर मार्फत् सामागाउँ ल्याइएको जिल्ला प्रहरी कार्यालय गोरखाका डीएसपी लिलाराज लामिछानेले जानकारी दिए ।

‘१५ मिनेटअघि शव सामागाउँ ल्याइपुर्‍याएका छौं,’ उनले भने,‘प्रारम्भिक काम सकेर आजै शव काठमाडौं पठाउने तयारी भइरहेको छ ।’ मंगलबार दिउँसोदेखि नै हिउँबाट शव झिक्ने प्रयास गरिए पनि मौसक प्रतिकुलताका कारण हेलिकप्टर हिमपहिरो गएको ठाउँमा पुग्न सकेको थिएन ।

यस्तै हिमपहिरोमा फसेका सबैको उद्धार भएको गोरखा प्रहरीले जनाएको छ । मंगलबार मात्र आठ जनाको उद्धार गरिएको छ ।उनीहरूमध्ये एक जना पुन: बेसक्याम्पतर्फ फर्किएका छन् भने सात जनालाई काठमाडौं पठाइएको छ ।

दुई जना सामान्य घाइते भने हिँडेर पहिलो क्याम्पमा आएको लामिछानेले जानकारी दिए । यसअघि सोमबार नै दुई जना घाइतेको उद्धार गरिएको थियो । मनास्लु हिमालको क्याम्प ३ र ४ बीचमा सोमबार हिमपहिरो खस्दा आरोहणका लागि पुगेकाहरू हिउँमै फसेका थिए ।

प्रकाशित : आश्विन ११, २०७९ १६:४२
पूरा पढ्नुहोस्
प्रतिक्रिया
पठाउनुहोस्
×