वर्ष दिनमै अख्तियारमा १६ हजारभन्दा बढी भ्रष्टाचारसम्बन्धी उजुरी दर्ता- समाचार - कान्तिपुर समाचार

वर्ष दिनमै अख्तियारमा १६ हजारभन्दा बढी भ्रष्टाचारसम्बन्धी उजुरी दर्ता

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगमा एक वर्षको अवधिमा १६ हजारभन्दा बढी भ्रष्टाचारसम्बन्धी उजुरी दर्ता भएको छ । अख्तियारमा आयोजित पत्रकार सम्मेलनमा प्रवक्ता श्यामप्रसाद भण्डारीले ३२ औं वार्षिक प्रतिवेदन सार्वजनिक गर्दै आर्थिक वर्ष २०७८/०७९ मा मात्रै १६ हजार २३८ उजुरी परेको जनाएका हुन् ।

अघिल्लो आर्थिक वर्ष ०७७/०७८ बाट जिम्मेवारी सरेर आएका ८ हजार ९३ उजुरीसहित अख्तियारमा अहिले २४ हजार ३३१ भ्रष्टाचारसम्बन्धी उजुरी रहेको प्रतिवेदनमा उलेख छ । जसमध्ये आयोगको केन्द्रीय कार्यालय टंगालमा १२ हजार ३०० र मातहतका कार्यालयहरुमा १२ हजार ३१ उजुरी रहेका छन् ।

गत आब ०७८/७९ मा दर्ता उजुरीमध्ये सबभन्दा बढी २७.७ प्रतिशत अर्थात् ४ हजार ४९५ लिखित निवेदन, हुलाक सेवाबाट १७ प्रतिशत अर्थात् २ हजार ७६०, इमेलबाट २ हजार ७५७ अर्थात् १७ प्रतिशत उजुरी परेको आयोगको प्रतिवेदनमा उल्लेख छ । त्यस्तै वेबसाइट, टेलिफोन, समाचारपत्र, मोबाइल एप, फेसबुकलगायत स्रोतबाट उजुरी आएको आयोगले जनाएको छ ।

प्रकाशित : आश्विन ५, २०७९ १६:५०
प्रतिक्रिया
पठाउनुहोस्

नुवाकोटमा दुईदिने बालसाहित्य महोत्सव सम्पन्न

कृष्ण थापा

नुवाकोट — नुवाकोटमा आयोजित दुईदिने बाल साहित्य महोत्सव सकिएको छ । महोत्सव रुम टु रिड, नेपाल बाल साहित्य समाज र रुडेक नेपाल नुवाकोटले संयुक्त रुपमा आयोजना गरेको हो । नुवाकोट आदर्श बहुमुखी क्याम्पस बट्टारमा ‘किताब पढौं, अगाडि बढौं’ भन्ने नाराका साथ असोज ४ र ५ गते गरिएको महोत्सवलाई ३ हजार जनाले अवलोकन गरेको आयोजकले जनाएको छ । 

मोहोत्सवमा बोल्दै शिक्षाविद् प्रा.डा. विद्यानाथ कोइरालाले बालबालिकालाई बढ्ने बानीको विकास गराउन महोत्वसवले सघाउने बताए । ‘हामीले सिकाएको संस्कार चाहे हिन्दू, किरात अथवा इस्लाम होस्‚ यी सबैले हाम्रा केटाकेटीलाई पढाउनुपर्छ भन्दा रहेछन् । अब हामीले केटाकेटीलाई अधिकार पढाउने कि कर्तव्य पढाउने ?’ उनले भने, ‘हामी के पढाउने भन्ने अचम्ममै छौं । अभिभावकले लेख्ने/लेखाउने सामाग्रीहरू हामीसँग रहेनछ । न चाइनिजजस्तो न अमेरिकीजस्तो । हाम्रो अधिकारको चिन्तनले अमेरिकीजस्तो देखिन्छ । व्यहारको चिन्तनले चाइनिजजस्तो देखिन्छ ।’

शिक्षा क्षेत्रमा देखिएको अवस्थाका शिक्षाविद् कोइरालाले चिन्ता व्यक्त गरे । प्रा.डा. शैलेन्दुप्रकाश नेपालले पढ्नका लागि बालबालिकालाई प्रेरित गर्नुपर्ने बताए ।

बालबालिकामा पठनीय संस्कृति बढाउने; आलोचनात्मक चिन्तन विकास गर्ने र उनीहरूको सिर्जनशीलता बढाउने उद्देश्यले महोत्सव आयोजना गरिएको उपाध्यक्ष प्रमोद प्रधानले बताए । महोत्सवमा बालसाहित्य पुस्तकको प्रदर्शनी, कस्तो शिक्षा दिने भन्नेबारे बहस, कथा, कविता वाचन, निबन्ध, चित्रकला, अभिनय, भित्तेपात्रोलगायत सात विधामा विज्ञहरूबाट सिर्जनात्मक कार्यशालाहरू सञ्चालन गरिएको महोत्सवका संयोजक तथा रुडेक नेपालका अध्यक्ष मीनकुमार केसीले बताए ।

महोत्सवमा समाजका पूर्वअध्यक्ष रामबाबु सुवेदी, तेजप्रकाश श्रेष्ठलगायत उपस्थिति रहेको थियो । रुम टु रिड साक्षरता कार्यक्रम निर्देशक नेत्र दाहाल, प्रमुख जिल्ला अधिकारी नारायणप्रसाद रिसालले मन्तव्य राखेका थिए ।

प्रकाशित : आश्विन ५, २०७९ १६:४६
पूरा पढ्नुहोस्
प्रतिक्रिया
पठाउनुहोस्
×