सत्ता गठबन्धनमा सिट बाँडफाँटबारे सहमति जुटेन, शनिबार फेरि बैठक- समाचार - कान्तिपुर समाचार
कान्तिपुर वेबसाईट
AdvertisementAdvertisement

सत्ता गठबन्धनमा सिट बाँडफाँटबारे सहमति जुटेन, शनिबार फेरि बैठक

कान्तिपुर संवाददाता

काठमाडौँ — सत्ता गठबन्धनका शीर्ष नेताहरूको बैठक शुक्रबार पनि निष्कर्षविहीन बनेको छ । आगामी निर्वाचनमा चुनावी तालमेल गरेका गठबन्धन दल सिट बाँडफाँटबारे महिनौँदेखि छलफलमा छन् । तर, सहमति जुटेको छैन । शुक्रबारको छलफलमा समेत सहमति जुटाउन नसकिएको जसपाका नेता रामसहायप्रसाद यादवले बताए ।

‘शीर्ष नेताहरूबीच छुट्टा-छुट्टै र कार्यदलसहित बसेर समेत गरी शुक्रबार पनि लामो छलफल भयो । हामीले सिटको किटान गरेर अघि बढौँ भनिरहेका छौँ, तर कुरा मिलेको छैन,’ उनले भने, ‘फेरि छलफल गर्ने गरी आजको बैठक सकिएको छ ।’ शनिबार बिहान ११ बजेपछि पुनः छलफल गर्ने गरी बैठक स्थगित भएको उनले बताए ।

प्रधानमन्त्रीको सरकारी निवास बालुवाटारमा बसेको बैठकमा प्रधानमन्त्री एवम् नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादवलगायत गठबन्धन दलका शीर्ष नेताहरू र सिट बाँडफाँट कार्यदलका सदस्यहरू सहभागी थिए ।

गठबन्धन दलले २० साउनमै आगामी निर्वाचनमा चुनावी तालमेल गर्ने सहमति गरेका थिए । त्यही बेला कांग्रेसका नेता कृष्णप्रसाद सिटौलाको संयोजकत्वमा ११ सदस्यीय कार्यदल बनाएर सिट बाँडफाँटको छलफल थालेका थिए । तर, अहिलेसम्म पनि गठबन्धनमा सिट बाँडफाँटको टुंगो लाग्न सकेको छैन ।

नेताहरूले करिब एक सय सिटमा दलहरूको एकल दाबी रहेको र त्यसबाहेकका सिटमा एकभन्दा धेरै दलको दाबी हुँदा समस्या रहेको बताएका छन् । दलहरू प्रतिनिधिसभाका १६५ र प्रदेशसभाका ३३० वटै निर्वाचनमा गठबन्धन गर्ने प्रयासमा छन् । तर, गठबन्धन गर्दा बढी सिट लिन खोज्ने सबै दलको महत्वकांक्षाले गठबन्धनमा सिट बाँडफाँट भने मिल्न सकेको छैन ।

प्रकाशित : आश्विन ७, २०७९ २१:४५
प्रतिक्रिया
पठाउनुहोस्

सिरियाको समुद्रमा डुंगा पल्टिँदा ७० जनाको मृत्यु

एजेन्सी

काठमाडौँ — लेबनानबाट आप्रवासी तथा शरणार्थीहरू चढेको डुंगा सिरियास्थित समुद्री किनारमा दुर्घटना हुँदा कम्तीमा ७० जनाको मृत्यु भएको छ । सिरिया र लेबनानी सरकारका अनुसार उक्त दुर्घटनामा जीवीत उद्धार गरिएका २० जनाको उपचार भइरहेको छ ।

टर्टोसस्थित बसेल अस्पतालमा उनीहरूको उपचार भइरहेको सिरियाली सरकारले जनाएको छ । सिरियाली यातायात मन्त्रालयले मंगलबार लेबनानको उत्तरी मिन्येह क्षेत्रबाट १२० देखि १५० जना यात्रु डुंगामा यात्रा गरिरहेका थिए ।

सिरियाली बन्दरगाहका महानिर्देशक समेर कुब्रुस्लीले शुक्रबार उनीहरूको खोजी कार्य जारी रहेको बताएका छन् । समेर कुब्रुस्लीले तीव्र हावाका कारण उनीहरूको खोजी कार्यमा कठिनाइ भएको बताए । पछिल्लो समय संकटका कारण लेबनान, सिरिया र प्यालेस्टाइनबाट भागेर युरोप प्रवेश गर्नेहरूको संख्या बढ्दो क्रममा छ । उनीहरू यसरी युरोप जानका लागि जोखिम मोलेर समुद्री र अवैध बाटो अपनाउने गर्छन् ।

हाल डुंगा दुर्घटनाको क्रममा भएको मानवीय क्षतिलाई यसरी युरोप जाने क्रममा भएको सबैभन्दा ठूलो घातक दुर्घटनाको रुपमा व्याख्या गरिएको छ । मृत्यु हुनेमध्ये केही उत्तरी लेबनानस्थित अक्करबाट पनि आएको अन्तर्राष्ट्रिय मिडियाले जनाएका छन्। साथै केही किशोरीहरू पनि थिए ।

लेबनानमा मात्रै दसौं हजार मानिसहरूले आफ्नो जागिर गुमाएपछि यहाँ बेरोजगारी संकट उत्पन्न भएको बताइन्छ । साथै लेबनानी मुद्राको मूल्य घटेपछि पनि यहाँ थुप्रै आर्थिक समस्या बढेको हो । जसले लेबनानमा गरिबी बढेको छ ।

प्रकाशित : आश्विन ७, २०७९ २१:२८
पूरा पढ्नुहोस्
प्रतिक्रिया
पठाउनुहोस्
×