नागरिकता विधेयक कुनै बहानाबिना छिटो जारी गर्नुपर्छ : पूर्वप्रधानमन्त्री भट्टराई- समाचार - कान्तिपुर समाचार
कान्तिपुर वेबसाईट
AdvertisementAdvertisement

नागरिकता विधेयक कुनै बहानाबिना छिटो जारी गर्नुपर्छ : पूर्वप्रधानमन्त्री भट्टराई

कान्तिपुर संवाददाता

काठमाडौँ — नेपाल समाजवादी पार्टीका अध्यक्ष एवं पूर्वप्रधानमन्त्री बाबुराम भट्टराईले दलहरुबीच आरोप प्रत्यारोप गर्नुभन्दा हालसम्म भए/गरेका काम र जनअपेक्षाको समीक्षा गर्नुपर्ने बताएका छन् ।

प्रतिनिधिसभाको शनिबारको बैठकमा उनले यो इतिहासले सुम्पिएको जिम्मेवारी हामीबाट कति पूरा भयो समीक्षा गर्ने बेला हो भने । 'जनताले कसरी हेरिरहेको छ त्यो हेर्न जरुरी छ । राजनीतिक विकृतिहरुका समाचार आइरहेको अवस्थामा आफैंलाई हेर्न जरुरी छ । यही संसद्‌बाट निर्वाचित सरकारले संसद्लाई दुई पटक विघटन गर्न पुगे । धन्न हामीले जोगाउन सफल भयौं', उनले भने ।

अध्यक्ष भट्टराईले न्यायपालिका कति खोक्रो भएको रहेछ भन्ने अहिलेको महाभियोग छानबिन समितिमा भइरहेको बयानका क्रममा सुनिएका कुराले थाहा हुन्छ भने । कतिपय काम नभएका होइन उपलब्धि भएका छन् तर जनअपेक्षाअनुसार काम हुन नसकेको उनले उल्लेख गरे ।

नागरिकता विधेयकका सम्बन्धमा दलीय आधारमा लम्बिनु नहुने धारणा व्यक्त गर्दै उनले नागरिकता विधेयक कुनै बहाना नगरीकन छिटो जारी गर्नुपर्ने बताए ।

उनले भने, 'यसअघि वैवाहिक अंगीकृत नागरिकता पनि दिएकै हो । महिलालाई संवैधानिकरुपमा विभेद गर्न मिल्दैन । आफ्नो बाबुको पहिचान नखुलेको अवस्थामा स्वघोषित आमाले भन्दा नागरिकता दिनुपर्छ ।'

संक्रमणकालीन दुई आयोगका विषय कुनै पार्टी विशेषको नभई समग्र शान्ति प्रक्रियाको हिस्सा भएको बताउँदै उनले यसलाई किन लम्ब्याएर राखियो भनी प्रश्न गरे । यसमा हजारौं पीडित जनताले न्याय पाउनु पर्दैन भन्दै उनले यो विस्तृत शान्ति सम्झौतापछि सबैको साझा समस्या हो भने ।

अध्यक्ष भट्टराईले नेपालका लिम्पियाधुरा, लिपुलेक र कालापानी क्षेत्र नक्सामा समावेश गरेर मात्र नहुने भन्दै नक्साअनुसार जमिन प्राप्त गर्न के काम भयो त्यो बारेमा सोच्न जरुरी रहेको बताए । संविधान जारी हुँदा आफूले भनेको आधा गिलासभरि आधा खाली भनेको विषयलाई पूरा गर्न त्यसलाई पूर्णता दिन अझै कार्य गर्न जरुरी रहेको उनले उल्लेख गरे ।

संवैधानिक आयोगलाई पनि पारदर्शी र प्रभावकारी बनाउन जरुरी रहेको उल्लेख गर्दै उनले जनजीवनमाथि उकास्न कृषिमा क्रान्ति र अन्य धेरै काम गर्नुपर्ने बताए ।

प्रकाशित : आश्विन १, २०७९ १७:५६
प्रतिक्रिया
पठाउनुहोस्

पेसागत महासंघ काभ्रेको अध्यक्षमा बडाल

कान्तिपुर संवाददाता

काभ्रे — नेकपा (एकीकृत समाजवादी) निकट पेसागत महासंघ नेपाल काभ्रेको जिल्लास्तरीय कमिटी गठन भएको छ । पेसागत महासंघका केन्द्रीय अध्यक्ष तथा पार्टीका नेता  प्रेमलकुमार खनालको प्रमुख आतिथ्यमा जिल्ला कमिटी गठन भएको हो ।

विभिन्न घटक संगठनहरूको जिल्लास्तरीय संगठनमा पेसागत महासंघको अध्यक्षमा रामप्रसाद बडाल, उपाध्यक्ष बलराम भैल र डा.सन्तोष गौतम, महिला उपाध्यक्ष सुनमाया तामाङ, सचिव मिना स्याङ्तान, सहसचिव भोला सापकोटा र कोषाध्यक्ष सुभास पौडेलसहित २५ सदस्यीय जिल्ला कमिटी गठन गरिएको छ ।

कार्यक्रममा एकीकृत समाजवादी काभ्रेका जिल्ला इन्चार्ज टोकबहादुर वाइबा, प्रदेश सचिव लक्ष्मण लम्साल, जिल्ला समन्वय समितिका प्रमुख दीपककुमार गौतम, जिल्ला सचिव गोकुल गौतम, उपसचिव उसु लामा र बनेपा नगर कमिटीका अध्यक्ष रघुवर चौ प्रधानले बधाई तथा शुभकामना दिएका थिए । समितिका सदस्यहरूलाई पार्टी जिल्ला इन्चार्ज वाइबाले पद तथा गोपनीयताको शपथ खुवाएका थिए ।

प्रकाशित : आश्विन १, २०७९ १७:४५
पूरा पढ्नुहोस्
प्रतिक्रिया
पठाउनुहोस्
x
×