कोरोनाकालमा मानव बेचबिखन बढ्यो, २ वर्षमा २७० उजुरी- समाचार - कान्तिपुर समाचार
कान्तिपुर वेबसाईट
AdvertisementAdvertisement

कोरोनाकालमा मानव बेचबिखन बढ्यो, २ वर्षमा २७० उजुरी

सीमाबाट हजाराैँको उद्धार
कान्तिपुर संवाददाता

काठमाडौँ — राष्ट्रिय मानव अधिकार आयोगले कोरोना महामारीको अवधिमा मानव बेचबिखन तथा ओसारपसारको जोखिम बढेको जनाएको छ । कोरोनाका कारण मुलुकभित्र बेरोजगारीको समस्या वृद्धि भएको र त्यही कारण मानव बेचबिखनसमेत बढेको आयोगको मानव बेचबिखनसम्बन्धी प्रतिवेदन, २०७९ को निष्कर्ष छ ।

प्रतिवेदनअनुसार कोरोना महामारी व्याप्त आर्थिक २०७६/७७ र २०७७/७८ को दुई वर्षको अवधिमा २७० वटा मानव बेचबिखनका उजुरी परेका छन् । शहरी क्षेत्रमा दोहरी साँझ, डान्सवार, मसाज सेन्टर, खाजा घर पार्लरजस्ता मनोरञ्जन तथा सत्कार सेवाका क्षेत्रहरुमा विशेषगरी महिला तथा किशोरीहरुप्रति श्रम शोषण, यौन दुर्व्यवहार एवं शोषण, मानसिक उत्पीडनजस्ता कार्यहरु भइरहेको प्रतिवेदनमा उल्लेख छ ।

त्यस्तै देशभित्र नै बालबालिकाहरु बाध्यकारी श्रम, यौन दुर्व्यवहार तथा शोषणबाट पीडित/तथा प्रभावित भई मानव बेचविखनको उच्च जोखिम अवस्थामा रहेको प्रतिवेदनले देखाएको छ ।

आन्तरिक बेचबिखनको अलावा भारतमा यौन व्यवसाय, श्रमिकको रुपमा, बालबिवाह तथा र चीनमा विवाह, सांस्कृतिक कार्यक्रमको नाममा, सञ्जाल व्यवसायको नाममा, आर्केष्ट्रामा नाच्नका लागी, घुमफिरका नाममा, मनोरञ्जन क्षेत्रमा रोजगार दिलाउने बहानामा समेत बेचबिखन तथा ओसारपसार भइरहेको प्रतिवेदनमा उल्लेख छ । वैदेशिक रोजगारको नाममा अनियमित बाटो भई कानुनीरुपमा अभिलेखीकरण नगरी गएका व्यक्तिहरु मानव बेचविखनको सिकार भएका छन् ।

नेपाल प्रहरीको मानव बेचबिखन अनुसन्धान व्यूरोकाअनुसार आ.ब. २०७६/७७ र २०७७/२०७८ गरी दुई आर्थिक वर्षमा देशभर २७० वटा मानव बेचबिखन सम्बन्धी मुद्दा दर्ता भएका छन् । ती घटनामा परी ३९२ जना व्यक्तिहरु पीडित छन् । बेचबिखनमा परेकामध्ये महिला ९५ प्रतिशत छन् भने बालिकाको संख्या ३८.२ प्रतिशत छ ।

बेचबेखनमा पर्नेमध्ये सबैभन्दा धेरै जनजाति महिला ४४.७ प्रतिशत छन् भने दलित र मधेशी महिला समान ६.१ प्रतिशत छन् । ब्राह्मण महिला ७.३, क्षेत्री महिला १८.२ प्रतिशत छन् । दुई आर्थिक बर्षमा सर्वोच्च अदालतमा ४०२ मुद्दामा बहस पैरवी भएको छ भने ९६ वटा मुद्दामात्रै फर्छौट भएका छन् ।

आयोगको प्रतिवेदनअनुसार यो अवधिमा मानव बेचबिखनको क्षेत्रमा क्रियाशील संस्था माइती नेपालले मात्रै सीमा नाकाबाट १० हजार जनालाई उद्धार र निगरानी सेवा प्रदान गरेको छ । त्यही अवधिमा माइती नेपालले आठ हजार जनालाई पुनर्स्थापना गृहसम्बन्धी सेवा प्रदान गरेको छ ।

त्यस्तै, छोरी संस्थामार्फत जोखिममा रहेका ४ हजार महिला र बालबालिकालाई सहयोग पुगेको छ भने ओरेक नेपालले जोखिममा रहेका २५ सय महिला तथा बालिकाहरूलाई प्रत्यक्ष सहयोग प्रदान भएको छ । आफन्त नेपालले नौ हजार जोखिममा रहेका पीडितहरूलाई सेवा दिएको छ भने शक्ति समूहले १० हजार जोखिममा परेकाहरूको उद्धार गरेको छ । साथी संस्थाले करिब ६ हजारलाई सहयोग गरेको छ भने प्रवासी नेपाली समन्वय समितिले सन् २०१९/२०२० मा ६०० जोखीममा रहेका तथा पुरुषहरुका लाािग पुर्नस्थापना गृह मार्फत प्रत्यक्ष सेवा पुर्‍याएको प्रतिवेदनमा उल्लेख छ ।

प्रकाशित : आश्विन ७, २०७९ १६:१५
प्रतिक्रिया
पठाउनुहोस्

कांग्रेसको निर्वाचन घोषणापत्र दसैंअगावै

यस्तो छ विश्वप्रकाशको विज्ञ समूह
कान्तिपुर संवाददाता

काठमाडौँ — नेपाली कांग्रेसको निर्वाचन घोषणापत्रको मस्यौदा दसैंअगावै तयार हुने भएको छ । घोषणापत्र तयारी समितिले दसैंअगावै मस्यौदा तयार गरी कार्यसम्पादन समितिलाई हस्तान्तरण गर्ने महामन्त्री विश्वप्रकाश शर्माले बताए । ‘हामीले घोषणापत्रको मस्यौदा तयारीको काम थालिसकेका छौँ, दसैंअगावै मस्यौदा तयार गरेर कार्यसम्पादन समितिलाई बुझाउँछौं,’ उनले भने ।

सभापति एवम् प्रधानमन्त्री शेरबहादुर देउवाले महामन्त्री शर्मालाई आगामी मंसिर ४ मा हुने प्रतिनिधिसभा र प्रदेशसभा सदस्य निर्वाचनका लागि घोषणापत्र तयारी समितिको संयोजक तोकेका थिए । शर्मालाई समितिलाई पूर्णता दिएर घोषणापत्र मस्यौदाको काम अगाडि बढाइसकेका छन् ।

घोषणापत्र तयारी समितिमा पार्टीका पदाधिकारी र केन्द्रीय सदस्यहरूसहित विभिन्न क्षेत्रका विज्ञहरुको प्रतिनिधित्व छ । घोषणापत्र तयारी समितिका संयोजक एवम् महामन्त्री शर्माले समितिले पूर्णता पाएलगत्तै बैठक बसेर आवश्यक तयारी अघि बढाएको बताए ।

महामन्त्री शर्माले घोषणापत्र लेखनमा नेपाली समाजको प्रतिनिधित्व झल्किने गरी विज्ञ समूह तयार गरेका छन् । समितिमा कवि श्रवण मुकारुङदेखि क्रिकेटर विनोद दाससम्म समेटिएका छन् ।

समितिमा चलचित्र निर्देशक मीन भाम, कृषि विज्ञ सन्जय महत्तो, समाजशास्त्री दिपेश घिमिरे, मधेशी महिलाको प्रतिनिधित्व गर्दै प्रिति मण्डल, कर्णालीको प्रतिनिधित्व गर्दै रंगमति शाही, फष्ट टाइम भोटरको प्रतिनिधित्व गर्दै विकल राई, सामाजिक रुपान्तरणको मुद्धाको प्रतिनिधित्व गर्दै अनुसन्धानकर्ता प्रकाश लामिछाने समेत सदस्य छन् ।

त्यस्तै, अपांगता भएकाहरुको प्रतिनिधित्व गर्दै भोजराज श्रेष्ठ, अल्पसंख्यक मुद्दामाथि विद्यावारिधि गरेका विश्वविभु घिमिरे, स्वास्थ्य क्षेत्रको प्रतिनिधित्व गर्दै अञ्जनी झा, इन्जिनियर एसोसिएसनका अध्यक्ष हरि दर्लामीमगर, माइती नेपालकी प्रमुख अनुराधा कोइराला र अर्थशास्त्री स्वर्णिम वाग्ले समेत अटाएका छन् ।

समितिको पहिलो बैठक बुधबार पार्टी केन्द्रीय कार्यालय सानेपामा बसेको थियो । बैठकले छोटो समयमा व्यापक छलफलका साथ ‘निरन्तरतामा नविनता’ को दृष्टिलाई केन्द्रमा राखेर घोषणापत्र निर्माण गर्ने निर्णय गरेको छ । बैठकले प्रारम्भिक मस्यौदा तयारीका लागि अर्थशास्त्री स्वर्णिम वाग्ले नेतृत्वको छ सदस्यीय प्रारम्भिक मस्यौदा उपसमिति गठन गरेको छ । समितिमा गेजा शर्मा वाग्ले, प्रताप पौडेल, कृष्ष्णप्रसाद पौडेल, दिपेश घिमिरे र प्रिति मण्डल सदस्य छन् ।

महामन्त्री शर्माले घोषणापत्र तयारीका क्रममा पार्टीका विगतका दस्तावेज र प्रतिबवद्धताहरूलाई समेत स्थान दिइने बताए । त्यहीअनुसार बैठकले कांग्रेस स्थापनाकालमा बीपी कोइरालाले लेखेका दस्तावेजदेखि अहिलेसम्मका सबै दस्तावेज र घोषणापत्रहरु अध्ययन गरेर त्यसको भावनात्मक सार ग्रहण गर्न तीन सदस्यीय अध्ययन र विश्लेषण उपसमिति गठन गरेको छ । सहमहामन्त्री जीवन परियार संयोजकत्वको सो उपसमितिमा मदन कट्टेल र शंकर तिवारी सदस्य छन् ।

घोषणापत्र तयारीका लागि अन्य विभिन्न उपसमितिहरु समेत गठन भएका छन् ।

प्रकाशित : आश्विन ७, २०७९ १६:१०
पूरा पढ्नुहोस्
प्रतिक्रिया
पठाउनुहोस्
×