राज्यको विभेदकारी नीतिका कारण वर्षौंदेखि खुलेका उद्योग धरशायी हुने अवस्था छ : गगन थापा

विराटनगर — नेपाली कांग्रेसका महामन्त्री तथा पूर्व मन्त्री गगनकुमार थापाले राज्यको गलत र विभेदकारी नीतिका कारण वर्षौंदेखि खुलेका उद्योग धरशायी हुने अवस्था आएको बताएका छन् । 

कान्तिपुर मिडिया ग्रुपले आयोजना गरेको 'उज्यालो पूर्व' कार्यक्रममा विद्वत प्रवचन दिँदै नेता थापाले गलत विभेदकारी नीतिका कारण वर्षौं पुराना उद्योग धरशायी भएर बन्द हुने अवस्थामा आउनुमा सरकारमा पुगेको सबैले जिम्मेवारी लिनुपर्ने बताएका हुन् ।

उनले प्रदेश १ मा उत्पादनको सम्भावना भएपनि केही सीमित उद्योग पोस्ने नीति राज्यले लिँदा पुराना उद्योगहरु धरशायी हुने अवस्था आएको बताएका हुन् । 'एउटा ठाउँमा म्यानुफ्याक्चरिङ उद्योगहरू स्टेगनेन्ट भएर बसेको छ । स‌ंघ सरकारले बनाउने एउटा गलत विभेदकारी नीतिका कारण वर्षौंदेखि खुलेका उद्योग धरशायी भएर बन्द भएर सडकमा आउनुपर्ने बाध्यता भएको छ,' उनले भने ।

नेता थापाले एकदुई जनालाई पोस्न खोज्दा वर्षौंअघि खुलेको उद्योगहरु बन्द हुने अवस्थामा पुगेको बताए । 'नीजी फाइदाका लागि बनाइने नीतिका कारण उद्योग फैलनुको सट्टा रोकिने र धरशायी हुने अवस्था छ,' उनले भने ।