विद्युत् नेपालभित्रै खपत गर्ने पहिलो प्राथमिकता : घिसिङ
काठमाडौँ — नेपाल विद्युत् प्राधिकरणका कार्यकारी निर्देशक कुलमान घिसिङले प्राधिकरणको उद्देश्य विद्युत् निर्यात गर्नु नरहेको बताएका छन् । यस क्रममा घिसिङले विद्युत् निर्यात गरेरभन्दा विद्युत् खपत गरेर अर्थतन्त्रमा बढी योगदान पुग्ने दाबी गरेका थिए ।
मंगलबार सुन्दर यातायात प्रालिले आयोजना गरेको विद्युतीय स्कुटर सार्वजनिक कार्यक्रममा प्रमुख कार्यकारी निर्देशक घिसिङले विद्युत् प्राधिकरणको मुख्य उद्देश्य भारतमा विद्युत् निर्यात गर्ने नभइ नेपालभित्रै खपत गर्ने पहिलो प्राथमिकता रहेको बताए ।
नेपालमा उत्पादित विद्युत् नेपालमा नै खपत गरी समृद्ध नेपाल बनाउने उद्देश्य साकार पार्न सकिने उनको भनाइ थियो । घिसिङले विद्युत् खपत बढाउन हरेक घरमा खाना पकाउनेदेखि सवारी साधनसमेत विद्युतीय प्रयोगमा ल्याउनुपर्ने बताएका थिए ।
नेपालमै विद्युत् खपत गर्नसके मुलुकको अर्थतन्त्रमा १० गुणा बढी योगदान पुर्याउने पनि उनको दाबी थियो । विद्युत् प्राधिकरणले पछिल्लो एक सय दिनमा ७ अर्ब २० करोड बराबरको विद्युत् भारतमा निर्यात गरेको पनि उनले जानकारी दिए। साथै विश्वमा विद्युत् संकट भएर युरोपमा १ युनिट विद्युत्को करिब १ डलर मूल्य रहेको बेला नेपालले भारतमा विद्युत् निर्यात गर्नु विद्युतीय क्षेत्रमा ठूलो फड्को मारेको पुष्टि हुने उनको भनाइ थियो ।
घिसिङले भने, ‘विद्युत् प्राधिकरणले करिब एक सय दिनमा ७ अर्ब २० करोड बराबरको विद्युत् भारतमा निर्यात गरेका छौं । यो नेपालको लागि महत्त्वपूर्ण विषय हो । विगतमा १० मेगावाटको विद्युत् कतैबाट ल्यान सकिन्छ कि भनेर गुहार माग्नुपर्ने स्थिति थियो । अहिले विश्वमा विद्युत्को जति संकट भइरहेको छ । युरोपमा १ युनिट विद्युत्को करिब १ डलर पर्ने अवस्था छ । यस्तो बेलामा नेपालले भारतमा विद्युत् निर्यात गरिरहेको छ । प्राधिकरणको मुख्य उद्देश्य विद्युत् निर्यात गर्ने होइन । विद्युत् खपत गर्ने हो । नेपालको विद्युत् नेपालमा नै खपत गर्ने हो । नेपालमा उत्पादित विद्युत् नेपालमा नै खपत गरेर समृद्ध नेपाल बनाउँदै उज्यालो नेपालको बनाउने उद्देश्य साकार पार्ने हो ।’
यस्तै उनले नेपालमै २५ देखि ३० अर्बको विद्युत् खपत गर्नसक्दा करिब ५ खर्ब बराबरको आयातलाई प्रतिस्थापन गर्न सकिने बताए । यससँगै अब विद्युतीय चार्जिङ स्टेसन देशभर बनाउने लहर चालाउनुपर्ने उनको भनाइ छ । तर यसका लागि निजी क्षेत्रलाई प्रोत्साहन गरिरहेको पनि उनले बताए ।
प्रकाशित : आश्विन ४, २०७९ १८:४०