रुकुमपूर्वमा गाडी दुर्घटना, पाँचको मृत्यु, १३ घाइते [अपडेट]- समाचार - कान्तिपुर समाचार
कान्तिपुर वेबसाईट
AdvertisementAdvertisement

रुकुमपूर्वमा गाडी दुर्घटना, पाँचको मृत्यु, १३ घाइते [अपडेट]

रासस

कर्णाली — रुकुमपूर्वको भूमे गाउँपालिका–३ क्याङ्सी बगरमा भएको बस दुर्घटनामा पाँच जनाको मृत्यु भएको छ । काठमाडौंबाट रुकुमकोट आउँदै गरेको ग१ख ९१०९ नम्बरको बस बिहीबार दुर्घटना हुँदा घटनास्थलमा पाँचको मृत्यु भएको जिल्ला प्रहरी कार्यालय रुकुमपूर्वका प्रहरी नायब उपरीक्षक प्रकाश डाँगीले जानकारी दिए ।

मृतकको सनाखत हुन बाँकी छ । उनले उक्त बसमा सवार १७ मध्ये १३ जना घाइते भएका र तीनको अवस्था गम्भीर रहेको बताए । घाइते सबैको रुकुमपूर्व अस्पतालमा उपचार भइरहेको प्रहरी नायब उपरीक्षक डाँगीले जनाए ।

उनका अनुसार घटनास्थलमा उद्धार कार्य भइरहेको छ । घाइतेलाई हेलिकप्टरबाट उपचारका लागि लैजाने पहल भएको छ ।

नेपाली सेनाको नरसिङ दल गुल्म रुकुमपूर्वका सेनानी बाबुलाल जिसीले घाइतेको उपचारका लागि सुर्खेतबाट हेलिकप्टर ल्याउने तयारी भइरहेको जानकारी दिए ।


प्रकाशित : आश्विन ६, २०७९ १७:४७
प्रतिक्रिया
पठाउनुहोस्

शिविरमार्फत भत्ता वितरण

डम्बरसिं राई

खोटाङ — दसैं नजिकिँदै जाँदा साकेला गाउँपालिकाले शिविरमार्फत सामाजिक सुरक्षा भत्ता वितरण सुरु गरेको छ । वृद्धवृद्धालाई बैंकमा आएर रकम भुक्तानी गर्न समस्या हुने भएकाले पायक पर्ने ठाउँमा शिविरमार्फत वितरण सुरु गरिएको हो ।

बिहीबार उक्त गाउँपालिका–१ बाँझेच्याडाँडाको डाँडागाउँस्थित चण्डेश्वरी प्राविमा शिविर सञ्चालन गरिएको साकेला गाउँपालिका सामाजिक सुरक्षा शाखा प्रमुख डिएम चाम्लिङले बताए । उनका अनुसार ७५ जनालाई लाभग्राहीलाई १० लाख २५ हजार वितरण गरिएको छ ।

बुधबार पनि बाँझेच्यानडाँडास्थित वडा कार्यालयमा शिविर सञ्चालन गरिएको थियो । उक्त दिन ८२ जना लाभग्राहीलाई १२ लाख ९२ वितरण गरिएको थियो । मंगलबार उक्त पालिकाको वडा नं ५ मात्तिम विर्तामा भएको शिविरमा ९० जना लाभग्राहीलाई १३ लाख २५ हजार वितरण गरिएको चाम्लिङले सुनाए । उक्त पालिकामा वृद्धवृद्धाले नेपाल एसबीआइ बैंकमार्फत सामाजिक सुरक्षा भत्ता लिने गरेका छन् । ‘शिविरमा गाउँपालिकाका कर्मचारी र बैंक मेनेजर अशिम इङनाम लिम्बु आफैं सहभागी भएर भुक्तानी गर्दैछौं,’ चाम्लिङले भने,‘गाउँमै भत्ता पाएपछि लाभग्राहीसमेत खुसी हुनु भएको छ ।’

यो त्रैमासिकमा उक्त पालिकाका १३ सय २० जनालाई एक करोड २३ लाख रुपैयाँ वितरण गरिने चाम्लिङको भनाइ छ । शिविर विभिन्न वडामा छ दिनसम्म सञ्चालन गरिने उनले बताए । शिविरमार्फत सामाजिक सुरक्षा वितरण गर्दा लाभग्राहीलाई सहज हुनुका साथै पारदर्शी पनि हुने गाउँपालिका अध्यक्ष रवीप्रकाश राईले बताए ।

साकेला गाउँपालिका–१ बाझेच्यानडाँडाको डाँडागाउँस्थित चण्डेश्वरी प्राविमा सञ्चालन गरिएको सामाजिक सुरक्षा भत्ता वितरण शिविर । तस्बिर सौजन्य : साकेला गाउँपालिका

प्रकाशित : आश्विन ६, २०७९ १७:३९
पूरा पढ्नुहोस्
प्रतिक्रिया
पठाउनुहोस्
x
×